Rokstu sagataveja: portals lakuga.lv

Latgolys kulturtelpā pasaruodejs jauns projekts – “Pazudušū pādu retrospekceja” (PPR), kurs reizē atness kai sešu raidejumu cyklu par Latgolys pīrūbeža apceļuošonu, tai ari Edija Strušela muzykys albumu ar nūsaukumu “(Pi)Rūbeža”. “Pazudušū pādu retrospekcejis” autori ir Ričards Benislavskis i Edijs Strušels, kurūs projektā ir dokumentāts stuosts par Latgolys pīrūbežu nu entuziastisku ceļuotuoju skotu punktu maršruta pūsmūs Leidumnīki–Zylupe–Ezernīki–Indra–Pīdruja, viestej projekta autoru sagataveituo informaceja.

“Projekts ir taps kai cīši nagaideita atsazeišona mīlesteibā pīrūbežam. Mozs i kautreigs īsaklīgšonys raudzejums, kab atguodynuot, kā tī kaids ir, ka pīrūbežā ari vēļ ir homo sapiens, na kontrobandus erectus, ka pīrūbežā ir breineigys bazneicys, kuruos pamatā ir viņ vaci ļauds, tok vaci ļauds ar kaidu sirdi…” tai sovuos sajiutuos doluos vīns nu projekta idejis autoru Ričards Benislavskis.

Projekta autori ituo gods vosorā apstaiguoja Latgolys pīrūbežu, spieļuoja koncertus, pabeja bazneicu Misēs i intervēja vītejūs ļauds. Vyss nūtykušais tyka dokumentāts i piec garu montiešonys stuņžu, godu ilgys viesturis olūtu analiziešonys i maršruta kartiešonys, Ričards i Edijs plotuokai auditorejai pīduovoj pyrmū raidejumu nu sešu raidejumu cykla PPR. Serejuos byus ītvarts stuostejums par vysaiduokim kulturviesturis objektim i cylvākim, kai ari radzami pīrūbežys breineigī dobys skoti, kuri papyldynuoti ar eipaši itam raidejumam saraksteitu albumu “(Pi)Rūbeža”, kurā skaņ Romualda Jermaka originaluo klavīrmuzyka i ari cyti tautā zynomi motivi klavīru izpiļdejumā.

Albumā “(Pi)Rūbeža” ir desmit dzīsmis, kurys rauga paruodeit daudzšķautnainū emoceju gammu, kas rodusēs nūītajā maršrutā – naskaitomi stuosti par tū, kas ir bejs voi turpynoj eksistēt iz pādejīm elpys viļcīnim, tok stuosti ari mejās ar saulis apveitom stygom, kuru stuostu nimoz navar nūdūt tuoļuok. Sakomponātuo muzyka rauga attāluot ainovu, kurys prīškā ceļa guojiejs ir atsataps.

Daudzu albuma aiļu autors ir Raimonds Kuznecovs. Albuma vuoceņš ir taps sadarbeibā ar muokslinīku Mārtiņu Ziedu. Īrokstūs ir pīsadalejuši: Aija Jermaloviča (vokals), Gunta Greisle (vokals), Ričards Benislavskis (vokals i tulkuošona), Una Romāne (flauta), Edijs Strušels (klavīris), muzykys autors i producents – Edijs Gnedovskis studejā GEM.