Rokstu sagataveja: portals lakuga.lv

Izdūta viļānīša Pītera Stafecka gruomota “Dzeive kai vīns jautrys pīdzeivuojums. Smīkleigi stuosti, naparosti atgadejumi i nūvāruojumi nu dzeivis”. Kai informej Stafecku saime, gruomotā apkūpuoti tuos autora Pītera Stafecka pīraksteitī stuosti, kas atspīgeļoj vysaidys sadzeivyskys i humora pīpiļdeitys nūtikšonys, nūvāruojumus nu dzeivis.

Stuostu vydā ir i bierneibys i padūmu armejis laika atminis, i vysaidi humora pylni atgadejumi piečuokūs dzeivis godūs – dorbūs i breivuo laika aktivitatēs, ļaunūt īpazeit laikmatu caur vīna parosta lauku cylvāka pīraksteitajom atmiņom. Stuosti ļaun īpazeit ari pamozam izgaistūšys tradicejis, pīmāram, kai nazkod tyka austi zvejis teikli, kaidys beja piertī īšonys paražys voi ari kai nūtyka cyuku bēris i tyka āsti abāda kuopusti. Itī stuosti dokumentej pīdzeivuotū Viļānu apleicīnē, tai pīfiksejūt vītys, cīmus, sātys, dažu nu kurūs itūšaļt nimoz vaira nav.

Pīteri Stafecki vītejī zyna kai lelu jūkuotuoju. Juo eipašais talants ir svātkūs i kasdīnā pamaneit naparostū, komiskū, kas cytam pasleid garum, i aizrauteigūs stuostūs par tū paviesteit cytim. Pītera stuostnīka talantu zyna vysi tyvuokī rodi, draugi, kolegi i sābri. Nu tī tykuši pīraksteiti i ar saimis paleigu izdūti gruomotā, kas ir puorsteigums pošam autoram, kuram itūgod palīk 70 godu i kurs nikod dzeivē nabeja īsadūmuojs par tū, ka juo pīroksti koč kod varātu tikt izdūti gruomotā. Kai roksta pats autors: “Cylvākam ir tendence iz kruošonu. Vacūs laiku monetys, markys, buteļu korkus, naudu. Maņ pateik kruot jūceigus gadejumus no sovys raibuos dzeivis. Pi reizis mieginuošu atguoduot šū tū nu sovys dzymtys viesturis.”

Gruomotu autors rakstejs latgalīšu volūdā, tai ari tei izdūta, kab saglobuotu stuostu autentiskumu, kam tei ir volūda, kurā dūmoj i runoj pats autors i kurā pīdzeivuots vyss pīraksteitais. Saimis motivaceja, izdūdūt gruomotu, ir īdrūsynuot ari cytus cylvākus dokumentēt pīradzātū, pīdzeivuotū, tai īmyužynojūt i sova laika tradicejis, nūtikšonys, i ari vītys, kab tuos napagaistu jaunajom paaudzem.

Gruomotys atkluošonys svātki byus 14.decembrī 13.00 stuņdēs Viļānu piļsātys bibliotekā (Kulturys laukums 2, Viļāni).

Gruomotys redaktore ir Līga Stafecka, latgalīšu volūdys redaktore – Laura Melne. Gruomota radeita ar Rēzeknis nūvoda pošvaļdeibys leidzfinansiejumu. Tei skaiteituojim byus daīmama Viļānu piļsātys bibliotekā i Latvejis Nacionalajā bibliotekā.