Rokstu sagataveja: Edeite Laime, portals lakuga.lv

Drūseiba škārsteiklā, medejprateiba, seve pasorguošona, kab natyktu kruopnīku i skameru nogūs, ir myusu kasdīnys izaicynuojumi laikūs, kod dators, telepons i cytys īreicis ir palykušys par tyvuokajim. Kur digitalajā pasaulī ir vīta latgalīšu volūdai i voi tei koč kai var paleidzēt palikt drūsuokim, stuojūtīs preteimā īprīšk nūsauktajim izaicynuojumim? Tys ir vaicuojums, kas palīk svareigs šaļtī, kod ari mozuoklītuotuos volūdys vaira i vaira pasaruoda tehnologejuos.

Latgalīšu volūda kasdīnā

Pavasarī i rudinī kūpā ar kolegem kai portala lakuga.lv puorstuovis bejom gostūs Ludzā, Rēzeknis nūvodā i Saļņovā, lai stuosteitu ap latgalīšu rokstu volūdu i medejprateibu latgaliski. Taida vareiba beja, pasasokūt Baļtejis Medeju izcileibys centra grantam. Sasatikšonu mierkis i aizdavums – lai zynuošonys ap raksteišonu latgaliski sabīdreibā palīk lobuokys i ari aug izpratne, kur i kai volūda pasaruoda digitaluo pasauļa na cik lobajuos lītuos, bet kai, puorzynojūt volūdu, reizē škārsteiklā var justīs drūsuok. Kotrā nu sasatikšonu atguojušajim vaicuojom, cik daudzi jī runoj i roksta kasdīnā latgaliski. Runuotuoju auditorejuos (kotrā ap 20 ļaužu) beja leluokuo daļa, bet iz vaicuojumu ap raksteišonu rūku pacēle viņ rešais. Taipat cīši atsaškeire sazinis situacejis – sātā, ar draugim, sovejim runuošonys i raksteišonys latgaliski ir vaira, bet tī, kur oficialuoka vajadzeiba – raksteit saīmūt cīši reši. Oficialī dati, par kurim varim runuot, cikom ir vīni i tī poši – 2011. gods Tautys skaiteišona i Centraluos statistikys puorvaļdis 2022. gods apsekuojuma “Pieaugušo izglītība” rezultati. Obeji ruoda, ka latgaliski Latvejā kasdīnā i sātā runoj ap 8–9 % dzeivuotuoju, Latgolā tī ir 36–37% dzeivuotuoju, koč absolutūs skaitļūs Latvejā kūpā runuotuoju kasdīnā 2011. godā ir 164,5 tyukst., bet 2022. godā runuotuoju sātā drupeit viers 98 tyukst.– daudzi mozuok. Dīvamžāļ nav taidu oficialūs jaunuokūs datu, kas piļneibā ļautu saleidzynuot latgalīšu volūdys lītuošonu kasdīnā, bet, sprīžūt piec 2022. gods datu i ari piec atbiļžu auditorejuos, vys tik latgalīšu volūda vaira ir sātys volūda runuotā formā. Runuot sātā ir vīns, bet volūda dzeivoj ari cytuos vidēs, nu kuru vīna myusu dīnuos ir digitaluo.

Digitaluo pasauļa izaicynuojumi

Itys ir laiks, par kuru var saceit, ka volūda byus škārsteiklā, jei vēļ (vysmoz kaidu laiku) dzeivuos. Latgalīšu volūda ir škārsteiklā i jimā pasaruoda arviņ vaira – narunojūt ap kasdīnu socialajūs teiklūs nu receptu, jūku, da politikys i ekonomikys sarunu latgaliski, pasaruodeišonu vysaida veida medejūs, varim runuot i par volūdys reikim i tehnologejom: sovulaik dorbi pi Mozilla Firefox škārsteikla puorsavieršonys programys latgaliski, kasdīnā izmontojamuo satiksmis lītuotne “Waze”, latgalīšu volūda daīmama vairuokūs volūdu korpusūs, pārņ īsasuoce projekts “Bolsu tolka”, pasaruodeja aplikaceja “Latgalian Verbs”, ituo gods pavasarī lītuotnē “Vasals!” varēja raudzeit vaira izzynuot ap volūdu, bet piec vairuoku godu dorba latgalīšu volūda nu juņa gola ir daīmama ari Google tulkuotuojā. Taipat ari Rēzeknis Tehnologeju akademejis pietnīki, sasadorbojūt ar Latvejis Universitatis Muoksleiguo intelekta laboratoreju, aizsuokuši dorbu pi latgalīšu Tezaura – škārsteikla skaidrojūšuos i sinonimu vuordineicys. Koč kura daļa nu itūs tehnologeju ir kasdīnys paleigi kotram interesentam, cyta – vaira volūdnīku i volūdys entuziastu dorba uzlobuotuoji, navar saceit, ka kaidu nu tehnologeju lītuotu vysi i vysur.

