Rokstu sagataveja: portals lakuga.lv

Kai viestej Latgolys viestnīceibys “Gors” publicātuo skumuo viests, aizvadeitajā nedeļgolā myužeibā nūguojuse kordirigente, Latgalīšu kulturys goda bolvys “Boņuks” sajiemieja Antonina Milaševiča (01.05.1938.–19.10.2024.).

Antoninys (sauktys ari par Antu) Milaševičys dzymtuo puse beja Bolvu nūvoda Brīžucīma pogosta (tūlaik Baļtinovys pogosta) Grūšļeva. 1956. godā īsastuojuse Rēzeknis muzykys vydsškolā. Kora dirigiešonu absolvējuse pi Antoninys Mežinskys. Piec muzykys vydsškolys suokuse studēt Latvejis Vaļsts konservatorejis Kordirigiešonys nūdaļā Imanta Kokara klasē. Tai kai Antonina Reigā vuicejuos nakluotīnē, tod piec muzykys vydsškolys beigšonys suokuse dorba gaitys Rēzeknē. Nu 1960. goda struoduojuse par dirigiešonys pedagogi Rēzeknis muzykys vydsškolā, izvuicejuse jaunu latgalīšu dirigentu paaudzi, vadejuse dirigentu vuiceibu kori. Vuiceibu laikā i vāluokajūs godūs dzīduojuse vairuokūs korūs i ansambļūs: sīvīšu vokalajā kvartetā “Latgale” kūpā ar vadeituoju A. Mežinsku, E. Slišāni i A. Šņukuti, Ulda Baluoža vadeitajā korī “Ezerzeme”, Rēzeknis Suopu Dīvmuotis bazneicys korī. Vairuokys godu desmitis bejuse Rēzeknis koru dirigente: 1966.–1981. godā kūpā ar golvonū dirigenti A. Mežinsku sīvīšu kora “Ieviņa” dirigente; 1972.–1982. godā kūpā ar dzeivisbīdru Vitoldu Milaševiču jauktuo kora “Saskaņa” dirigente; vadejuse Brīžucīma sīvīšu vokalū ansambli. Kai koru dirigente i dzīduotuoja pīsadalejuse vysūs XIII–XX Vyspuorejūs latvīšu Dzīšmu svātkūs, Latgolys nūvoda dzīšmu svātkūs i koru festivalūs, bejuse zonalūs dzīšmu svātku viersdirigente Rēzeknē, Bolvūs, Ludzā. Piec aktivuo školuotuojis i dirigentis dorba beigu, dzīduojuse Rēzeknis senioru korī “Septiņkalne” i Rēzeknis Suopu Dīvamuotis bazneicys korī.

2017. gods suokumā Antonina kūpā ar dzeivisbīdru Vitoldu Milaševiču sajēme Latgalīšu kulturys goda bolvu “Boņuks”. Obeju dirigentu i školuotuoju rodūšais myužs ir nūzeimeigs īguļdejums Latgolys i Latvejis kulturā. Bez obeju izcylūs personeibu davuma i jūs audziekņu sasnāgumu nav īdūmojama Latgolys pādejuo godu symta koru kulturys aina. Dirigenti vysod veicynuojuši i populariziejuši latgalīšu tautysdzīsmis skaniejumu, īkļaušonu koru muzykys repertuarā i rūsynuojuši komponistus veiduot latgalīšu dzīšmu apdaris.

Atsavadeišona nu Antoninys Milaševičys byus 26. oktobrī 10.30 stuņdēs nu Rēzeknis Dīva Žielesteibys Romys katuoļu bazneicys (Atmūdys īla 10).

Latgalīšu kulturys ziņu portala lakuga.lv redakcejis vuordā izsokam leidzjiuteibu Antoninys dzeivisbīdram Vitoldam, dirigentis i školuotuojis tyvynīkim, audzieknim i kotram, kam Antonina i juos dorbs bejuši meili!

Pasakavēt atmiņuos aicynojam ar stuostu par Antoninu i Vitoldu Milaševičim raidejumā “LATGALES. PŪRA. LĀDE”.