Laime, rudiņs i īšona karā – jauni albumi i muzyka latgaliski
Rokstu sagataveja: portals lakuga.lv
Latgalīšu kulturys ziņu portals lakuga.lv, sekojūt leidza muzykys jaunumim latgaliski, reizi nu reizis pīduovoj vareibu apsavērt jaunuokūs albumus i izlasis, kurūs sagatavejuši na Latgolys muziki i grupys, bet kurūs vydā ir ari kaida dzīsme latgaliski. Taidi jauni albumi rudinī izguojuši etnogrupai “Ogas”, folklorys kūpai “Vilkači”, apvīneibai “Trio Bille”, taipat dzīsmis latgaliski sovu vītu atrodušys puora jaunuos muzykys izlasēs.
Etnogrupa “Ogas” – “Ok, laime!”
Etnogrupa “Ogas” dybynuota 2017. godā, i itymā rudinī izdūts grupys ūtrais albums “Ok, laime!” (debejis albums “Laikarati” izdūts 2023. godā). Kai intervejā portalam lakuga.lv stuosta grupys daleibnīks Artūrs Uškāns, albumā vydā ir vīnpadsmit dzīšmu, divejis nu jūs ir latgaliski – “Ai, Zuzanna” i “Ok, laime!”, kas ir pajimtys nu Augšdaugovys nūvoda etnografiskuo ansambļa “Vabalis” kruojumu. Albuma nūsaukums ari ir latgaliski. Kai nūruoda Artūrs, ka byutu latvyski, tod vajadzātu saceit “Ak, laime”, bet muziki izalasejuši variantu “Ok, laime!” i pošim pateik, ka tymā pošā laikā jū var izrunuot ari kai “Okay, laime!”. Albumu var nūsaklauseit ITE.
Etnogrupa “Ogas” dorbojās Reigā i juos sastuovā ir profesionali muziki – Igeta Uozuoliņa (Ozoliņa, kūkle/bolss), Ilze Jurjāne-Lapkovska (vejūle/bolss), Agate Paštore (akordeons), Elīna Līce (stabulis/akustiskuo gitara), Artūrs Uškāns (bass/bolss), Kristaps Karps (sytamī instrumenti).
Pošā oktobra golā etnogrupa “Ogas” publiciejuse videoklipu dzīsmei “Ai, Zuzanna”, kurā radzami kadri ar etnografiskū ansambli “Vabalis”.
Trio Bille – “Visu gadu dziesmas krāju”
Jau īprīšk asam stuostejuši par muziķu apvīneibu, kas kotrā godalaikā izdavuse pa dzīsmei. Etnomuzike, grupys “SABIA” dalineica Liene Skrebinska ar muosom Katrīnu i Annu Patrīciju Karelem, kurys ir tradicionaluos muzykys dzīduotuojis i muzykantis nu Īcovys i dorbojās folklorys kūpā “Tarkšķi”, sovulaik īpasazynuse kūpeigūs folklorys pasuokumūs.
Niu muzikis sovu apvīneibu nūsaukušys par “Trio Bille” i izdavušys mozalbumu “Visu gadu dziesmas krāju”, kurā vydā ir pīcys dzīsmis, nu kurūs četruos īsaskaņ i latgalīšu volūda. Vysu minialbumu var nūsaklauseit ITE
Kai portalam lakuga.lv stuosta trio dalineica Anna Patrīcija Karele, vyss suocīs najauši – ar Lienis verseju dzīsmei “Zīmeņa”, kura taiseita školys dorbam. “Tod Liene mums ar muosu Katrīnu pīduovuoja, ka varbyut mes grybātu īraksteit dzīsmi kūpā, bet tūlaik nabeja taidys dūmys, kas vyss puortaps taidā cyklā. Īrakstejom zīmys dzīsmi i piečuok ruodejuos, ka varbyut var kaidu atrast i cytom sezonom. Jaunuokū dorbu – rudiņa dzīsmi – Katrīna i Liene beja īdzīduojušys kaidā nu sovu uorzemu nūtikšonu, melodeju atrode Latvīšu folklorys kruotivis digitalajā arhivā garamantas.lv. Piečuok kūpā atsasēdem i sataisejom sovu aranžeju. Var saceit, ka tai i vysys dzīsmis rodušuos – koč kas atrasts atseviški, saīmam kūpā i dzīsme teik pi myusu aranžejis,” soka Anna Patrīcija. Muzike atsazeist, ka, koč i vysys nadzeivoj kūpā Latvejā, i pi sasatikšonu beja juopīdūmoj, bet par padareitū niu asūt lels gondarejums. Taipat Anna Patrīcija Karele īskicej, ka sadarbeiba turpynuosīs: “Mes suoksim jaunu projektu, kas sauksīs “Svešu zemi staigājot”, kurā apkūpuosim vysaidys pasauļa muzykys dzīsmis, tradicionalū muzyku i apkūpuosim sovā Instagram profilā.”
