Rokstu sagataveja: Marta Puzāka, portals lakuga.lv

Ar dzīsmem, kuopustu pagataveišonys tradiceju stuostim i apleicejūs sirsneibys izpausmem 25. novembrī Ludzys kulturys nomā pyrmū reizi padūta “Kuopusta bolva”, kuruos mierkis ir gūdynuot tūs Ludzys nūvoda dzeivuotuojus, kas snādz byutysku īguļdejumu nūvoda atteisteibā i sabīdreibys lobā dora vaira, nakai nu jūs prosa. Kūpumā bolvai nomināti ostoni pretendenti – cylvāki, kas dora sovu sirds dorbu i atroduši sovu eistū vītu, par kurū dag acs.

Pyrmuo konkursa nūtikšona ir eipaša, kam saistuos ar Jezupa Soikāna 135. dzymšonys dīnu i 100 godim nu laika, kai jis ir stuojīs Ludzys apriņka prīšksādātuoja omotā. Taišni J. Soikāna daudzpuseiguo personeiba i īguļdejums sabīdreibā kolpuoja par īdviesmi bolvys sataiseišonai.

Golvonuo bolva – kuopusts – simbolizej vīnkuoršeibu, izdzeivuošonys spāku i ciļvieciskumu. Tys ir atguodynuojums par ryupem, daudzsluoņaineibu i demokratiskom vierteibom. Kotrys nu nominantu pastreipoj, ka bez leidzcylvāku atbolsta jī nabyutu darejuši tū, kas vysuvaira pasadūd i īt pi sirds.

Pyrmuo bolvys nominante beja školuotuoja, vīna nu Latgolā zynūšuokūs gidu – Malvīne Loce. Pasasokūt Malvīnis pyulenim, sataiseits Cyblys školys muzejs. Cīši daudzi laika i energejis Malvīne veļtejuse viesturis i vidis izpietei i saglobuošonai.

“Itei nominaceja ir aplīcynuojums tam, ka kūpā ar leidzcylvākim mes varim panuokt pozitivys puormainis i styprynuot myusu sabīdreibys vierteibys. Kab vysod sabīdreibā volda zynuošonu kults, cīns sovā vydā, leidzcīteiba, gribiešona dareit lobu, jo tik tai varim veiduot vidi, kas veicynuos myusu drūseibu i lobkluojeibu Latvejis izaugsmei,” soka Malvīne Loce.

Kai nuokušais nominants tyka dasaceits saiminīks Valfrēds Miezītis, kura saimisteibā apsaverami vysaidu škirņu bolūži. Valfrēds kūpā ar saimi pyrma vaira nakai 30 godu puorsacēle iz sīvys vactāva sātu Leidumnīkūs, kur eistynuojs sovu sapynu – audzēt škirnis bolūžus i duovuot apmaklātuojim īdviesmis stuostus par tū, kai reiz suocēs moza puisāna leluo aizrauteiba. Valfrēdam ir cīši byutyskys saimis atbolsts, deļtuo jī vysod ir placu pi placa.

“Kuopusta bolvys” nominante beja ari varganiste Guna Kise. Jei ir mama, kas sātā vuica sovus treis bārnus, bīdreibys “Ģimenes skolu apvienība” vaļdis lūcekle, īdviesmis seminaru vadeituoja vacuokim bārnu audzynuošonā. Guna ir organizējuse vairuokus vargaņu muzykys labdareibys koncertus, kurūs savuoktī leidzekli kolpuojuši vargaņu atjaunuošonai Ludzys nūvodā. Taipoš ar sovu darbeibu Guna nas kristeiguos vierteibys sabīdreibā.

“Pasuokuma ideja i organiziešona maņ personeigi radeja dziļuoku izpratni i interesi par Jezupu Soikānu i juo stuostu. Daudzys lītys maņ īkryta sirdī, bet vīna nu tūs – Jezupa dāls Juris Soikāns nūsauc sovu bierneibu par “rūžaini skaistu laiku”. Jis sevi skaita par laimis lutekli, jo jam ir bejuši attīceigi apstuokli. Tys, kū mes dorom sovā saimē, vierš uzmaneibu sabīdreibā caur muzyku, runojūt voi dzīžūt. Apstuokļi, kaidūs mes dzeivojam i rodom sovim bārnim, ir izškirūšais, kas jī vāluok byus, kaidys personeibys nu jūs izaugs. I, voi tī byus kaids nuokušais Jezups Soikāns,” soka Guna Kise.

