Rokstu sagataveja: portals lakuga.lv

Folklorys kūpa “Speiga” aicynoj sevkuru interesentu pīsavīnuot sovys skaneiguos darbeibys 25 godu jubilejis svieteišonai 1. decembrī 15.00 stuņdēs Ambeļu kulturys nomā. Kai viestej “Speigys” dalineica Ilze Mežniece, jubilejā da pādejuo doncuotuoja skanēs Dīnavydlatgolys skaistuokuos dzīsmis i ducēs ļusteiguokī daņči.

Pyrma 25 godu Ambeļu školys školuotuoju dybynuotuo kūpa izdzeivuojuse boguotu pīredzi kai pošu organizātūs svātkūs, tai vysaidūs festivalūs i Dzīšmusvātkūs, puordzeivuojuse dybynuotuojis i ilggadejuos vadeituojis Ingrīdys Skutelis aizīšonu myužeibā i grupys transformaceju, kod daļa dalineicu kūpu pamatušys, tok nu mozu, mamom leidza volkuotu bierneņu pamazeņam izauguši leli muzykanti. “Speiga” turpynoj muzicēt, turpynoj svieteit godskuortys, dzīduot Ambeļu i latgalīšu dzīsmis, kai ari aicynuot iz daņčim.

Pyrma jubilejis folklorys kūpa atkluoj tuos vuorda izaceļšonys legendu: “Ambeļu pogostā atsarūn puorsapūruojs azars Speiga, kuruo nūsaukumu pyrma 25 godu aizajēme jaunuo folklorys kūpa. Kolektiva pyrmuo i ilggadejuo vadeituoja Ingrīda Skutele sovā laikā stuosteja, ka, koč i nu azara jau moz palics puori, tuo vydā vēļ speid iudiņa klajumeņš. Folklorys kūpu “Speiga” jei saleidzynuoja ar itū skaidrū iudini pūrā, kam tei godim cauri raudzejuse viļkt nu dzeiļu gaismā seņču tradicejis i tuos saglobuot. Padūmu godūs azara krostā beja īsavīsuse naoficiala izguoztive, pogostā pat īsadzeivuojs teicīņs “tam jau laiks da Speigai”. Tok Ingrīda itam teicīņam īdavuse sovu, cīši dzeiveigu interpretaceju, kura pamozam izspīduse suokuma nycynuojumu – vaca monta skaudzē varūt atrast cīši eipašys lītys, kam nazkodejī lītuotuoji nav vaira saredziejuši vajadzeibu, tok myusu dīnuos, pīmāram, babys skreinei asūt miļzeiga vierteiba.”

Kod runoj ar pogosta ļaudim, tī vīnā bolsā pīzeist, ka Ingrīda muocējuse īsaisteit Ambeļu cylvākus pošdarbeibā i folklorys kūpā. “Kas gon nav bejs “Speigā”? Vysi bārni i lela daļa lelūs – vysi pīsadaleja, dzīdova, doncova, Juoņa dīnā i pogosta svātkūs paleidzēja,” pīzeist Elza Kusiņa, folklorys kūpys ilggadeja dalineica, kas poša na viņ dzīduojuse festivalā “Baltica” i Dzīšmusvātkūs, tok ari sīrus siejuse vysaidom tradiceju nūtikšonom pogostā, peirāgus i maizi capuse Ambeļu tradiceju sātys “Skreine” maizis ceplī. Taišni Ingrīdys prasme īsaisteit bārnus i jaunīšus ir suokys ari niulejūs dalinīku tikšonai “Speigā”.

Itūšaļt kūpā aktivi muzicej 11 dalinīki – Uozuoliņu (Ozoliņu), Mežnieku, Barkovsku saimis i Edvards Putāns. Aija Uozuoliņa, folklorys kūpys “Speigys” vadeituoja niu, pīzeist, ka “Speigys” jaunīšu energeja, rodūšums i gribiešona piec izaugsmis ir golvonuo pošys motivaceja turpynuot dorbu “Speigā”, kam itūšaļt tei dora vysu: “Speiga” dzīd – grazni, siereigi i prīceigi; skaņdej kūkleitis; aizraun daņčūs i spielej “valceri”; sviņ, īt rūtaļuos i rekonstruej 19. godu symtu. Vysjaunuokuo “Speigys” dalineica – desmitgadeiguo Astra – roksta sovā saceriejumā: “”Speiga” ir kai reita rosa, kas saulē laistuos spūdruok par vysboltuokū gaismu, i tys “Speigu” padora saradzamu! “Speigys” jaunīšu bolsi ir plyustūši i zami kai poša zamiudiņa straume!”