Folklorys kūpa “Vilkači” – “Ķezbierēs”
Folklorys i senejūs ceiņu kūpa “Vilkači”, kas dybynuota 2000. godā, oktobra vydā izdeve sovu catūrtū studejis albumu “Ķezbierēs”. Albumā vydā 13 dzīšmu, nu kurūs vīna – “Dzeivoj jauna meitiņa” – latgaliski. Dzīsmi, kas pīraksteita Rogovkys pusē, kūpys vadeituojs Edgars Zilberts sovulaik atrads tīpat garamantas.lv. Ideja par jaunū albumu i juo tematiku – jaunu puišu i meitu attīceibom – folklorys kūpai īguojuse pruotā, saprūtūt, ka repertuarā ir daudzi dzīšmu, kas nav tikai par jim īrostū karaveiru temu. “Tai sasprīdem ituos vysys “cytys” dzīsmis, kas pošim pateik, apkūpuot vīnā albumā,” albuma prezentacejā stuosteja kūpys vadeituojs. Vysu albumu var nūsaklauseit ITE.
Vīru kopa “Vilki” – “Dievs līdz’ manim izdienēti”
Izaruod, ka jau pavasari izguojs i garum pasleidiejs veiru kūpys “Vilki” jaunuokais albums “Dievs līdz’ manim izdienēti”, kas cīši aktuals ari itymā vaļsts svātku laikā. Albumā, kurs kūpai jau ir četrpadsmitais, vydā ir 20 dzīšmu, nu kurūs treis īdzīduotys latgaliski. Latvīšu karaveiru dzīšmu albumā “Dievs līdz’ manim izdienēti” kūpa apkūpuojuse tautysdzīsmis, kuru ailēs pīsaukti pūļi, pryuši, dani, krīvi i francūži – dzīsmis, kas saisteitys ar konkretim viesturyskajim periodim, kod karaveiri guojuši vysaiduos armejuos, bejuši vaidūs kai myusu dīnu Latvejis teritorejā, tai i uorpus juos. Veiru kūpa izsver, ka albums attaisa mozuok zynomys kara folklorys puslopys tradicionaluos kulturys izzynuotuojim, ļaun viesturis interesentim pasavērt nu latvīšu karaveiru pusis iz vaidūs īšonu. Albumā vydā ir ari viesturnīka Agra Dzeņa sagataveitī viesturyskī komentari ap albuma dzīšmu sižetim. Vysu albumu var nūsaklauseit ITE.
Native music 19
Jau 19. reizi izguojuse izlase “Native Music”, kas kotru godu dūd vareibu nūsaklauseit, ituos šaļts folk/tradicionaluos/pasauļa muzykys aktualitatis Latvejā. Izlasis izdeviejs ir Latvejis Muzykys informacejis centra muzykys izdevnīceiba “SKANI“ i jei tūp, gatavejūtīs pīsadaleišonai storptautyskajā muzykys forumā “Womex”, kas itūgod oktobrī nūtyka Mančestrā (Lelbritanejā). Vaira par forumu var izzynuot intervejā ar Artūru Uškānu ITE. Izlasē “Native Music 19” šūgod vydā ir 23 skaņdorbi, nu kurūs četri skaņ latgaliski – veiru kūpys “Vilki” dzīsme “Muote soka šyupuodama” (nu albuma “Dievs līdz’ manim izdienēti”), tradicionaluos dzīduošonys grupys “Saucējas” dzīsme “Kiukoj, uoru dzagiuzeite” (nu albuma “Dabā”, vaira par jū ITE), apvīneibys “The Baltic Sisters” verseja latgalīšu dzīduotuojis Domicellys Līpenis dzīsmei “Soka saule rītiedama”, kai ari grupys “Jōra” skaņdorbs “Eima, eima”. Vaira informacejis par izlasi i vysom dzīsmem ITE.
Latvijas Punk/HC izlase Nr. 9
Oktobra golā deveitū reizi izdūta Latvejis Punk/HC muzykys izlase. Juos sastateituojs ir rokgrupys “Inokentijs Mārpls” liders i radejis “Naba” raidejuma “Bitīt Matos” veiduotuojs Raimonds Lagimovs aba Dambis, kurs itū izlašu sereju aizsuocs taiseit 2002. godā. Jaunuokajā izlasē “Latvejis Punk/HC Nr. 9” vydā ir 30 grupu 30 dzīsmis. Sūpluok grupom “All day long”, “Oranžās brīvdienas”, “Inokentijs Mārpls”, “PND”, “Ghettozloba” i cytim izpiļdeituojim izlasē īkļauta ari grupys “Gandreiž 10nīkā” dzīsme “Beha iz kreita”. Leluokuo daļa izlasis dzīšmu īraksteita periodā nu 2022. da 2024. goda, bet ir ari senejuok īskaņuoti dorbi. “Latvejis Punk/HC Nr. 9” interesentim daīmama kai CD, tai kasešu formatūs.
Komentari