Rokstu sagataveja: portals lakuga.lv

Vēļ da 7. novembra sevkuram školānam voi studentam ir vareiba pīsadaleit eseju konkursā “Es i Eiropys Savīneiba (es & ES)”, kurā var pīsadaleit ar latgaliski raksteitim dorbim, dabojūt vierteigys bolvys, viestej organizatoru sagataveituo informaceja.

Sevkurys klasis školānam voi studentam ir vareiba pīsadaleit eseju konkursā “Es i Eiropys Savīneiba (es & ES)”. Rokstu dorbu breivā formā (vālams da 5000 rokstu zeimu bez storpu), kur par eseju teik saukta dzeja prozā bez īvodu i kūpsavylkumu, vālams dalikt ari mozu poštaiseitu video (20–30 sekuņžu). Rokstu dorbs var byut latvīšu (LVS), latgalīšu (LTG), leitovīšu (LIT), lībīšu (LIV), igauņu (EST) voi ukraiņu (UKR) volūdā. Školānus i studentus nu Latgolys konkursa reikuotuoji seviški aicynoj izmontuot vareibu i pīduovuot dorbus latgaliski.

Konkursa dorbūs tiks vārtāta kai izpratne par demokratisku sabīdreibu i izasaceišonys forma, tai i dorbu originalitate. Studiejūšūs esejis anonimi vērtēs gimnazejis školuotuoji, bet školānu dorbus – augstškolu docātuoji.

Dorbus juīsyuta iz democracy.week.Latvia@gmail.com da Satversmis spākā stuošonuos šaļtei – 7. novembra 12.12 stuņžu. Lobuokūs dorbu apbolvuošona byus kluotīnē sastdiņ, 16. novembrī, 13.13 stuņdēs Eiropys sātā Reigā (Aspazejis buļvarī 28). Apbolvuošonys nūtikšonā gaidoms ari Eiropys Komisejis generalsekretaris Ilzis Juhansonis eisais skaitejums par Eiropys Savīneibys izaicynuojumim, Eiropys Savīneibys tīsys tīsneisis Inetys Ziemelis leidza skaitejums par izgleiteibys īspiejom i jaunīvālāta eiroparlamentarīša īdrūsynuojums esejistim sepinēt sovus sapynus. Rezultati tiks paziņuoti ari 18. novembrī 18.18 stuņdēs Facebook grupā ITE.

Konkursu organizej, viertej i sagatavej bolvys: Viesturis i socialūs zineibu školuotuoju bīdreiba (vaļdis prīšksādātuoja Baiba Atmane), bīdreiba “Publiskūs tīseibu instituts” (izpiļddirektors Arvīds Dravnieks), bīdreiba “Eiropys kusteiba Latvejā” (prezidents Andris Guobiņš (Gobiņš)), Eiropys Komisejis puorstuovnīceiba Latvejā (vadeituoja Zane Petre), Latvejis Politologu bīdreiba (prezidente Iveta Reinholde), bīdreiba “Latvejis Transatlantiskuo organizaceja” (generalsekretare Sigita Struberga), Lībīšu institura atbolsta bīdreiba/ Līvod institūt tigtimiz seļtš (vadeituoja Māra Vīgerte), profesori Jānis Grasis (RSU), Sanita Osipova (LU), Guntis Zemītis (Turība) i Ineta Ziemele (RGSL), latgalīts Agris Bitāts, lībīts Valts Ernštreits, sieļs Jānis Pleps, igauņs Juris Putriņš i cyti školuotuoji.

Konkursa dalinīkim ir vareiba tikt pi vierteigu bolvu – īpasazeišonys ar Eiroparlamenta deputata dorbu Briselē, pīsadaleišonys jaunūs lideru forumā, meistarklasēs, sarunu festivalā “LAMPA”, izdavumim, lekcejom, kai ari cytom bolvom. Vaira dazynuošonys par konkursu i bolvom ITE.