Rokstu sagataveja: portals lakuga.lv

Folklorys kūpa “Upīte” nu paguojušuo goda 21. novembra kotru mienesi duovuoja sovim klauseituojim jaunu dzīsmi i videoklipu. Niu jī informej, ka oktobrī nūsaslādz ituo projekta gods i pīduovuoj dzīsmi “Staceja”, kurū kūpa īsavuiceja nu teiciejis Natālijis Smuškys. Oktobris ir dvēseļu mieness, kas līk aizadūmuot par sovim seņčim, i dzīsme “Staceja” paleidz īsavērt sovys dvēselis dziļumūs, sasatikt ar izjiutom i puordzeivuojumim, kurūs puorvarūt, tī mums dūd spāku i līk dzeivuot tuoļuok.

Bolvu nūvoda Namaterialuos kulturys montuojuma centra “Upīte” direktors i folklorys kūpys “Upīte” vadeituojs Andris Slišāns lapnojās i soka: “Prīca, ka asam padarejuši tik vierīneigu dorbu. Vysupyrma, savuocūt vaira par 200 dzīšmu, kū latvīši dzīduojuši padūmu okupacejis godūs. Pa ūtram, kvalitativi īrokstūt 12 dzīsmis ar FK “Upīte” taiseitu aranžeju i videoklipu, asam izturiejuši cīši saspryngtu godu. Pa trešam, asam īskaņuojuši vaira par 30 dzīšmu a cappella dzīduojumā, kopejūt teicieju dzīduošonys stylu. Niu vysys ituos dzīsmis juoizdūd digitalajā i taustomajā albumā!”

Itei ir jau divpadsmytuo dzīsme, kū folklorys kūpa “Upīte” duovoj sovim klauseituojim dzīšmu atjaunuošonys projekta laikā, kurā teik savuoktys i apkūpuotys dzīsmis, kū dzīduojuši latvīši 20. godu symta padūmu okupacejis godūs. Vierīneigais izpietis projekts aizasuoce 2023. gods aprelī, folklorys kūpa “Upīte” atjaunuotuos dzīsmis publicej, suocūt nu 2023. gods novembra. Folklorys kūpa “Upīte” atjaunuotuos dzīsmis publicej, suocūt nu 2023. gods novembra. 21. novembrī tyka prezentāta pyrmuo dzīsme “Kara laukā”. 21. decembrī tika dāvināta klausītājiem jauna dziesma “Kod īt iz balli”. 21. janvarī tyka prezentāta dzīsme “Brigaders”. Februarī tyka duovuota Līvijis Supis teiktuo ukraiņu tautys dzīsme “Marička”. Martā – dzīsme disko skaņuos “Ak, dzeive”, sovutīs aprelī tyka duovuota dzīsme “Žīguļi”. Majā tyka prezentāta Natālijis Smuškys teiktuo dzīsme “Lūgšana”. Juņa dzīsme beja “Rullāti”, juļa – “Tys viel nav nikas”, augusta – “Mazuliet”, septembra – “Dads ar buobu”, bet oktobra – “Staceja”. Folklorys kūpa soka paļdis par atbolstu Vaļsts kulturkapitala fondam.

Dzīsmis īroksts tyka veikts studejā “Bigmaar’s Records”, bet video verseju taiseja “Waltz Visuals”.

Folklorys kūpa “Upīte” dybynuota 2002. godā, atteistūt Upītis bārnu folklorys kūpys, kas dybynuota 1980. godā, darbeibu. Da ituo FK “Upīte” ir izdavuse jau četrus albumus: “Vusi ļauds breinovuos”, “Dzīduot muoku, doncuot muoku”, “Ryugts” i “Padzīdam i…”. Kūpa aktivi pīsadola vysaidūs Latvejis festivalūs i nu 2016. goda Latveju puorstuov ari vysaidūs storptautyskajūs festivalūs vysā Eiropā – Leitovā, Igaunejā, Pūlejā, Itālejā, Čehejā, Rumanejā, Portugalē, Slovakejā, Fraņcejā, Kosovā, Dīnavydkorejā i Boltkrīvejā.