Rokstu sagataveja: portals lakuga.lv

Itūnedeļ ar kulturys īsacejumim portalā lakuga.lv pasadola Preiļu nūvoda sabīdryskūs attīceibu specialiste Ilze Piskunova. Jei ir cīši aktiva sabīdryskajā dzeivē, taipoš daudzi godu veļtejuse ari dorbam kulturā. Kasdīnā dzeivoj Preiļu nūvoda Rībeņūs, deļtuo itūreiz īsaceituos aktivitatis ir na viņ Preiļu piļsātā, tok ari nūvoda apleicīnē.

Par sevi Ilze soka: “Piec byuteibys asu straujis dobys, pateik izaicynuot kai sevi, tai apleicejūs. Vysod raugu izdūmuot kū inovativu, golvonais paspēt “byut vītā i laikā”. Piec desmit pavadeitu godu namiteigā kulturys vyrpulī nu jau kaidu šaļti dorbojūs sabīdryskūs attīceibu jūmā. Dzeivis rytmys ir cīši straujs, tok itys ir laiks, kod juoīelpoj dziļuok i, iz kaidu šaļti aizturūt elpu, juonūviertej vyss skaistais, kas mums ir apleik.”

Laiks saimis byušonai kūpā

Maņ ir divi breineigi puikys, kurim ir juoveļtej laiks – duorguokais, kas mums pīdar. Deļtuo kūpā ar veiru itamā pīktdīnē, 6. decembrī, dūsimēs iz “Iedvesmas semināru vecākiem” Stabuļnīku kulturys nomā, kab īsadvasmuotu i vēļ vaira apsazynuotu i nūvārtātu mīlesteibys lūmu saimē.

Kinu burveiba svātku gaideišonys laikā

Īsoku papyldynuot svātku gaideišonys sajiutu ar kinu burveibys paleidzeibu! Koč ir ītūšaļt jaunuokuos i spūžuokuos kinys ir daīmamys viņ puors klikšku attuolumā, byutu interesanti nūsavērt vītejuos kinys, kas naatstuos vīnaldzeigus! Kasdīnā dzeivoju Rībeņūs, deļtuo vysod raugom atbaļsteit vītejuos kūpīnys aktivitatis. Taišni itymā nedeļgolā, 7. decembrī, Rībeņu MJIC “Pakāpieni” varēs nūsavērt Vara Braslys kina “Ziemassvētku jampadracis”. Īspiejams, uzspielēsim ari golda spēlis i īdzersim čaja kūpā ar myusu foršajim jaunīšim.

Leluos eglis īdegšona Preiļūs

Sovpus svātdiņ Preiļu piļsātā īdegsim Lelū egli. Tī gon maņ pošai vaira vaļdeis dorba atmosfera, kam video kamerā byus juonūgiun eipašuo eglis īsamirdziešonys šaļts! Byus skaisti!

Breinumu laiks ir suocīs!