Rokstu sagataveja: portals lakuga.lv

30. novembrī 16.00 stuņdēs Daugovpiļs Vīneibys nomā folklorys kūpa “Svātra” svieteis sovu 30 godu jubileju ar koncertu “Īsalaižu dzīsmeitēs”. Itūs godu laikā folklorys kūpā īsasaistejuši vaira nakai 80 dalinīku, viestej publiski daīmamuo informaceja.

Folklorys kūpys “Svātra” nūsaukums latgaliski nūzeimej “nūjausma” voi “nūjauta”. Ar sovom dzīduošonys i doncuošonys prasmem “Svātra” prīcynoj skateituojus i klauseituojus jau nu 1994. goda.

Nu folklorys kūpys aizsuokumu tuos vadeituoja ir Sarmeite Teivāne, kura, pasadolūt sovuos sajiutuos, soka, ka “Svātra” ar lelu prīcu gatavej itū koncertu vysim, kam tyva ir latvīšu ideņtitate i tradicejis, vysim, kas bejuši ceļa bīdri itūs godu garumā, i vysim, kas grybātu ar “Svātru” sasatikt pyrmū reizi.

“Koncertā izskanēs tuos dzīsmis i dejis, kas daudzu godu garumā palykušys par kūpys dalinīku mīlesteibys i īdviesmis olūtu. Dažys nu tūs teik izpiļdeitys jau nu pyrmsuokumu, cytys īsavuiceitys pavysam naseņ, tok jau ir naatjamama kolektiva repertuara sastuovdaļa,” stuosta Sarmeite Teivāne.

Jei ari darunoj, ka “Svātrys” darbeibys byuteiba ir nūdzeivuot piec vareibys ciļvieceiguoku myužu. “Mes ticim, ka kūpā saīšona i latvīšu tradiceju ceļšona gūda vītā ir tys, kas paleidz dzeivuot pylnvierteigai i ar cīnu pret sevi i cytim. “Svātrys” izpiļdejuma spāks, syltums i atmosfera ļaus kotram kluotasūšajam izjust tradicionaluos dzīduošonys i deju dzeivuotvareibu, tei byus eistynu svātku sajiuta i kūpā byušona, kas nu jau 30 godus ir myus vīnojūšais spāks,” nūslādz Sarmeite.

Īīšona koncertā – bez moksys.