Rokstu sagataveja: Laura Spundere, portals lakuga.lv

Vaļsts svātku gaiduos, 15. novembrī, Latgolys Kulturviesturis muzejā (LKM) Rēzeknē tyka atkluota kasgadejuo Latgolys muokslinīku dorbu izstuode “Rudiņs 2024”, ituo gods izstuodis tema – “Leigačys”. Itūgod izstuodē pīsadola 50 autori ar gondreiž 70 dorbim, i tei apsaverama da 31. decembra.

Ka par atskaitis punktu jimt atjaunuotū Latveju, tod Latgolys muokslinīku dorbu izstuode Latgolys Kulturviesturis muzejā kasgadeji nūteik jau nu 1996. goda, tok izstuodis tradicejis aizsuokumi meklejami vēļ padūmu okupacejis laikā. Itūgod izstuode teik reikuota jau 28. reizi piec kuortys. Kai atkluošonā izasaceja LKM direktore Anastasija Strauta, itei izstuode ir dzeiva i piļsātā atpazeistama tradiceja, kas motivej muokslinīkus, piļsietnīkus i piļsātys gostus īsasaisteit i apmeklēt muzeju.

Vīna nu muokslinīku dorbu vārtātuoju beja Latvejis Muokslys akademejis Latgolys filialis vadeituoja Dana Zelča, kura atkluošonā dalejuos sovuos sajiutuos i saceja, ka jū puorsteidzs tys, ka dažaidim muokslinīkim, kuri sovā storpā nav komuniciejuši, bejs vīnuots redziejums – kai dorbu nūsaukumūs, tai ari attāluotajūs elementūs. “Ir puorsteidzūši, ka dažaidim muokslinīkim ir taida vīnojūšū šaļts, sasaiste i dūmys vierzīņs,” tai Dana Zelča.

Vīna nu izstuodis dalineicu, muokslineica Gita Palma, kas ir ari Roberta Mūka muzeja Gaļānūs vadeituoja, izstuodē pīsadola jau trešū godu. “Itūgod izstuodis saturs ir cīši kvalitativs, kai īkuortuojuma, tai ari satura ziņā. Izstuode ir kruosaina, kūša i laikmeteiga, nūteikti īsoku kotram apmeklēt,” tai Gita Palma.

LKM Muokslys nūdalis vadeituoja Inese Dundure, vaicuota par ituo gods izstuodis specifiku, pīzeist, ka itūreiz dorbūs pasaruoda leluoka kruosaineiba. “Ari tī muokslinīki, kuri da šam puorsvorā struoduoja malnbolti voi īturātūs tūņūs, itūreiz sovūs dorbūs īlykuši vaira kruosu. Tok, prūtams, ari malnboltī dorbi i grafika ir vīnreizeigai skaisti.” Ituo gods izstuode apsaveram da 31. decembra.

Taipoš Inese Dundure jau itūšaļt atkluoja “Rudiņa 2025” izstuodis temu, kas byus “Komuļs”. “Daudznūzeimeigs i ītiļpeigs nūsaukums, kurū sevkurs muokslinīks var atrytynuot sovā veidā,” tai Inese Dundure.

Fotogalerejis autore Amanda Anusāne, portals lakuga.lv