Rokstu sagataveja: portals lakuga.lv

Nu 13. oktobra septenis nedelis iz prīšku Kruoslovys i Ludzys nūvodu pīrūbežā byus sastūpami Latgalīšu kulturys bīdreibys (LKB) puorstuovi ar izgleitojūšu sarunu šovu “Paskaidroj maņ …!” tū pīrūbeža vītu, kurā atsarūnam, informej bīdreibys vadeituoja Ilga Šuplinska. Informaceja par nūtikšonom byus atrūnama socialajūs teiklūs, pošvaļdeibuos i pa vacai mūdei – iz afišu stulpim.

Treis tāli – Vieju Rozale, Klāvu Tekļa i Plotku Jurs – ar humora elementim (anekdotis, puorprotumu skečs, hiperbolys i tt.), muzykys i multimedeju paleidzeibu runuos ar vītejū kūpīnu par vysaidom aktualom lītom. Ari tom, kas nateik pamaneitys regiona ci vaļsts leiminī: kas īzeimej konkretuos vītys pīviļceibu, ar kū vītejī lapnojās, kaidys problemys jūs nūmuoc i kai tū varātu rysynuot, kaidus olūtus jī izmontoj informacejis dabuošonai, kai jī izviertej informaceju i kū tī var i vajag maineit.

Saruna aizavierzeis ari iz praktiskim padūmim, kur Latgalīšu kulturys bīdreibys puorstuovu aizdavums byus izskaidruot, kū nūzeimoj 72 stunžu sūma, parkū tei ir juosaprūt vaira metaforiski, a kam sātā ir juobyut, naatkareigi nu krizis veida i ilguma. Ar kū sevkura individa gataveiba krizei atsaškir piļsātā i laukūs, a pats svareiguokais – nu juo lāmuma reikuotīs, palikt sātā voi laistīs paceli nu sātys.

LKB puorstuovi aicynoj pīsabīdruot ari vītejūs pošvaļdeibu, NVO liderus, kab sarunā dzierdātais napalīk tik izrunuots, bet teik ari rysynuots tymā leimenī, kur kaida problema ir atrysynuojama. Sarunu šova daleibnīki veiduos ari eisys reportažys, raksturojūt vītejū kulturys i informacejis telpu, cytim paruodūt lapnuma i guodeibys objektus i problemys.

Tī, kam ir kas sokoms vaļdeibai, vītejai ci nacionalajai, sābram, draudzeigam ci na vysai saprūtamam, i var izasaceit na viņ socialajūs teiklūs, a dzeivūs cylvākūs, teik gaideiti iz sarunu.

Grafikā var byut nalelys izmainis, tok plānuot sev tyvuokū apleicīni jau var suokt šudiņ: Zylupe – 13.10, Kaplova – Pīdruja – 20.10, Indra – Rūbežnīki – 27.10, Neikšāni (Osyuns) – Porečje – 03.11, Škaune – Pasīne – 10.11, Zalesje – Brigi –– 24.11, Cybla – Goliševa (Mērdzine) – 01.12, Leidumnīki – 08. vai 15.12.

Projekts tūp ar Latvejis Republikys Aizsardzeibys ministrejis atbolstu.