Rokstu sagataveja: Marta Puzāka, portals lakuga.lv

Rihards Zeiļa ir latgalīts, kura kontā ir apceļuotys 33 vaļsts, i desmit nu tūs jis ir dzeivuojs vaira nakai treis mienešus. Taišni uorzemēs ar sovu e-komercejis veikalu suocēs Riharda ceļš digitalajā pasaulī, tok niu jam ir sova marketinga škola kai latvīšu, tai uorzemu klientim. Desmit godu laikā Rihards ir menedžiejs naskaitomys reklamys, vadejs marketinga kursus, kai ari itūšaļt ir pasnīdziejs Reigys Biznesa školā i RISEBA. Saruna ar Rihardu par juo pasauļa pīredzi, karjerys ceļu i teņdencem digitalajā marketingā.

Pastuosti, nu kurīnis tu esi i kur tevi aizvaduši dzeivis celi?

Asu dzims Kruoslovā, tīpat kur muns tāvs. Dzeivuojūs pa Izvoltu, tok asu audzs Rēzeknē. Vuicejūs Rēzeknis vaļsts pūļu gimnazejā, kur struodoj muna mama. Tod suocēs studejis Reigā. Vuicejūs Biznesa augstškolā “Turība” par juristu. Nūsavuiceju vīnu godu i saprotu, ka kvalitate voi leimiņs maņ tī napateik. Aizguoju paceli iz Latvejis Universitati, kur vuicejūs storptautyskū ekonomiku – ari saprotu, ka leimiņs vys vēļ ir dīzgon švaks. Saprotu, ka otkon nagrybu maineit školu. Tī nūsavuiceju četrus godus. Jau studeju laikā saprotu, ka cīši daudzi naīgiustu nu itūs studeju. Tod suoču braukuot Erasmus+ apmainis programuos. Kai studentam maņ daudzi naudys nabeja, i es saprotu, ka tys ir lobs veids, kai nūpeļneit iztyku. Tu ceļoj, bet tev par tū vēļ ari moksoj.

Tai es suoču ceļuot. Eistineibā jau “Turībā” beju programā “Work and travel” Havaju soluos. Tys beja muns dzeivis mainis punkts, kur saprotu, ka ir forši byut uorzemēs, saulē i pīdzeivuojumūs. Tys maņ deve dziņu i motivaceju, ka es tū varu dareit ari cytur. Tod es atrodu cytus Erasmus+ projektus. Ka nasamoldu, asu bejs pīcūs projektūs – Taizemē, Stambulā Turcejā, Spānejā Valensejā, Portugalē Lisabonā. Vuicejūs ari Dānejā divejus godus multimedeju dizainu. I nu Dānejis Erasmusā atbrauču iz Latveju. (Smejās.)

Byudams Spānejā, saprotu, ka grybu turpynuot taidu dzeivis veidu. Saprotu, ka vajag meklēt koč kū, kai es varu peļneit naudu tīšsaistē. Asūt Spānejā, suoču interesētīs dažaidūs forumūs, laseit rokstus, vērtīs video par tū, kai cylvāki pīsapeļnej internetā. Tod es atrodu “dropshipping” (e-komercejis biznesa modeļs, kur puordevieja puordūtuos precis klientam pīguodoj sadarbeibys partneri – M.P.) – tai tys saucēs tymā laikā. Sataiseju sev e-komercejis veikalu i puorsyuteju lītys, kurūs maņ pošam nabeja, amerikanim. (Smejās.) Syuteju nu Kīnys Aliexpress. Tys aizguoja, tok pyrma tuo beju tik daudzi vysaidus projektus raudzejs taiseit. Tod suoču meklēt veidus, kai varu dabuot vaira piercieju, kai varu reklamēt produktus. Atrodu taidu lītu kai Facebook reklamys. Suoču vuiceitīs i, prūtams, palelynuoju apgrūzejumu, pīauga klienti. Kod suoču studēt Dānejā, tod puordevu sovu veikalu i otkon beju students. Mani nūolguoja uzjiemiejs, kurs taišni meklēja, kas muok taiseit Facebook reklamys. Maņ jau beja pīredze ar tū, pajēme dorbā. Tok jū nūolguoja Apvīnuotūs Naceju organizaceja (ANO), i jis izdūmoja, ka tei ir loba ideja, ka es sataiseitu kursu ANO. Taiseju programu puori par 100 frīlanceru nu taidu vaļstu kai Keneja, Gambeja, Palestina i cytom. Tai suocēs muns apvuiceibu ceļs, kur nūdevu sovys zynuošonys tuoļuok.

