Rokstu sagataveja: portals lakuga.lv

Pi skaiteituoju tics žurnala “A12” decembra/janvara numers i tymā var puorskaiteit intervejis ar Ludzys nūvoda Leidumnīku kūpīnys aktivistu Igoru Zabilevski, gidu i kulturys darbinīku Voldemāru Ivdri, muzeja “Kolnasāta” vadeituoju Intu Deksni i cytys sarunys i stuostus.

Žurnala “A12”, kas ir vīneigais žurnals, kas viestej par Latgolys ļaudim i jūs stuostim, redaktore Ināra Groce ituo numera īvodā soka: “Žurnals “A12” sovā ceļā sateik cylvākus ar stypru mugorkauli, kurī īdvasmoj iz drūsmi – drūsmi pasaceit, drūsmi pīlaist klaidys i ceineitīs, drūsmi mīļuot saimi i sovu vaļsti. Ka esi ar drūsmeigajim, tys daleipst, palīk i spuornoj. Drūsme paruoda ceļu, sapyni tū izgaismoj tymsūs vokorūs i uzmundrynoj bezcereigūs reitūs.”

Žurnala “A12” decembra/janvara numerī skaitit:

• Rūbežys sorgs Igors Zabilevskis stuosta par breiveibys i kūpeibys nūzeimi, rodūt Svātuos saimis kapelu Leidumnīkūs – eipašu vītu Zīmyssvātku gaideišonai i sirdsmīra atjaunuošonai;

• Dzidra Bruzgule nu Bokuonu doluos sovā dzeivis spāka nūslāpumā, kas īdvasmoj napasadūt gryuteibom;

• Gunārs Klaučs – tieļnīks, kurs skaidroj muokslys spieju puorveiduot cylvāka uztveri;

• Inta Deksne i “Kolnasāta” – Fraņča Trasuna īdvasmuota, jei doluos ar stuostu par kulturys montuojuma saglobuošonu i jaunradi Latgolys centrā.

Jaunuokajā žurnalā “A12” vysu rokstu vydā ari portala lakuga.lv redakcejis komandys taiseitī stuosti – viesturis rokstu par Latgolys teatra darbeibu sagatavejuse portala redaktore Laura Melne. Taipat žurnalā puorskaitoma portala redakcejis sagataveituo informaceja par jaunuokajim gruomotu i muzykys īrokstu izdavumim.

Žurnals “A12” ir vareiba jau vaira nakai 10 godus izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturyskūs ceļuojumūs laikā i telpā, kai ari byut atkluojumu i puordzeivuojumu dalinīkim. Žurnals izīt 6 reizis godā. Kab atbaļsteitu žurnala byušonu ari iz prīšku, aicynojam abonēt. Jaunuokū žurnala numeri var nūpierkt (kai digitalā, tai taustomā veidā) ite: a12.lv.