Rokstu sagataveja: portals lakuga.lv

19. oktobrī 18.00 stuņdēs Latgolys viestnīceibā “Gors”, Rēzeknē, “Borowa Mc” svieteis grupys 20 godu jubileju ar koncertu, kurā pīsadaleis ari gosti nu jaunīšu ansambļa “Skonai”, skanēs kai grupys popularuokuos dzīsmis “Vysskaistuokai meitinei”, “Maņ navajag“, “Iededzies par Latviju” i cytys, tai ari rešuok skanejuši, tok grupys muzikim meili i byutyski skaņdorbi, informej koncerta organizatori.

“Divdesmit godu – tys redzīs gona cīnejams vacums, kod ir kū atguoduot. Kai suocem, kai rakstejom pyrmuos dzīsmis, bejom pyrmajūs koncertūs i navariejom nūticēt, ka myusu dzīsmis skaņ radejā. Nu tūs laiku ir taps desmitim jaunu dzīšmu, symtim koncertu i tyukstūšom atmiņu. Tok, nu ūtrys pusis, mums vys vēļ tik daudz ideju jaunom dzīsmem i projektim,” stuosta grupys liders Aigars Runčis. Jis turpynoj: “Itūs godu laikā klauseituoji ir lutynuojuši myus ar sovu mīlesteibu i uzmaneibu, i mes asam davuši sovu energeju i mīlesteibu jim atpakaļ. Itys jubilejis koncerts byus taišni taids – atskots iz jau padareitū, tok ar dūmom par reitdīnu.”

“Mani cīši aizkustynuoja itamā vosorā dzierdāts stuosts: meitine bierneibā tik cīši fanuoja par “Borowu”, ka beja izveiduojuse kladi ar izgrīzumim par grupu i dzīšmu vuordim, jei nu golvys zynuoja vysus tekstus i koncertūs vysod dzīduoja leidza. Niu ar smaidu pīmiņu, ka nu tūs aktivuokūs faņu maņ beja baist, partū ka juos fiksēja kotru mozuokū klaidu dzīšmu tekstūs. Vosorā tei meitine beja prīceiga i īdvasmuota satikt myus otkon, atguoduot seņuokus laikus i pīdzeivuot jaunys emocejis myusu koncertā,” stuosta Aigars.

Gatavojūtīs jubilejis koncertam, pyrma nailgys šaļts tyka publicāta grupys jaunuokuo dzīsme “Prūjam juoīt”, kas ir parafraze par grupys 20 godu laikā pīdzeivuotū. Biletis iz koncertu var īsaguoduot ITE.

Grupa “Borowa Mc” ir dybynuota 2004. godā i izdavuse treis studejis albumus. Zynuomuokuos dzīsmis ir “Vysskaistuokai meitinei”, “Maņ navajag”, “Iededzies par Latviju” i cytys. Grupa sajāmuse treis Latvejis muzykys īrokstu goda bolvys. Grupā dorbojās Aigars Runčis, Guntra Kuzmina-Jukna i Ingars Gusāns.