Rokstu sagataveja: portals lakuga.lv

Divejis dīnys, nu 22. oktobra da 23. oktobra, Preiļu nūvoda Saunys pogostā Latvejis jaunuotnis padūmis Latgolys viestnīceiba, kurū koordinej bīdreiba “LOBS”, organizēs jaunīšim “Leidzdaleibys darbneicys”. Kai informej nūtikšonys reikuotuoji, tuos mierkis ir veicynuot i styprynuot Latgolā dzeivojūšūs jaunīšu aktivu īsaisti vītejā kūpīnā, sabīdryskajūs procesūs i vidis veiduošonā.

Leidzdaleiba ir process, kurā jaunīšim ir vareiba pīsadaleit sev svareigu vaicuojumu izlemšonā i apleik nūteikūšuo veiduošonā, ar mierki uzlobuot sovu i leidzcylvāku dzeivis kvalitati. Diveju dīnu laikā jaunīšim paradzātys darbneicys ar vysaidim leidzdaleibys pīmārim i pīredzis stuostim nu jaunīšim i bīdreibu puorstuovim. Taipat dalinīki izzynuos par uorejūs finaņšu pīsaisti sovom idejom – kas ir juodora, lai tevi sadzierdātu, stuosteis bīdreibys “Dagne” puorstuovs Aivars Bačuks.

Darbneicu rezultatā jaunīši grupuos veiks vītejuos kūpīnys analizi i, bolstūtīs iz tuos, izstruoduos projektus ar pīduovuotajim rysynuojumim jaunīšu dzeivis uzlobuošonai sovā kūpīnā. Lobuokī jaunīšu projekti sajims finansiejumu 300 EUR apmārā vīnai idejai.

Pasuokumam var dasasaceit jaunīši nu 15 da 18 godu, da 20. oktobra aizpyldūt itū anketu: ej.uz/latgalelidzdaliba.

Bīdreibys “LOBS” vadeituoja Ingūna Semule par darbneicom soka tai: “Pyrmais projektā organizātais pasuokums beja organizacejom, tok niu gribim īsaisteit jaunīšus leidzdaleibā. Pasuokumā runuos par tū, kas eisti ir leidzdaleiba, stuosteis par pasuokumim, daleisīs pīredzē. Kod jaunīši nūprezentēs sovu ideju, nūtiks bolsuošona i lobuokuo ideja dabuos naudys bolvu. Tys ir taiseits ar mierki, lai jaunīšim paruodeitu, ka ar aktivu dorbu i izpratni par tū, ka es varu vītejā sabīdreibā izdareit nazkū lobu, ar dūmu, ka maņ tī byutu pateikamuok dzeivuot, lai byutu vaira īspieju. Tys ir komandys dorbs, i leidzdaleiba ir poša jaunīša īsaiste, tī nav tik politiki i cytys institucejis. Struodojūt kasdīnā ar jaunīšim, pīaugušī rauga dareit deļ jaunīšu, tok parosti vyslobuokī i jaudeiguokī pasuokumi ir tod, kod jaunīts īt ar sovu iniciativu. Tei ir leluokuo pīvīnuotuo vierteiba, kū dora jaunīts, jamūt vārā sovys vajadzeibys. Reizem ari īdūt jaunīšam apsadadzynuot, nūsavērt nu molys, tok rezultatā tei byus pīvīnuotuo vierteiba”.

Nūtikšona teik eistynuota projektā “Regionalūs jaunuotnis organizaceju kapacitatis styprynuošona interešu aizstuoveibys sferā (LJP 9.0)”. Projektu finaņsej Eiropys Savīneiba #NextGenerationEU i #SIF_sociālādrošība.

Publikaceju apmoksoj bīdreiba “LOBS” projektā “Regionalūs jaunuotnis organizaceju kapacitatis styprynuošona interešu aizstuoveibys sferā (LJP 9.0)”.