Taipoš bolvu sajēme ari Olga Hodaseviča – ludzuonīte, kas kasdīnā dzeivoj Pīreigā. Jei ir sataisejuse i voda sovu jogys studeju, tok daudzi laika i energejis veļtej veseleibu veicynojūšom aktivitatem ari Ludzā. Voda ekskursejis, nūdarbeibys, nūpierkuse i entuziastiski īkuortoj solu Lelajā Ludzys azarā.

“Kuopusta bolvys 2024” nūslāguma ceremonejā Olga nabeja kluotyn, tok syuteja videosveicīni. “Asu storā par tū, ka myusu nūvodā ir tik daudzi fantastisku, interesantu, aktivu i rodūšu personeibu. Aicynoju jius vysus koč kod gostūs iz jogys solu. Es rodu itū telpu, zemis gabaleņu kūpā ar jums i sevkuru, kurs grib dorbuotīs taidā vierzīnī. Mes rodom kūpā vītū, kas dūd atjaunuošonu, mīru i relaksaceju. Īspiejams, itei vīta latvīšim ruodīs sovpateiga, bet, ka mes vysi tīcamēs piec veseleibys, lobsajiutys i mīreiga pruota, aktiva dzeivsveida, tod jius kotrys atrassit tī koč kū deļ seve, sovys saimis, bārnim,” nūruoda Olga Hodaseviča.

Paraleli nominantu sveikšonai varēja izzynuot stuostus par tradicejom, kas saisteitys ar kuopustim. Ka kuozu trešajā dīnā īdeve kuopustu – tys nūzeimoj, ka ir juoīt iz sātu. Taipoš izskanēja interesanti nūstuosti, pīmāram, ka saimēs kuopustus skuobēja tik tāvs. Pīmynātys ari skuobātu kuopustu receptis.

Taipoš pa vydam beja puors vaicuojumu par Jezupu Soikānu i juo biografeju. Jezups Soikāns beja giustā Pyrmajā pasauļa karā, tok piec atbraukšonys Ludzys apriņkī kuortuoja pīrūbeža vaicuojumus, izgleiteibys sistemu, stypri palelynuoja latgaliski runuojūšu školuotuoju skaitu, izcēle bīdreibys nomu, attaiseja muzeju i izdeve vairuokys gruomotys. Vaicuojums beja – cik godu J. Soikāns beja apriņka prīšknīks? Vysi vīnbaļseigai zynuoja atbiļdi – četrus godus!

Turpynuojūt nominantu sveikšonu, skotivis prīškā izsauce ari “Pelnruškeitis sapynu” kolekcionari Rutu Zviedri. Tārpi, lelis, nūstuosti, augu i kūku pasauļs – tys raksturoj Rutu. Ir daudzi stygu, kur Ruta īsagrīž i pajam leidza gostus i dūmubīdrus. Rutu var satikt skaņu meditacejuos, Lucejis nakts puorsokuos, čaja ceremonejuos i sīvīšu īdviesmis nūmetnē “Esi”. Vysā, kū Ruta dora, ir gabaleņš puorsokys.

“Tod, kod es laseju par “Kuopusta bolvu”, īsmieju. Smīkleigi, es vys laikam nagrybātu taidā pīsadaleit! Bet tod suoču dūmuot dziļuok. Paļdis vysim par taidu ideju, īdviesmi i vareibu padūmuot. Saprotu, ka, nui, es asu kuopusts, partū ka asu dyžan daudzsluoņaina. Kuopusta lopys ir na jau juoplieš nu mane, tok es tuos pīaudzeju. Es navaru byut taida moziņka kuopusta golva, mane ir daudzi. Grybu pasceit vysim miļzeigu paļdis, jo, ka nabyutu jiusu, man nabyutu deļko audzēt tuos lopys,” pastreipoj Ruta Zviedre.