Ka runuot par kaidom pyrmajom lītom, 2024. godu varātu raudzeit īzeimēt kai pyrmuo spama voi pikšeriešonys (e-posta viests, kas sataiseitys tai, lai ruodeitūs, ka syuta oficialys īstuodis, tok mierkis ir izmuoneit naudys) latgaliski laiku. Janvarī Tviterī (voi platformā X – kai puorsaukta niu) lītuotuojs @eriophorummm publicieja viesti, ka pyrmū reizi sajiems spamu latgaliski – kaids advokats Stivens Bordols (kurs viestulis golā palyka par Bordoku) sasazynuoja par nazkaida dr. Edvina montuojumu. Kaida ir ituos viestulis volūdys kvalitate – nav augsta, bet reizē varātu saceit, ka lobuoka nakai piļneiga suocieja i latgalīšu volūdys nazynuotuoja raksteišona.

Voi tys ir pyrmais spams, kū vyspuor kaids latgaliski sajam, gryuts saceit, bet tū, kaidu na tuos lobuokuos skreinis vuoku napylnu pusi goda piečuok attaiseja Google Translate latgaliskuos versejis palaisšona, sprīžūt piec īrokstu i pasadaleišonys socialajūs teiklūs, sajuta daudzi. Par reizi latgaliski varēja sajimt viests par kurjera pakolpuojumu izsekuošonu, gataveibu īguļdeit lelys naudys, kai ari naudys izmoksu apstyprynuojumim.

Na vysu, bet dalis pikšeriešonys ziņu volūdys kvalitate var saceit, ka pat cīši loba, kas nūruoda, ka eisūs informativūs tekstūs eistyn juosuoc uzamaneit i īsmaideišonai ap raksteibu latgaliski palīk mozuok vītys. Kai nūsadrūsynuot, kab naīkrystu muoņūs? Atslāgi varātu byut, ka dīvamžāļ (voi saīt, ka par laimi) kurjerservisi, oficialuos īstuodis i uzjāmumi latgaliski ar klientim raksteitā formā nasasazynoj – kai nu datu i apvaicuošonu saprūtams, taida saziņa vysa bīžuok ir ar tyvynīkim i draugim –, kai ari tam, kuram ir lobys latgalīšu rokstu volūdys zynuošonys, par reizi saīs saprast, ka sajimtais teksts ir aizdūmeigs. Kaidys izaver pikšeriešonys viests latgaliski, ite puora pīmāru nu publikaceju socialajūs teiklūs.

Mozuoklītuotūs volūdu vairūgi

Atsokūt iz viersrokstā aizdūtū vaicuojumu – voi sātā lītuotuo volūda, kas nav kaida nu pasauļa lelūs volūdu voi pamatā vaļstī lītuotuo, var vaira pasorguot škārsteiklā? Saprūtams, ka vyss atkareigs nu kotra lītuotuoja, bet ir vairuoki veidi, kai jei var īt tolkā byus drūsuokam i vaira seve pasorguot:

1. Eipašūs zeimu i simbolu izmontuošona

Cytu mozuoklītuotūs volūdu gadīņūs i ari latgalīšu rokstu volūdā alfabetā ir zeimis, kas atsaškir nu vaļstī lītuotuos literaruos volūdys pamatformu, par pīmāru, latgalīšu rokstu volūdā ir burts ‘y’, divskaņs ‘uo’, kurūs nav latvīšu literarajā volūdā, leidza ar tū ituos zeimis var īt tolkā, veidojūt, pīmāram, drūsuokys parolis voi škārsteikla lopu administracejis saišu nūsaukumus, taipat itam pošam mierkam izmontuot kaidus vuordus latgaliski, kas ir mozuok lītuotu, cik īrosti. Hakerim, raugūt izlauzt kaidus kontus, parolis, kas saisteiti ar latvīšu volūdu, vysa tycamuok, ka mozuok īītu pruotā, ka ir juorauga ari vēļ cytys zeimis, kurūs nav latvīšu volūdys pamata alfabetā.

