Rokstu sagataveja: portals lakuga.lv

Vaļsts svātku nedeļā Augšdaugovys nūvoda Kulturys centra “Vārpa” folklorys kūpa “Dyrbyni” digitaluos straumiešonys platformuos publiciejuse sovu pyrmū albumu “Ontona monts”. Albumā vydā ir 12 īroksti, kurūs pamatā Ontona Skryndys teiktuos i savuoktuos dzīsmis i melodejis, viestej folklorys kūpys atsyuteituo informaceja.

“Dyrbynu” albuma “Ontona monts” īrokstā studejā “Lauska” skaņu režisora Kaspara Bārbala vadeibā pīsadalejuši vysmoz 12 muziki – folklorys kūpys daleibnīki: Agnese Timofejeva (akordeons, garmane, kūkle), Anita Lipska (bolss), Anna Briška (bolss, vejūle, mandolina), Elīza Skrupska (bolss, blokflauta), Gunta Ločmele (bolss, mandolina, kūkle), Ivo Bikuļčs (akordeons), Jānis Snikeris (bolss, mandolina), Krišjānis Kaminskis (bolss, basgitāra, basa ukulele, kūkle, bubyns), Margarita Žuka (bolss, blokflauta), Marina Baranovska (bolss), Mārtiņš Radiņš (bolss, bungys, kontrabass, tamburins) – i dzīsmē “Pyut, pyut, viejeņ” – juos aranžātuojs i multimuokslinīks Artūrs Uškāns (kūkle, gitara), bet albuma dzīšmu apdaris taisejuši Ilze Jurjāne-Lapkovska, Artūrs Uškāns i “Dyrbynu” vadeituoja Anna Briška.

Folklorys kūpys “Dyrbyni”, kas dybynuota 2007. godā, miseja ir izzynuot, saglobuot i viesteit tuoļuok latgaliskuos tradicejis, dzīsmis, daņčus. Kūpys nūsaukums apzeimej darbeigus ļauds, kurī navar nūsēdēt mīrā iz vītys. Latgalīšu vuorda “dyrbyns” izaceļšona ir nu leitovīšu volūdys ‘dirbti’ – ‘strādāt’.

Ontons Skrynda (1881–1918) ir vīns nu izcyluokūs i radzamuokūs Latgolys atmūdys darbinīku. Jis beja uorsts, dzejnīks, žurnalists, gruomotu sastateituojs i izdeviejs, folklorys vuociejs i diveju publicātu tautysdzīšmu apdaru autors (komponists). Taišni nu Skryndys 1900. godā Pīterpilī komponists, folklorists Emilis Melngailis pīrakstejs ap 30 dzīšmu i melodeju. Ari pats O. Skrynda ir vuocs folkloru. LFK digitalajā arhivā garamantas.lv ir daīmams Ontona Skryndys arhivs ar 1590 folklorys vīneibom. Nu 1905. da 1906. gods O. Skrynda studēja medicinu Bernis universitatē Šveicē, kur, dzeivojūt i vuicūtīs, jam rodusēs Rēzeknis kongresa ideja: Latgolys kulturys i goreiguo autonomeja Latvejis vaļstī.

Kai stuosta Anna Briška, folklorys kūpa Skryndys montuojumam pīsavārsuse nu 2016. gods. “Vyss suocās ar braucīni iz Latgolys kulturys dīnom Pīterpilī. Tod atguoduojom, ka Leiksnā ir dzims taids Ontons Skrynda i Pīterpilī pīraksteitys juo dzīsmis. Tys beja pyrmais impulss, bet ūtrais beja dzīsmis īroksts izlasei “Sviests 10”, kod saprotom, ka varātu turpynuot aizsuoktū Skryndys stuostu. Ontona Skryndys montuojums ir cīši boguoteigs – dzīsmis, meiklis, ticiejumus, atminis. Sovā ziņā breinojūs, ka da ituo palics namaneits,” soka Anna. Taipat jei stuosta, ka ir līceibys, ka Ontons Skrynda ītekmēja Melngaiļa tuoļuokū darbeibu – īdvesmuojs vuokt folkloru i pīsavērst ari tautysdzīšmu apdarem. Vacuokī Emiļa Melngaiļa pīroksti ir taišni O. Skryndys dzīsmis.

Albuma “Ontona monts” īroksti taiseiti nu 2022. gods rudiņa, kod diveju dzīšmu īrokstu atbaļstejuse Augšdaugovys nūvoda pošvaļdeiba. 2023. godā dzīsmis “Seši jauni bandinīki” īrokstu nūdrūsynuojuse “Lauska”, īkļaunūt dzīsmi postfolklorys izlasē “Sviests 10”, bet albuma īroksts pabeigts 2024. godā ar Vaļsts kulturkapitala fonda i Augšdaugovys nūvoda pošvaļdeibys atbolstu.

Albuma sagataveišonu publiciešonai i digitalū daīmameibu padarejs kulturys menedžmenta centrys “Lauska”. “Ontona monts” vuoceņa dizainu taisejs Mikus Čavarts, bet juo nūformiejumā izmontuotys Skryndu dzymtys muzeja i Latgolys Kulturviesturis muzeja arhiva fotografejis, kai ari Latvejis Universitatis Literaturys, folklorys i muokslys instituta Latvīšu folklorys kruotivis O. Skryndys arhiva digitalizātī rūkroksti.

“Melngaiļa gruomotā ir atsauce pi Skryndys, ka jis ir cīmuojīs Ondrupinē i cytur pi bruoļu bazneickungu i vuocs folkloru. Sapyns byutu ar itom dzīsmem nūbraukt gostūs iz Ondrupini, Vydsmuižu, Atašīni i cytom vītom, kas saisteitys ar Skryndu,” ar idejom tuoļuokajam pasadola Anna. Taipat folklorys kūpai ir sapyns, ka cytugod varātu itū materialu – informaceju i audio – izdūt ari taustomā veidā.

Ar jaunuo albuma dzīsmem folklorys kūpa “Dyrbyni” itymā nedeļgolā koncertēs ari Latvejis Republikys proklamiešonys godadīnai veļteitajūs koncertūs Augšdaugovys nūvodā – 16. novembrī 14 stuņdēs Sveņtis Tautys nomā, bet 18 stuņdēs Naujinis Kulturys centrā Locikūs.