Rokstu sagataveja: Marta Puzāka, portals lakuga.lv

Jau nu septembra suoku LTV1 skateituojus caturtdīņu vokorūs prīcynoj raidejums “Īstās latvju saimnieces”. Pārnajā godā Latgolu tymā puorstuovēja divejis saimineicys nu Preiļu nūvoda – Aglyunys maizis muzeja saimineica Vija Kudiņa i Arendolis muižys saimineica Faimja Turlaja. Itys gods nav izjāmums i viņnedeļ Latgolys vierteibys puorejom dalineicom ruodeja saimineica nu Preiļu nūvoda “Dzeņu sātys” – Kristīne Stašulāne. Jei ir īdvasmojūšs dobys cylvāks, kas sovā apleicejā vidē rauga apvīnuot tradicionalū ar laikmeteigū.

Kristīne Stašulāne ir latgalīte, divu meitu mama, kura dzeivoj sovys dzymtys “Dzeņu sātā” Preiļu nūvodā. Kasdīnā Kristīne guodoj par saimisteibys lītom, uzjamūt gostus pandemejis laikā sataiseitajā gostu sātā, taipoš duovoj cylvākim lobsajiutu – struodoj par masažisti, ražoj vysaidus aromaterapejis i cytus dzīdynojūšus leidzeklus i gordai gatavej interesantus iedīņus. Īsarūnūt pi saimineicys Kristīnis, sātā, kas ir moderni atjaunuots pyrma godu symta nu akmiņu calts klāvs, volda eistyna rudiņa sajiuta – iz golda izcapts uobeļu peirāgs, saimineica sasylda ar korstu guņspučis čaju i pi golda myusu sarunys klausuos bolti ružovuo kačine vuordā Karamele.

Lauzt stereotipus par Latgolu

Raidejuma “Īstās latvju saimnieces” sereju par Kristīni var nūsavērt ITE. Stuostūt par sovu daleibu raidejumā, Kristīne soka, ka suokumā jū pavadeja divejaidys sajiutys.

“Raidejumam mani pīsaceja i izvierzeja Oskars Bērziņš. Suokumā maņ beja jūceigys sajiutys. Dūmuoju – kū es te vyspuor doru? Tys beja šausmeigs mozviertiebys komplekss. Īsadūmojūt eistynu latvju saimineicu, maņ iz reizis pruotā īt Vija Kudiņa. Saleidzynuoju sevi ar jū. Nā, es tok jai “iudiņa navaru danest”! Tok vāluok tī kompleksi nazkur pagaisa, palyka vīgļuok. Ari fiļmiešonys grupa beja cīši atbolstūša i forša!” pīredzē doluos saimineica.

Raidejumā Kristīni cīši atbaļsteja juos veirs Aivars. “Aivars vysu raidejuma laiku beja maņ kluot. Cytom veiri ruodejuos mozuok, deļtuo mums beja taids satraukums,” stuosta saimineica Kristīne. Puorejū saimineicu uzjimšonys dīnā Kristīne eistynuoja vysaidys aktivitatis, kab lauztu īrostūs stereotipus par Latgolu. Dalineicys tyka sagaideitys pi Preiļu piļs parka, juos sagaideja atpazeistamī i graciozī Borhu dzymtys puorstuovi. Dīnys gaitā braukts ar žigulim i zaporožecim, capta zivs mežā, kūpeigi gleznuots i pošu rūkom taiseiti rūku kremi nu eteriskūs eļļu.

“Es raudzeju Latgolu paruodeit cytaiž, laužūt stereotipus. Reidzinīkam, kurs brauc iz Latgolu, prīškskots ir taids, ka mes uorpruoteigi dzeram šmakovku. Maņ tys beja kategoriski izslāgts. Nu nav tai, kai jius dūmojat! Daguoja paruodeit sevi cytaižuok. Byut pīktajai saimineicai ir cīši gryuts, kam redzi, cik daudzi ideju jau ir eistynuots i tovejuos beja leidzeigys. Nu tuo saprotu, ka mes vysys asam iz vīna viļņa,” puordūmuos doluos “Dzeņu sātys” saimineica.

Piec raidejuma fiļmiešonys dalineicu vydā ir izaveiduojuse draudzeiba, juos rauga izpaleidzēt cyta cytai. Taipoš Kristīne pīzeist, ka ir daudzi īgivuse i īsavuicejuse nu puorejūs saimineicu, par pīmāru, kai poša smej, niu zyna, kai juogatavej tartars i ar plauksts paleidzeibu pareizi var izmiereit capta steika gataveibu. Raidejums “Īstās latvju saimnieces” nūsaslēgs jau oktobra golā i golvonū bolvu sajims tik vīna nu septeņu saimineicu, kura byus dabuojuse vysuleluokū nūviertiejumu nu puorejūs saimineicu.

Daudzveideiba i talanti

Jau vaira nakai pīcus godus Kristīne Stašulāne ir medicinys muosa, SPA meistare i aromaterapeite, taipoš jai ir ari sovs uzjāmums “LabaSajūta”. Koč ari mynātuos nūzaris vaira saisteitys ar sīviškeigumu i lobsajiutu, pyrma tuo Kristīne aizaruove ar mednīceibu, paspēja pastruoduot ari par kulturys noma vadeituoju Leičūs i ilgu laiku struoduojuse mežnīceibā.