Tod atsagrīžu Latvejā, kur ari pavysam najaušai tyku Latvejis Digitalūs ekspertu bīdreibā, kur ari pasnādzu Facebook kursus. Tys beja ceļš, kai tyku da pošam sovys agenturys – marketingaskola.lv. Byus jau četri godi. Tagad jau struodoju ar klientim, paleidzom i Latvejis, i uorzemu uzjiemiejim pīsaisteit klientus, veicynuot apgrūzejumu. Izmontojam dažaidus kanalus. Četrus godus pasnādzu marketingu ari Reigys Biznesa školā.

Tik boguota uorzemu pīredze! Cik niu kūpumā vaļstu ir tovā kontā?

Pyrma goda skaiteju, tuos varātu byut 33 vaļsts. Desmit nu tūs asu dzeivuojs ilguok par treis mienešim, jo es puorsovā zīmoju uorzemēs. Latvejā ir solts, bīži slymoju rudiņūs, zīmuos, i es lobuok jiutūs zam paļmu, struodojūt attuolynuotai. Tuos izmoksys realistiski ir voi nu tikpat augstys kai Latvejā, voi pat zamuokys. Var ilgtermiņā ītaupeit naudu par daudzi augstuoku dzeivis kvalitati. Bīžuok braukoju iz Āzeju, Latiņameriku.

Kū tev ir davuse Erasmus+ pīredze? Kaids byutu tovs īsacejums jaunīšim, kas grib tū izmontuot?

Vysus itūs godus asu dorbuojīs piec taidys filozofejis – ka tu nakuop uorā nu sovys komforta zonys, tu naatsateisti. Prūtams, bīži ir baile, ir nadrūseiba, bet ka tu vysu laiku paliksi sovā burbulī i napīredziesi jaunys lītys, tu ari paliksi taids pats, ar taidom pošom zynuošonom.

Munā redzīnī tys paver tovu redzislūku i skatejumu. Tik daudzi jaunys pīredzis, skatejumu, cylvāku, kulturu i vareibu. Kaidys īspiejis ir pasaulī, kai cylvāki pavoda sovu laiku, jauni hobeji, biznesa partneri. Maņ vys vēļ ir draugi, ar kurim es sasarokstu i sasateiku. Ari taidi poši kai es – digitalī ceļuotuoji. Maņ tagad ir gryuši īsadūmot, kai byutu, ka es nabyutu nikur aizbraucs.

Kai tu tyki pi tuo, ka gribi struoduot i veiduot agenturu taišni Latvejā?

Ar digitalū marketingu tu vari nūsadorbuot sevkurā vītā. Maņ ir klienti kai Latvejā, tai uorzemēs. Ka tu gribi izveiduot kaidu produktu, pakolpuojumu, teoreju voi biznesa modeli, digitalu voi fizisku, tod Latveja ir cīši loba vīta, kur tū var testēt. Ite ir moz cylvāku, leidz ar tū ari konkurence nav cīši lela daudzuos sferuos, eipaši digitalajā marketingā i reklamuos. Tod, kod tu esi tū pīruodejs Latvejis tiergā (vysudreižuok kai testam tys ari izmoksuos lātuok), tod tu vari īt iz uorvaļstim.

Par marketinga kursim – tai kai es tū jau dareju, tod dūmuoju, deļkuo lai es naiztaisu kursu latvīšu volūdā? Es tū izdareju, jo uorzemēs ir ari pylns ar marketinga kursim. Tī konkurence ir cīši lela, tok Latvejā taida nav. Ruodīs, tī beja vīni nu pyrmūs digitalūs kursu.

