Rokstu sagataveja: portals lakuga.lv

Ludzys nūvodā pyrmū godu tiks padūta “Kuopusta bolva”, kurys mierkis ir veicynuot dzeivuotuoju īsasaisteišonu pylnvierteigys dzeivis veiduošonā Ludzys nūvodā, informej Ludzys nūvoda bīdreiba “Teātris azotē”. Vēļ da 31. oktobra sevkuram ir vareiba dasaceit pretendentus, aizpyldūt škārsteikla anketu.

“Kuopusta bolva” ir Ludzys nūvoda bīdreibys “Teātris azotē” i Jezupa Soikāna Ludzys Muokslys školys 2024. godā aizsuokts socialuos aktivitatis konkurss. Bolvys mierkis ir veicynuot dzeivuotuoju īsaisti pylnvierteigys dzeivis veiduošonā Ludzys nūvodā i nūviertēt tūs, kuri sabīdreibys lobā dora vaira nakai īrosts. Ar pylnvierteigu dzeivi ituos bolvys kontekstā teik saprasts kai vidis uzlobuošona, tai dorbs nūvoda ideņtitatis i atpazeistameibys lobā, taipat ari nūvoda i kulturviesturyskuo montuojuma izpiete voi jaunrade kulturā i demokratiskys, īkļaunūšys sabīdreibys veiduošona.

Kai stuosta vīna nu bolvys idejis autoru Sandra Vuorkale (Vorkale), dūma eistynuot taidu nūtikšonu asūt rodūsēs bīdreibys “Teātris azotē” puorstuovei Marikai Čerņavskai, kura, puorīmūt dzeivuot iz Ludzu, suoce pastyprynuoti pieteit Jezupa Soikāna davumu Ludzys i Latgolys atteisteibā. “Jezupa Soikāna dzeive beja kai spūdra zvaigzne, cīši eisa, tok ari cīši boguota i ar daudzi lobim dorbim, tok, dīvamžāļ, ari da gola nanūvierteita. Kod veiduojās Latvejis vaļsts, Jezups Soikāns Ludzā izstruoduoja izgleiteibys sistemu, kura ari piečuok ilgu laiku tyka izmontuota, jis pastateja latgalīšu volūdys školuotuojus kai vīnleidzeigus cytu volūdu školuotuojim i lyka plotuokai sabīdreibys daļai nūticēt, ka latgalīšu volūda ir tikpat svareiga i vierteiga, cik latvīšu literaruo volūda. Tei ir tik daļa nu lītu, kurys Jezups īspieja padareit. Niu nu dažu cylvāku idejis ir izauguse bolva, kura nav pompoza, tei pamona ari vīna cylvāka davumu, naatkareigi nu tuo, kaidā nūzarē jis dorbojās,” stuosta Sandra Vuorkale.

Bolvys pretendents var puorstuovēt īstuodi, uzjāmumu voi organizaceju, bet bolvai teik dasacāta fiziska persona. Itūgod bolva tiks padūta pyrmū reizi. Zeimeigi, ka itūgod ari Ludzys nūvoda kulturys i sabīdryskajam darbinīkam Jezupam Soikānam ir 135 godu jubileja i paīt 100 godu nu tuo, kai jis palyka par Ludzys apriņķa prīšksādātuoju. Plānuots, ka bolva tiks padūta reizi pīcūs godūs, 25. novembrī, kas ir Jezupa Soikāna dzimšonys dīnā. Bolvys muokslinīcyskuo autore ir Anda Munkevica. Pi bolvys sajimšonys organizatoru bīdreiba pīduovoj uzvarātuojam 12 mienešu laikā nu bolvys sajimšonys eistynuot vīnu sabīdryskū aktivitati ar bīdreibys finansialu atbolstu da 500 eiro.

Bolvys organizatori aicynoj apsavērt sev apleik i dasaceit bolvai ļauds, kuri dzeivoj sūpluok i ar sovu dorbu padora pasauli par lobuoku i laimeiguoku vītu na tik deļ seve, tok i cytu.

Ar bolvys nūlykumu var īpasazeit ITE, bet pretendentus da 31. oktobra var dasaceit ITE.