Rokstu sagataveja: portals lakuga.lv

27. novembrī 16.45 stuņdēs sevkuram interesentam byus vareiba tīšsaistē dasaslēgt Katrīnys Kūkuojis lekcejai “Folklorai pa pādom”, kur tiks apsavārts rūkrokstu literaturys puorstuova Andryva Jūrdža (1845–1925) atstuotais montuojums, kas niu ir dalieji digitalizāts, viestej projekta eistynuotuoja Terēze Kūkuoja.

Rēzeknis nūvoda bīdreiba “Rogovkīši” ar Vaļsts kulturkapitala fonda atbolstu itūgod realizējuši projektu “Andryva Jūrdža namaterialuo montuojuma saglobuošona i populariziešona”. Projektā digitalizāti diveji biblioteku kruojumūs sasaglobuojuši Andryva Jūrdža rūkrokstu originali, dūmūt vareibu tūs īpazeit plotuokai auditorejai. 

Latvejis Nacionalajā bibliotekā globojās slovonuokais juo dorbs – 1916. godā saraksteitais “Myužeygays kalinders ar sayminiceybas iwirojumim por wyssu godu”. Da ituo pylnā apjūmā izdūta ituo kalendera transkrybātuo verseja (1999) ar volūdneicys Annys Stafeckys komentarim, kas ir nūzeimeigs īguļdejums manuskripta izpietē, tok tys nasnādz piļneigu prīškstotu par rūkrokstu literaturu, kam izdūts ar drukuotim burtim i tik dažom malnboltom originala karteņom.

Latvejis Universitatis Akademiskajā bibliotekā globojās vīns nu mozuok zynomajim, leidz ar tū ari vysmozuok pieteitajim Andryva Jūrdža rūkrokstim – laiceigu saceriejumu kruojums, kurā vydā ir puorsokys, dzīsmis, lyugšonys i tml.

Projekta eistynuotuoja Terēze Kūkuoja stuosta, ka tīšsaistis lekcejā byus vareiba saleidzynuot kai pyrma gondreiž divejim godu symtim tyka pīraksteiti vysaiduoki nūvāruojumi, kas cytu reizi ir gona aktuali ari myusu dīnuos. “Juosoka gon, ka puorskaiteit Jūrdža tekstus nav vīgls aizdavums, koč ari juo rūkroksts ir gona salosoms. Ir izmontuots vacūs laiku pīroksts, teik ari lītuoti vuordi, kurūs myusu dīnuos vaira naizmontoj, tok itaidu materialu digitalizaceja ir breineiga vareiba pagluobt svareigus materialus nu laika zūba ītekmis,” tai Terēze.

27. novembrī 16.45 stuņdēs tīšsaistis platformā Zoom (saite ITE, īīšonys kods: 844 5977 0053) byus vareiba dasalēgt tīšsaistis lekcejai, kur kūpā ar Katrīnu Kūkuoju varēs īpasazeit ar folklorys materialu kluostu, kas atrūnami itymūs rūkrokstūs. Tok jau niu sevkuram interesentam ir vareiba digitali zamynluodeit divejus digitalizātus Andryva Jūrdža kruojumus – “Myužeigais kalinders” i “Posokys, dzīsmis, lyugšonys 1897”, materiali daīmami ITE.