Rokstu sagataveja: portals lakuga.lv

“Rudiņs ir laiks, kurā īdvasmoj saulrīti, vokori promenadē voi kopejneicā, kur suokusēs syltūs dzierīņu sezona. Rudiņs ir laiks, kod nūbraukt iz Daugovpili, lai īsadvasmuotu nu rodūšuokūs ideju, stuostu i daudzveideibys,” tai Jorens Dobkevičs, bīdreibys “New East” dybynuotuojs. Vēļ jis soka, ka Daugovpilī var atrast vyssmolkuokuos bulkys, lobuokū kopeju i atkluot jaunys garšys, kas pīpiļdeis sirdi ar prīcu i syltumu.

Eipašais Latgolys spāks – seniori

Itūnedeļ mes atzeimojam Storptautyskū senioru dīnu – eipašu šaļti, kod varim pīvērst uzmaneibu natycamim stuostim par cylvākim, kas ir mums apleik. Latgolā dzeivoj seniori, kurī ar sovu dzeivis pīredzi ir peļnejuši eipašu atzineibu. Jī turpynoj myus īdvasmuot ar sovu dorbu, gudreibu i gataveibu pasadaleit zynuošonuos ar jaunū paaudzi.

Vīna nu golvonūs ituos nedelis nūtikšonu Daugovpilī byus Latgolys Senioru Bolva 2024 – kasgadeja ceremoneja, kurā mes gūdynojam vysaktivuokūs i izcyluokūs seniorus regionā. Itys konkurss pastreipoj vacuokuos paaudzis īguļdejumu kulturys, izgleiteibys, medeju, piļsūniskuos aktivitatis i socialuos salīdiešonys jūmuos. Ituos bolvys ideja ir na viņ izceļt tūs, kas paleidz atteisteit myusu nūvodu, bet ari paruodeit, ka vacums nav škierslis byutyskom puormaiņom. Bolvys padūšonys ceremoneja nūtiks 4. oktobrī Latgolys senioru forumā, Daugovpilī.

Vaira par bolvu izzynoj ITE.

Latgolys senioru forums 2024 ir unikals pasuokums, kas veiduots aktivim Latgolys dzeivuotuojim, kurim ir puori 55 godim, kai ari tim, kuri struodoj ar vacuokim cylvākim. Foruma programā paradzātys ari lekcejis i meistarklasis par medeju raksteitprasmi i kritiskū dūmuošonu.

Kab pīsadaleitu forumā, vajag pīsaregistrēt. Tū var izdareit pa telefonu: Aline Hačetlova +371 26432777, pa e-postu: contact@neweasteurope.com (nūruodūt sovu vuordu, pavuordi i piļsātu) voi aizpyldūt anketu ITE. Pasuokums nūtiks Daugovpilī, “New East” kulturys institutā, 18. novembra īlā 41A. Vysys aktivitatis byus daīmamys latvīšu i krīvu volūduos.

Vaira par forumu izzynoj ITE.

Novi Hor – kors rodūšim i breivim cylvākim

Itymā rudini sovu sezonu suoc “Novi Hor” – amateru kors aktivistim, žurnalistim, muokslinīkim i vysim rodūšajim cylvākim. Aicynojam pīaugušūs pīsavīnuot i īgrimt muzykys pasaulī. Ka tev ir vaira par 18 godim i mīļoj dzīduot (na obligati profesionali), itys projekts ir deļ teve. Eksperimentēsim ar dzīsmem vysaidūs žanrūs, veiduosim kūpīnu i augsim kūpā. Kori voda Ilze Baika, repertuars ir daudzveideigs, nūdarbeibuos īkļauts dorbs ar melodejom, ritmu i tekstim. Sasatikšonys nūteik kotru trešdīni “New East” institutā, 18. novembrī 41A. Pyrmuo sasatikšona nūtiks 2. oktobrī 19.00 stuņdēs. Interesentim lyugums dasasaceit ITE.

Īsadvasmoj nu sirrealisma Rotko muzejā

13. septembrī Rotko muzejā oficiali tyka atkluota rudiņa izstuožu sezona, pīduovojūt apmaklātuojim boguotu i daudzveideigu muokslys pīredzi. Golvonais akcents ir vierīneiguo izstuode “Disegno Interno: Pasadūt sovom apmuoteibom”. Taipat muzejā apsaverama latvīšu muokslinīka Vernera Lazdāna izstuode “Cylvāki, dzeivinīki i ainovys”.

Vaira par rudiņa izstuožu sezonu ITE.

Īsadvasmoj nu geometrejis Lienys Šmukstis bārnu izruodē

5. oktobrī 15.00 stuņdēs Vīneibys noma koncertzālē, Reigys īlā 22A, Daugovpilī, nūtiks Cāsu Mozuo teatra izruode bārnim (nu diveju da pīcu godu vacuma) “Figūras”, kas ir daļa nu XIII Muzykys i muokslys festivala “Daugavpils ReStArt 2024” programys. Tei ir vizuali skaneiga i figurali figureiga izruode ar triku elementim, kas aicynoj mozūs apmaklātuojus kūpā ar šova varūnim atkluot, voi saule ir aplis, egle ir trejstyurs i sāta ir kvadrats. Izruodis veiduotuoji aicynoj bārnus pīsadaleit pasauļa veiduošonā i izmontuot sovu iztēli, kab nu vysaidu elementu radeitu koč kū jaunu. Izruode ir 40 minutu gara, īīšona bez moksys.

Kab napalaistu garum aktualuokuos i interesantuokuos nūtikšonys Daugovpilī, sekojit leidza “New East” socialajūs teiklūs. Tī ari atrassit daudzveideigu saturu par organizacejis projektim i iniciativom.