Kas puorsvorā izmontoj tovys zynuošonys?

Puorsvorā tī ir marketinga specialisti, kuri grib apgiut jaunus kanalus. Tod ir socialūs medeju menedžeri, kuri menedžej kontus i grib īsavuiceit papyldu kai reklamys taiseit, kai puordūt sovu reklamu. Dažreiz tī ir mozu uzjāmumu vadeituoji. Cylvāki ar projektim. Tūpūšī frīlanceri. Struodoju ari ar praktikantim. Iz vīnu vakanci pīsasoka 30 cylvāku. Tei ir vīnkuorša prakse, tys pat nav dorbs.

Kaidom rakstura eipašeibom, spiejom voi prasmem ir juopīmeit cylvākam, kab jis varātu veiksmeigai atsateisteit marketinga i reklamys nūzarē?

Juobyut kreativitatei, apjiemeibai, pošiniciativai. Spiejai vuiceitīs. Digitalajā marketingā ir cīši daudzi nūvierzīņu, kur tu vari īt i kū tu vari dareit. Pīmāram, SEO (nu angļu vol. Search Engine Optimisation) vysod byus cīši nūdereigs. Cīši strauji atsateistej ari organiskais marketinga saturs socialajūs medejūs. Eipaši niu, kod ir TikToks i Instagram reels. Tagad var vuiceitīs ari video satura veiduošonu i fokusētīs taišni iz itūs platformu, jo tuos aug i ir cīši pīpraseiti organiskuo marketinga cylvāki, kuri spiej sataiseit kvalitativus tiktokus i reelus. Tūs vierzīņu ir cīši daudzi – copywriting, kas ir reklamys tekstu izveide, taipoš ari grafiskais dizains.

Voi leidz ar myusu dīnu straujū dzeivis rytmu, ari digitalajā marketingā/reklamys sferā algoritmi ir cīši maineigi?

Tai ir. Platformys, vide i tehnologejis mainuos. Cīši bīži cylvākim, kuri īgulda daudzi laika vīnā platformā, beiguos tys vaira var nastruoduot. Pasamaina algorytmys i juosavuica nu jauna. Eipaši digitalajā marketingā ir cīši juosekoj leidza, tam, kas mainuos. Juosekoj jaunumim, kas struodoj i nastruodoj. Juosavuica. Tagad, ruodīs, muoksleigajam intelektam ir taids izruovīņs. Es tū cīši bīži izmontoju kasdīnā. Tys ir pacieļs munu produktivitati, tok es radzu ari ryskus. Tagad ir gryuši dabuot studentu dorbus, jo tūs aizstoj ChatGPT. Tod leluoks pīprasejums ir piec ekspertu, profesionaļu. Asu dzierdiejs, ka uorvalstīs ir gryuši tagad studentim dabuot dorbu.

Kas beja tovi personeigī atslāga momenti, kas paleidzēja izasist tiergā?

Es nazynu, cik augstu asu. (Smejās.) Es dzeivoju teiri labi. Tys, kas mani vysod ir beidejs iz prīšku, ir vysu laiku saceit: “Nui!” Ka pat es nazynu, kai es tū izdareišu, voi byušu spiejeigs, es vysu laiku pīkreitu. Tu tik piec tam suoc dūmuot, kai tū izdareisi. Tod vaira nav izvielis, ir juoteik golā. Ir tī periodi, kod raugi saprast, vuicīs i raugi realizēt projektu. Kod tū izdori, pasaruoda vēļ divejis cytys jaunys vareibys. Verīs nuokušūs projektus. Par pasnīgšonu augstškolā – par 80 % dūmuoju, ka nā, kū ta es tī pasnīgšu, bet gols golā pasceju “nui”. Izveiduoju kursu i pasnādzu jau četrus godus.

Kas myusu dīnuos ir loba reklama?

Taipat kai vysod – tev sovu produktu vajag pozicionēt kai atslāgu iz kaida cylvāka problemu voi gribiešonu. Ka tu ar sovu produktu voi pakolpuojumu vari atrysynuot kaida cylvāka suopi voi padareit juo dzeivi lobuoku, tod pozicionej reklamu caur taidu prizmu.

