Rokstu sagataveja: portals lakuga.lv

Catūrtdiņ, 5. decembrī, 19 stuņdēs Daugovpilī nūteik konkursa “Latgolys prozys skaitejumi 2024” nūslāguma nūtikšona, kurai kluotyn iz vītys Daugovpiļs Vīneibys nomā voi tīšraidē ITE leidza sekuot var kotrys grybātuojs.

Lai veicynuotu literarū procesu Latgolā i latgaliski raksteitūs tekstu radeišonu Latvejā, jau pīktū reizi latgalīšu kulturys kusteiba “Volūda” (bīdreiba “LgSC”) izsludynuoja konkursu “Latgolys prozys skaitejumi”. Konkursā beja aicynuoti pīsadaleit vysa vacuma Latgolys kulturtelpai pīdareigi autori, kurī roksta prozu.

Itūgod tyka sajimti 19 vysaidu autoru dorbs kai latvīšu literarajā, tai latgalīšu rokstu volūdā. Īsyuteitūs dorbus viertēja žureja, kurā beja literaturzynuotnīks Valentins Lukaševičs, konkursa “Latgolys prozys skaitejumi” pārnejuo gods uzvarātuoja, literaturzynuotneica i rakstneica Ilze Sperga, gruomotu blogere Inga Gedžūne, literaturzynuotneica, rakstneica Elīna Kokareviča i žurnaliste Maruta Latkovska.

Ituo gods konkursā par lobuokajim atzeiti latgaliskuos literaturys laukā kai jau labi zynomu, tai i vēļ nacik zynomu autoru – Annelis Slišānis, Ingys Kaļvys-Mininys, Ingys Mastinis, Laurys Strodis, Lilijis Limanis, Sarmītis Trūpys i Vitys Briškys – prozys dorbi. Sovus dorbu konkursa nūslāguma pasuokumā skaiteis: Annele Slišāne, Inga Kaļva-Minina, Inga Mastiņa, Laura Strode, Lilija Limane i Vita Briška. Nūtikšonu vadeis aktrise Kristīne Veinšteina, bet muzykali vokoru papyldynuos Amanda Lapa. Lobuokūs konkursa dorbus piečuok varēs puorskaiteit portalā lakuga.lv, bet konkursa uzvarātuojs svātdiņ, 8. decembrī, 18 stuņdēs pīsadaleis literaturys festivala “Prozas lasījumi” nūslāguma pasuokumā Reigā, Tallinys kvartalā (Tallinys īlā 10). Vaira par festivalu “Prozas lasījumi” ITE.

Konkursu “Latgolys prozys skaitejumi 2024” organizej latgalīšu kulturys kusteiba “Volūda” (bīdreiba “LgSC), jū atbolsta literaturys festivals “Prozas lasījumi 2024” (Latvejis Rakstnīku savīneiba), Vaļsts kulturkapitala fonds, latgalīšu kulturys ziņu portals lakuga.lv i žurnals “Domuzīme”.