Rokstu sagataveja: portals lakuga.lv

Kulturys īsacejumus itai nedeļai sagatavejuse Augšdaugovys nūvoda Kulturys centra “Vārpa” folklorys kūpys “Dyrbyni” vadeituoja Anna Briška. Jei pastreipoj, ka itūnedeļ Daugovpilī turpynojās Latvejis vaļsts svātkim reikuotī sareikuojumi, bet muzikim i eipaši bazneicys muzikim prīškā jūs Dabasu aizbiļdnis – svātuos Cecilejis – pīminis dīna, kas jū eipaši tiks svieteita Aglyunys bazilikā.

Svātuos Cecilejis dīna

Pīktdiņ, 22. novembrī, Romys katuoļu bazneicā atzeimej svātuos Cecilejis dīnu. Jei teik saukta par muziķu aizbiļdni, kurū eipaši gūdynoj bazneicys varganisti, dzīduotuoji, muziki. Jei dzeivovuse Romā 3. godu symtā. Eipaša svātceļuojumu pītura ir Kalista katakombys, kuruos svātuo tykuse apbedeita. 

Novembra mieneša izdavumā “Mieram tuvu” ir izsmeļūšs, ar leidz šam nadzierdātom līceibom, roksts par svātū Cecileju. Eipaši palykuse atmiņā fraze, ka jei protuse pījimt vidis uzspīstus apstuokļus i izīt nu tūs kai uzvarātuoja.

Latgolā daudzuos bazneicuos luktā pi vargaņu ir svātuos Cecilejis obrozi. Ludzys Jaunovys Marijis Dabasūs uzjimšonys Romys katuoļu bazneicā ir obrozs ar eipašu lyugšonu.

Aglyunys bazilikā sastdiņ, 23.novembrī, 12 stuņdēs dīnā nūtiks Svātuo Mise nūdūmā par vysu laiku varganistim, dzīduotuojim i jūs atbaļsteituojim. Muzykali kolpuos vokaluo grupa “Filii Hevae” (vadeituoja Īva Lazdāne). Piec tam – muzykals prīkšnasums.

Svātdiņ, 24.novembrī, iz Aglyunys baziliku dūsīs Ūgris sīvīšu kors “Rasa” (dirigente Aira Birziņa), kurs dzīduos Svātajā Misē 12 stuņdēs i iz reizis piec tam – pateiceibys stuņdē muzykys aizbiļdnei svātajai Cecilejai.

22. novembrī svātuos Cecilejis dīnu svieteis ari Rēzeknē, Suopu Dīvmuotis Romys katuoļu bazneicā.

Benedikta Skryndys atmiņu gruomotys prezentaceja

Pīktdiņ, 22.novembrī, Daugovpilī, Centralajā bibliotekā, 16 stuņdēs nūtiks mariaņu tāva Dmitrija Artjomova sastateituos gruomotys “Benedikts Skrinda – laikmeta liecinīks” attaiseišonys svātki. Vaira par gruomotu var izzynuot ITE.

Ontona Skryndys teiktūs dzīšmu albums

Turpynojūt Skryndu temu – aicynoju klauseitīs Ontona Skryndys teiktuos i salaseituos dzīsmis, kas izdūtys muzykys aļbumā “Ontona monts”. Tū īrakstejuse Augšdaugovys nūvoda folklorys kūpa “Dyrbyni”. Tys ir pyrmais grupys albums i daīmams muzykys straumiešonys platformuos Spotify, Apple music, YouTube, Amazon music. Lai itei muzyka īnas vaira gaišuma i prīcys ari jiusim!