Rokstu sagataveja: portals lakuga.lv

Latgolys dīna jau catūrtū godu ir izaveiduojuse par Latgolys Plānuošonys regiona (LPR) goda gola vierīneiguokū nūtikšonu, kas veļteita cylvākresursim, Latgolys regiona uzjiemiejdarbeibys aktiviziešonai i atteisteibai, Latgolys puorstuovnīceibys darbeibys populariziešonai, taipoš ari vītejūs uzjiemieju, izgleiteibys īstuožu pīduovuotūs vareibu i Latgolys kai turysma golamierka prezentiešonai, viestej Latgolys Plānuošonys regiona sagataveituo informaceja.

Itūgod Latgolys dīna nūtiks 4. decembrī i byus radzama tīšraidē 18.00 stuņdēs Latgolys Plānuošonys regiona Facebook lopā. Tīšraide suoksīs nu “Prasmu tierga” 17.00 stuņdēs, sovpus 18 stuņdēs plānuots svineigais pasuokums.

Taipoš nūtikšonu vieļuok varēs nūsavērt ari televizejis kanalā “ReTV” 7. decembrī 22.00 stuņdēs, 8. decembrī 12.00 stuņdēs i 14. decembrī 11.00 stuņdēs.

Pasuokumā pīsadaleis LPR ilggadejī sadarbeibys partneri nu Norvegejis Agdaris pošvaļdeibys, ar kurū kūpā tyka izstruoduota interešu izgleiteibys programa i rūkysgruomota “Es – uzņēmējs!”. Vizeitis laikā jī plānoj ari apmeklēt Latgolys izgleiteibys īstuodis, kab sajimt atgrīzeniskū saiti par programys īvīsšonu i tuos ītekmi iz jaunīšu uzjiemiejdarbeibys prasmu uzalobuošonu.

Svineiguos nūtikšonys laikā tiks gūynuoti LPR Latgolys uzjiemiejdarbeibys centra konkursa “Latgales uzņēmēju gada balva 2024” uzvarātuoji 11 nominacejuos: Goda amatnīks, Goda jaunais turysma pakolpuojums, Goda inovaceja, Goda specialuos ekonomiskuos zonys uzjāmums, Goda remigrants – uzjiemiejs, Goda lauksaiminīks, Goda ražuošonys uzjāmums, Goda gastronomejis uzjāmums, Goda izgleiteibys īstuode dorba tiergam, Goda digitalais liders – uzjiemiejs.

Pasuokuma gaitā byus vareiba ari īpazeit Latgolys jaunūs talantus nu profesionaluos videjuos izgleiteibys, orūdizgleiteibys i augstuokuos izgleiteibys īstuožu, byus Daugovpiļs Vīneibys noma orkestra “Daugavpils Sinfonietta” koncerts, jaunīšu kora “Daugava” vokaluos grupys i solistu Ilonas Bagelis, Daiņa Skuteļa, Makša Krilova, Kristīnys Zahārovys i norvegu muziku Kim Rysstad i Knut Ingolf Brenna muzykalī prīšknasumi. Pasuokumu vadeituoji – Sarmeite Teivāne, Artis Robežnieks, Ieva Johansson i Oskars Bērziņš.

Projekta vadeituoja Sarmeite Teivāne pastreipoj, ka itūgod eipašs uzsvors tiks lykts iz bārnu i jaunīšu izgleiteibys nūzeimi, kab turpynuotu aizsuoktū sadarbeibu ar Latgolys izgleiteibys īstuodem i norvegu partnerim, taišni deļtam tiks organizāts “Prasmu tiergs” i “Talantu ekspress”, kurā pīsadaleis Latgolys izgleiteibys īstuodis.

Pasuokuma organizatori aicynoj sekuot leidza informacejai par Latgolys dīnys 2024 nūtikšonu Latgolys Plānuošonys regiona sātys lopā ITE, i Facebook kontā ITE.