Igors Zabilevskis ir na viņ “Darba un kultūras centra Līdumnieki” dybynuotuojs i Leidumnīku pogosta patriots, tok ari leidumnīks ituo vuorda puornastā nūzeimē. Aiz juo palīk sakūptys vītys, amatnīku darbneicys, Svātuos saimis kapela.. Savīnuojuot ituos, it kai pretejuos attīksmis, tūp Leidumnīku breinumi.

“Paļdis vysim, kas roda, leidzdorbojās, kas pīskota procesus. Grybātūs šudiņ cīši redzēt tūs, kas mani ir pastyumuši. [..] Vysim atguodynuojums ir tys, ka jius kaidu pastumit, pavierzot voi īvielejot, kas ir svareiguokais piec tam? – Leidzdorbuotīs!” soka Igors Zabilevskis.

Taipoš nominantu vydā beja ari Iveta Ladusāne. Ar sovu absolutū ticeibu lobajam, Iveta atrūn cylvākūs jūs skaistuokū dobu. Iveta ir na viņ talanteiga školuotuoja, vosorys nūmetņu vadeituoja, gleznuošonys darbneicu pasnīdzieja pīaugušajim, tok ari īdvasmojūšs cylvāks, kas audziekņus mudynoj atkluot sevi i ruodeit pasauļam. Ar sovu pozitivismu i īdviesmi Iveta padora itū pasauli lobuoku. Jei ir spylgts pīmārs tam, kai vīns cylvāks spiej īdegt vasalu sirds muokslys galereju i radeit naaizmierstamys emocejis.

“Maņ ir vīns kuopusta stuosts, kas nūtyka seņ, 90. godūs, kod dzeivuošona beja cytaida. Munejī audzēja kuopustus, tok mes ar papu dyžan pi tuo struoduojom. Kaidā soltā vokorā mes ar papu ar kuojom guojom iz lauku sātu. Beja skaidri dabasi, daudzi zvaigžņu. Tys ir vierteiguokais breids, kod mes varim byut vīns ar ūtru. Taišni šudiņ munam papam dzymšonys dīna! Paļdis vacuokim i dzymtai!” saceja Iveta.

Sovpus golvonuo “Kuopusta bolva”, kurū taisejuse muokslineica Anda Munkevica, tyka tik vīnam uzvarātuojam. Itūreiz bolva nūdūta prīsteram Jākubam Rodionam Doļam. Nu stuošonuos Ludzys draudzis prāvesta omotā, Rodions daudzi padarejs dīvnoma kulturviesturyskuo montuojuma izpietē i populariziešonā, rūsynuojs vierīneigys izstuodis i koncertus dīvnomā. Niu Rodions atsarūn studeju komandiejumā Romā, deļtuo bolva tyka nūdūta draudzis pāvestam Laurim Kārklim. Tok Rodions taipoš kluotyn asūšajim syuteja video sveicīni nu Romys centraluos stacejis.

“Maņ ir cīši pi sirds saglobuot senejū skaistumu, saglobuot kulturviesturyskū montuojumu. Sirds leiksmoj i dag, ka tū, kū cyti dūmoj jaukt voi nūsvīst molā, vacuos i navajadzeiguos lītys, es skaitu, ka tom juoatgrīž suokūtnejais skaistums. Juoizceļ taidā veidā, lai vysi var redzēt i apbreinuot,” saceja Rodions Doļa.

Pi golvonuos bolvys sajimšonys organizatoru bīdreiba pīduovoj uzvarātuojam 12 mienešu laikā nu bolvys sajimšonys eistynuot ari vīnu sabīdryskū aktivitati ar bīdreibys finansialu atbolstu da 500 eiro.

“Kuopusta bolva” ir veļteita tam, kab veicynuotu sabīdreibys vīnuoteibu, puorvarūt vysaidys paaudžu, tauteibu i redzīņu atškireibys. Tuos golvonais aizdavums ir veicynuot atbiļdeibu par vidi i sabīdreibu, kurā dzeivojam niu i veiduosim iz prīšku. Apbolvuošonys ceremoneju organizēja bīdreiba “Teātris azotē” sadarbeibā ar J. Soikāna Ludzys muokslys školu.

Fotogalereja: “Kuopusta bolvys 2024” apbolvuošonys ceremoneja, foto Amanda Anusāne/portals lakuga.lv