“Kod es sasapazynu ar veiru Aivaru, nūkuortuoju medinīku eksamenu. Es nabeju tei, kas šaun, bet guoju leidza dziniejūs. Man tys cīši patyka. Tok, kod pīdzyma bārni, tod naapzynuotai poša sev medeibys nūgrīžu kai ar nazi. Niu ir cīši populari byut sīvītei medineicai, īsafiltrejūt veirīšu kompanejā. Tok muns subjektivais redzīņs ir taids, ka sīvītem ir juodora koč kas sovs. Lai jau tī veirīši palīk vīni pi sovu dareišonu. Lai īt i medej sovā puišu kompanejā. Mes, sīvītis, tok asam povuorda kiuriejis, ūgu laseituojis,” smejūtīs soka Kristīne.

Koč ari mednīceiba ir nūslāgts etaps Kristīnis dzeivē, mežs i mīlesteiba pret tū taipoš ir palykuse. Kristīne sevi skaita par dobys bārnu i vysod rauga nūgiut kaidu šaļti dobys ozutē. “Cīši daudzi staigoju iz mežu. Pyrma nedelis beju aizguojuse vīna poša. Daudzi jau soka, ka naasu normala, tok maņ cīši pateik byut mežā. Pūrā beja tik klusai! Ni dzeivinīku skanis, ni vieja šņuokšonys! Vaivareņš smuordoj! Maņ tei ir vīta, kur nivīna natraucātai par pameditēt,” stuosta “Dzeņu sātys” saimineica.

Ari dorbs mežnīceibā nabeja ilgs, kam paraleli dorbam vaļsts īstuodē Kristīne suoce nūsadorbuot ar masažom – masēt tyvuokūs, veidojūt jau nūsaceitu klientu lūku. Tai tys puorauga par nūpītnuoku lītu, tyka dabuota izgleiteiba i beja juopījam vīns nu smoguokūs lāmumu dzeivē – pamest stabilu i labi apmoksuotu dorbu i izavēlēt, kai Kristīne iz tū šaļti saceja, “nakurīni”.

“Maņ ruodīs, ka dorbs mežnīceibā beja bezjiedzeigs. Tu siedi pi papeiru i jūs napalīk mozuok. Paraleli tam dorbam es jau pabeidžu SPA školu i pījiemu lāmumu aizīt iz sovu privatū dorbu. Tai es īguoju taidā masažys i aroma pasaulī. Juosoka, ka maņ, pabeidzūt školu, beja juoīt vuiceitīs par mediki, kam muna mama ir medicinys muosa ar 45 godu stažu. Jei maņ saceja, lai nikaidā gadīnī naīmu vuiceitīs tū, deļtuo paklauseju i beiguos beju Buldurūs (Bulduru tehnikumā – M.P.), vuicūtīs par duorznīku. Tūlaik tuos profesejis dorbs Preiļūs nabeja pīpraseits. Tai dauzejūs, i 40 godūs, kod palyku lela i gudra, pabeidžu medicynys muosys i masīrus Rēzeknē. Vystik mamu napaklauseju,” smejās Kristīne.

Kristīne ir cīši prīceiga par vītu i dorbu, kū dora. Papyldu tam vysam Kristīne aizaraun ari ar piertszineibom, pošvuiceibys ceļā apgivuse vysaidys kulinaruos zynuošonys i prasmis. Ar tom jei lutynoj ari gostus “Dzeņu sātā”. Taipoš jei ar lelu entuziasmu stuosta par sovu veiduotū produkceju, kurys kluostā var atrast vysaidus nu dabeigu izejvīlu taiseitus hidrolatus, tinkturys, eteriskuos ellis, čajus, skrubus i na tik viņ.

Dareit dorbu ar mīlesteibu

“Dzeņu sāta” ir Kristīnis dzymtys sāta. Saime nu jau septeņus godus dzeivoj atjaunuotajā klāva kuormā, tok gostim pīduovuoj babys sātu, kas ari ir atjaunuota i puorsteidz ar naparostū dizainu – senejais kūpā ar laikmeteigū. Kai soka Kristīne: “Mes raugom pīduovuot kvalitati, na kvantitati”. Preiļu nūvoda “Dzeņu sātu” kai naktsvītu vysubīžuok izalosa taišni gosti nu tuoļuoku Latvejis molu, daudzi brauc ari nu sābru vaļsts Leitovys. Ir uzjimti ari gosti nu Italejis, Pūlejis.

Saimineica Kristīne stuosta, ka jau nu bierneibys beja radynuota pi dorba i par tū lels paļdis juosoka kai vacuokim, tai ari vacvacuokim. “Vacuoki guoja dorbā, tok mes ar bruoli dzeivuojom babys i dzeda uzraudzeibā. Bejom baigī guļovys, guliejom da pušdīņu. Tok vāluok vysod myus lyka pi saimisteibys dorba. Tys laikam tai ari palyka zamapziņā, ka ir juostruodoj. Kaidam tok tys ir juodora. Paļdis vacuokim, ka maņ pateik dareit dorbus ar mīlesteibu i mīreigi. Tū raugu saceit ari puorejim – ka dorit dorbu, tod dorit tū ar mīlesteibu. Ka dorbs napateik i dori tū ar rībumu, tod taipoš kaidam tys taipat byus juopuortaisa.”

Pasuokumi “Dzeņu sātā”

“Dzeņu sātā” nūteik ari vysaidi pasuokumi. Par pīmāru, gongu meditacejis, elpuošonys vyngrynuošona, muzykali vokori i vysaidys meistarklasis. Vīnā nu taidu tyka šyuti krakli. Teik plānuots ari daudzi kas cyts. “Dzeņu sātys” saiminīki cīši grib īkustynuot nūtikšonys i radeit pīpiļdeitu kasdīnys dzeivi sātā. Taipoš Kristīnei ir sovi mierki iz prīšku – jei sapynoj par syltumneicu, kur vairumā audzēt zemenis, taipoš ari sataiseit eistynu lauku SPA.