2. Dagrīzt viereibys latgalīšu volūdys kvalitatei i olūtam

Jemūt vārā jau īprīšk raksteitū i sekojūt leidza volūdys lītuošonys tendeņcem, koč ari, saprūtams, grybātūs, lai komunicej, ir skaidrys, ka, vysa tycamuok, leluoki uzjāmumi latgalīšu volūdu komunikacejai ar klientim naizalaseis, eipaši, ka teik runuots par sasazynuošonu e-postā. Cytaiža situaceja var byut ar reklamom, publiskū komunikaceju socialajūs teiklūs, kur kaids vuords, teicīņs, teikums latgaliski reizi nu reizis pasaruoda, bet masu sazinis e-postūs vysmoz cikom nav taidys praksis i redzīs, ka mozuo volūdys lītuotuoju skaita deļ nabyus i iz prīšku. Tys zeimoj, ka, sajemūt kaida lela uzjāmuma (kurjerserviss, banka voi kas cyts leidzeigs) viesti latgaliski, juobyut viereigi eipaši apstuokļūs, ka var redzēt rokstu volūdā lītuotūs formu napiļneibys – lūcejumu, raksteibys klaidys, naīrostus personvuordus i tamleidzeigi. Juodagrīž viereiba, voi uzjāmums latgaliski ir komuniciejs ari kaidā cytā kanalā, voi sātyslopā ir latgalīšu volūdys verseja, pasaruoda kur cytur uzjāmuma komunikacejā – cīši var švuorbuotīs, ka taišni kaids standarta pakolpuojuma e-posts varātu byut pyrmais kanals, kur komunikacejā ar klientim uzjāmums izalaseitu dareit latgaliski.

Leidzeigi byutu ari ar kaidom muoņu viestim – latgaliski viests publicej tik moz medeju (tū pamatā dora latgalīšu kulturys ziņu portals lakuga.lv, LSM.lv (Latvejis Radejis Latgolys multimedeju studejis sagataveitajūs materialūs), regionalī medeji – “Vietējā Latgales Avīze”, “Rēzeknes Vēstis”, “Latgales Laiks”, Divu krastu radio i reizi nu reizis vēļ kaids, nu leluoku medeju koč kas latgaliski raksteits niu pasaruoda laikrokstā “Diena”, varbyut kai atseviški citati cytūs lelajūs nacionaluo leimiņa medejūs, bet vysa dreižuok viests byus saisteita ar Latgolu voi kulturu, leidza ar tū, puorzynojūt, kurim medejim ir īrosta komunikaceja latgaliski, var par reizi saprast, kod viests varātu byut aizdūmeiga. Medejprateibā latgaliski var pasatrenēt sovulaik portala lakuga.lv sagataveitajā testā ITE.

3. Turpynuot komunikaceju mozuoklītuotā volūdā ari cytūs kanalūs

Apvaicojūt nūdarbeibu daleibnīkus i saprūtūt komunikacejis latgaliski situaceju kasdīnā, vīns nu īsacejumu ir ar cylvākim, kurim teik runuots latgaliski kasdīnā, turpynuot komunikaceju taidā pošā volūdā ari cytūs sazinis kanalūs, par pīmāru, eisziņuos, čatūs, saziņā socialajūs teiklūs. Tys var pasorguot šaļtī, kod, par pīmāru, paziņa, saimis lūceklis lyudz kaidys paleidzeibys, bet pieški tū dora volūdā, kas nav īrosta komuniciešonai – puorvaicuot, aicynuot atsaceit, raksteit jums obejim īrostā volūdā. Ka latgaliski sasarunojat sātā, drūsai tū dorit ari raksteitā formā cytur!

Nūslāgumā var saceit, ka atsacejums iz roksta viersrokstā aizdūtū vaicuojumu ir “Nui!” – mozuoklītuota volūda sātā var paleidzēt byut drūsuokim škāsteiklā, kam tei ir ari unikaluokom pazeimem, rešuoka publiskajā saziņā, bet juoatguodynoj, ka tys īt reizē ar kūpejūs medejprateibys tendeņcu puorzynuošonu, byušonu pīsardzeigim i kluotyn puorbaudeišonu, kas ir komunikacejis ūtrā pusē – viests raksteituojs, juo mierkis i aizdavums.