Rokstu sagataveja: Marta Puzāka,portals lakuga.lv

Da šam Beibelis teksti latgaliski ir izdūti lekcionareju variantā aba svātdīnis lasejumim, tok itūšaļt Svātī roksti latgaliski byus daīmami ari audiovizuaIā formatā. Pyrmū reizi ir radeits Beibelis lasejums Mateja evaņgeleja 28 nūdaļom, tū var klauseitīs Ilmāra Dreļa bolsā. Ideja īrunuot evaņgeleju latgaliski beja storptautyskai misejai nu ASV, kura specializejās taišni Beibelis audio i video īrokstūs.

Mateja evaņgeleja audiovizualuo īroksta prezentacejis pasuokumā 13. septembrī Rēzeknis Katuoļu vydsškolys zālē pīsadaleja Romys katuoļu bazneicys Rēzeknis-Aglyunys diecezis veiskups Juoņs Buļs, Reigys arhidiecezis paleigveiskups Andris Kravalis, taipoš ari projekta eistynuotuojs – Latvejis Beibelis bīdreibys vaļdis prīšksādātuojs Jānis Baluodis i projekta finansātuojs – misejis “Ticeiba īt caur dzierdiešonu”nu ASV puorstuovs Dženifers Stelters.

Školys zālē beja sasapuļciejuši školāni, kurus uzrunuoja veiskups Juoņs Buļs. Jis pastreipuoja, ka myusu dīnu pasauļs ir nūsavierss nu Svātūs rokstu skaiteišonys, deļtuo Dīva vuorda izplateišonai ir cīši svareigi pīsavērst taišni socialajuos platformuos, bez kuo modernuo cylvāka dzeive nabyutu īsadūmojama.

“Pādejūs desmit godu laikā daudzi nu pastoralūs dorba leidzeklu atkluoja sovu nasekmeigumu. Itūšaļt tī nader, kab uzrunuotu modernū cylvāku, deļtuo teik maklātys jaunys pastoraluos darbeibys i metodis. […] Na veļti evaņgelists Lūkass roksta: “Ituo pasauļa bārni sovā vītā ir gudruoki par gaismys bārnim.” Prūtams, tuos vysys metodis ir tik pamatmetodis pastoralajā dorbā, kam vysupyrma ir juosavuica nu poša Jezus i nu apustuļu, bet jī vīnnūzeimeigai soka, ka vysupyrma juosludynoj evaņgelejs. Ari šudiņ itam aizdavumam juobyut pyrmajā vītā,” tai uzrunā soka veiskups J. Buļs.

Audiovizualuo īroksta pamatā ir Mateja evaņgeleja teksts, kas latgaliski atrūnams Romys katuoļu bazneicys Rēzeknis-Aglyunys diecezis 2013. godā izdūtajā lekcionarejā, kas teik izmontuots dīvakolpuojumūs i Beibelis lasejumūs svātdīnēs i bazneicys svātkūs. Evaņgeleja tekstu īrunuoja akters, horeografs i žurnalists Ilmārs Dreļs.

Īrunuotais Mateja evaņgelejs latgaliski, taipoš ari latvyski sevkuram daīmams par breivu YouTube profilā “Evaņģēlija filmas latviešu valodā”. Taišni latgaliski klauseitīs i vērtīs var 28 nūdalis. Īrokstu var dabuot ari teleponā caur kvadratkodu, kas itūšaļt dorbojās viņ Android īreicem.

Kai nūruoda projekta eistynuotuoji, pi īroksta izveidis struoduots ilgi, suocūt jau nu 2022. goda. Dorbs puorsvorā nūtyka vokorūs “Radio Marija” studejā Reigā. Taipoš dorbu sarežgejušys diskusejis par latgalīšu volūdys lītuojumu.

Prezentacejis pasuokumā bīskaps Buļs pastreipuoja, ka vysplošuokuos puordūmys par Dīva vuorda spāku ir atrūnamys taišni Mateja evaņgelejā, kur Dīva vuords ir patīsuo gaisma, kas izgaismoj kotru cylvāku.

“Dzeivis pīredzis izgaismuošona, kab atkluotu cylvākam tuos byutyskū jāgu. Lampa myusu sūlim i gaisma myusu ceļam. Deļtuo sludynuosim Dīva vuordu i Dīvs pats dūs augļus. Ari mes gribim pīlītuot taidu metodi, kab, par pīmāru, šofers, braucūt automašynā, varātu īslēgt evaņgeleju i tū nūsaklauseit, boguotynojūtīs goreigi,” tai veiskups Buļs.

Projektu finansēja miseja “Ticeiba īt caur dzierdiešonu”, kas jau īprīšk finansējuse ari Jaunuos Dereibys i Vacuos Dereibys gruomotu audioīrokstus latvīšu volūdā, kū izdeve Beibelis bīdreiba. Miseja beja īinteresāta iz prīšku atbaļsteit ari mozuos volūdys Baļtejis regionā, deļtuo Latvejis Beibelis bīdreiba kai vīneiguo nu Baļtejis vaļstu bīdreibu pīsaceja taišni latgalīšu volūdys projektu.

Misejis puorstuovs Dženifers Stelters školānim vaicuoja, cik volūdu ir iz pasauļa, iz kū školāni beja cīši zynūši i pareizuo atbiļde dreiži viņ tyka nūsaukta – 7000. Skaitlis pīruoda, ka volūda ir myusu boguoteiba, leidz ar tū ir svareigi, kab ari Dīva vuords tyktu nūdūts vysaižuokuos volūduos.

“Myusu miseja ir padareit Dīva vuordu daīmamu vysupyrma audio formatā, tok ari taidā formatā, kaids cylvākim ir daīmams. Tikai pusei nu tūs volūdu, kas ir zynomys, ir raksteiba. Vysā pasaulī ir cīši daudzi veirīšu i sīvīšu, kas struodoj pi tuo, kab Svātī roksti byutu puortulkuoti i daīmami tamuos volūduos. Myusu kolpuojums ir taids, ka mes veidojam audio Beibelis i ari taisom video Beibeli. Mums jau ir klausamuos Beibelis aptyvai 2000 volūduos i leluokajai daļai nu tūs ir ari video formats. Myusu mierkis ir tyvuokajūs desmit godūs padareit puorejuos volūduos daīmamu Dīva vuordu, padareit daīmamu Dīva vuordu vysam pasauļam, vysim cylvākim. Taidā volūdā, kaidu jī saprūt,” nūruodeja Stelters.

Prezentacejis pasuokuma dīnā Dž. Stelters pyrmū reizi gasteja Latgolā i beja pateikami puorsteigts, cik latgalīšu volūda ir dzeiva i plošai lītuota, deļtuo sadarbeiba par Svātūs rokstu īrunuošonu latgaliski varātu ari turpynuotīs. Pasuokumā laikā lels paļdis tyka saceits ari cytim projektā īsaisteitajim – projekta koordinatorei Sendijai Burkai-Šaicanovai, Elizabetei Šaicanovai, prīsteram Jākubam Rodionam Doļam, Annai Briškai.

Fotogalerejā: Mateja evaņgeleja audiovizualuo īroksta latgaliski prezentaceja, foto Marta Puzāka/portals lakuga.lv