Ūtrys ir reklamys pasnīgšonys veids – tys ir video formats voi grafiskais dizains. Jam ari juobyut labi izstruoduotam. Dūmoju, ka vīnkuoršeiba vysod struodoj lobuok, eipaši lātuokim produktim. Uzsvors na jau iz produkta, bet iz juo atrysynuojumu. Tys vysod ir struoduojs lobuok iz psihologeju, i dūmoju, ka tai ari turpynuos struoduot.

Myusu dīnu cylvākus niulejā digitalajā vyrpulī ir daudzi gryušuok uzrunuot.

Kod es veidoju reklamys, vysod izpieteju mierkauditorejis. Vysod ir juosaprūt, kas ir tys cylvāks – gola klients. Kurs cylvāks vysuvaira īgiutu nu produkta. Tod tu sovu ziņuojumu i pīduovuojumu veidoj taišni tam cylvākam, kurū tu gribi sasnēgt. Saprūti, kai jī runoj, kaidu volūdu izmontoj.

Muna pamatnūsadorbuošona ir taišni reklamu veiduošona. Tei taišni ir muna specializaceja. Maņ napaseņ beja dūma, ka es varātu sataiseit reklamu latgaliski i palaist Latgolā, kab pīduovuotu latgalīšu uzjāmumim ari taiseit reklamys. Ruodīs, ka naasu redziejs nivīnu agenturu Latgolā, kura koč kū taidu dareitu.

Kai tod varātu atteisteit reklamys tiergu i digitalū marketingu Latgolā?

Tys ir kūks ar divejim golim. Parkū tys tiergs nav atteisteits? Vysudreižuok, ka, pa pyrmam, nav uzjāmumu. Tī nav tik atteisteiti i nazyna, ka tai var reklamētīs. Naapsver taidu dūmu. Ūtrys, tys tiergs ir mozs. Cik Latgolā runoj latgaliski? 80-90 tyukstūšys cylvāku? Tei ir moza mierkauditoreja, kū tu vari sasnēgt ar reklamom. Tys ari vysudreižuok nūzeimoj tū, ka nav ari konkurencis.

Dūmoju ka tys teiri labi varātu nūstruoduot Latgolā, ka tovam uzjāmumam sovā ziņā byutu monopols – tu varātu baļsteitīs tik iz latgalīšu auditoreju reklamu ziņā. Jo tū nivīns nadora. Daudzim uzjāmumim ir vareiba fokusētīs iz Latgolys tiergu, eipaši, ka tī ir mozi. Iztestēt reklamys Latgolā, taidā veidā dabojūt pyrmū budžetu, izaplotūt tuoļuok Latvejis tiergā. Izmontuot tū kai taidu taidu testa suokumpunktu, jo izmoksys reklamom nav lelys. Ar puors symtim mienesī var dīzgon daudzi sasnēgt.

Vierteiguokais īsacejums cylvākam, kurs meklej sevi marketinga jūmā? Ar kū suokt?

Juosaprūt, kurū nu marketinga jūmu gribi vuiceitīs. Marketings ir cīši plošs. Ka esi kreativs, tod tys varātu byut organiskais marketings socialajūs teiklūs. Ka esi vaira rokstūšs, tod tys varātu copywriting, ka esi vaira analitiskys cylvāks, tod tuos varātu byut Google reklamys. Juosaprūt sovys stypruos pusis.

Kaidys paredzi marketinga tendeņcis digitalajā vidē iz prīšku?

Video saturs turpynuos augt, eisuos formys it eipaši. Tiktoks i Instagram naapsastuos, tok ari YouTube suoc palikt par spieceigu kanalu. Pat ar mozim skatejumim var dabuot kvalitativus klientus, ka tī veidoj kvalitativu saturu. Muoksleigais intelekts īt īškā procesūs, satura veiduošonā, optimizacejā. Cyta storpā, tikū ari TikTok palaide reklamys. Īprīšk tū navarēja dareit.

---