Rokstu sagataveja: portals lakuga.lv

Nikodema Rancāna bolvys izcyluokajim Latgolys pedagogim nūslāguma pasuokums nūtiks 28. septembrī 14.00 stuņdēs Kruoslovys kulturys nomā, informej pasuokuma organizatori. Konkursam itūgod dasaceiti ostoni pretendenti nu Rēzeknis piļsātys i nūvoda, Daugovpiļs, Reigys, kai ari Kruoslovys i Ludzys nūvoda.

Nikodema Rancāna bolvai ir dasaceiti ostoni pretendenti nu pīcu Latgolys pošvaļdeibu i Reigys.  Pretendenti, leidzeigai kai īprīškejā godā, puorstuov divejis pamata nominacejis: par īguļdejumu un sasnāgumim latgalīšu volūdys, kulturviesturis un nūvoda vuiceibys īvīsšonā i īdzeivynuošonā školā i par rodūšu i psihologiski atbolstūšu pīeju vuiceibu ci studeju vidē. Var nūvāruot, ka leluokajā daļā pīteikumu ir atkluotys školuotuoja aktivitatis nūvoda vuiceibā ci latgalīšu volūdā i kulturizgleiteibā.

Nūslāguma pasuokums nūtiks 28. septembrī 14.00 stuņdēs Kruoslovys kulturys nomā. Iz pasuokumu gaideiti kai pretendentu izvierzietuoji, tai jūs atbaļsteituoji, poši konkursa daleibnīki, kai ari īprīškejūs godu nominanti i sadarbeibys partneri. Pasuokumā byus vareiba īpazeit Kruoslovys pusis muzykalūs ļauds: Kruoslovys muzykys i muokslys školys vokalū ansambli “Kruoslaveņa” (vadeituoja Olga Grecka), “Ondrupinis kapelu” Daiņa Platača vadeibā. Byus vareiba nūsavērt iz leluo ekrana Viļānu Muzykys i muokslys školys bārnu i pedagogu veiduotū animacejis kinu “Vydsmuižys Annužys acim” (2023). Juoatguodynoj, ka kinys iniciatore ir bejuse Latgolys Etnografiskuos viestnīceibys vadeituoja Iveta Seimanova, kas ari ir nomināta N. Rancāna bolvai. Naizpaliks ari sirsneigys sarunys i otkon redziešonuos prīca pi čaja.

Konkursu organizej Latgalīšu kulturys bīdreiba sadarbeibā ar Kruoslovys nūvoda pošvaļdeibu. Konkurss ļaun izceļt i gūdynuot lobuokūs nūzaris pedagogus, ceļūt školuotuoja profesejis prestižu sabīdreibā i atguodynojūt, cik svareiga lūma puormaiņu procesā ir izgleiteibai.