Rokstu sagataveja: portals lakuga.lv

15. decembrī nu 13.00 da 17.00 stuņžu Ludzys nūvoda Leidumnīku bīdreibys Lelajā zālē Latgalīšu kulturys bīdreiba sadarbeibā ar bīdreibu “Leidumnīki” i ar Aizsardzeibys ministrejis atbolstu reikoj izgleitojūšuo sarunu šova “Paskaidroj maņ pīrūbežu” nūslāguma pasuokumu, kurā pasadaleis pīredzē par dabuotajim datim i situaceju Kruoslovys i Ludzys nūvodu pīrūbežā, informej bīdreibys vadeituoja Ilga Šuplinska.

Septeņus nedeļgolus treis tāli – Vieju Rozale, Klāvu Tekļa i Plotku Jurs – ar humora elementim (anekdoti, puorprotumu skečs, hiperbolys i tt.), muzykys i multimedeju paleidzeibu runuoja ar vītejom kūpīnom par vysaidom aktualom lītom: dezinformaceju, problemys definiešonys i rysynuošonys īspiejom, gataveibu krizei i sabīdreibys nūtureibu. Ari tom temom, kas reši teik pamaneitys regiona voi vaļsts leiminī saisteibā ar pīrūbežu: kas nūsoka konkretuos vītys pīviļceibu, ar kū vītejī lapnojās; kaidys problemys jūs uztrauc i kai tuos varātu rysynuot; kaidus informacejis olūtus jī izmontoj, kai izviertej informaceju i kū itymūs parodumūs var i vajag maineit.

Itūšaļt ir nūtykušys sarunys 14 nu 15 pogostim, socialajūs medejūs bīdreiba regulari publicējuse eisys reportažys nu pogostim i suokuse apkūpuot “Problemu barometrus”, kai ari dabuojuse spylgtu, tai pošā laikā absoluti naperspektivu dzeivis kasdīnys ainu pīrūbežā. Projekta eistynuotuoji grib pasadaleit sovā pīredzē i tuoluokai rysynuošonai, sabīdreibys viereibys kuopynuošonai nūdūt pogostu problemys, kas dalieji ir rysynomys pošvaļdeibys, dalieji regionaluos politikys ītvorūs vaļstī kūpumā. Tai kai vīns nu pamatvaicuojumu ir bejs drūseibys vaicuojums, tod iz nūslāguma pasuocīni aicynuoti Aizsardzeibys ministrejis puorstuovi stuosteit par prioritarajim pasuokumim itamā jūmā taišni Latgolā, Vaļsts Guņsdzieseibys i gluobšonys dīnasta puorstuovi par jūmom, kas skar dzeivuotuoju gataveibu krizei, kai ari CERT.lv puorstuovi par kiberdrūseibu cylvāka kasdīnā.

Nūslāguma pasuokumā byus treis pamatdalis. Pyrmajā byus stuostejums par aktualitatem i atbiļdis iz vaicuojumim nu atbiļdeigūs organizaceju pusis. Ūtrajā – diskuseja “Kai panuokt, ka sevkurs sabīdreibys puorstuovs ir informāts i kai styprynuot sabīdreibys nūtureibu”, pīsadolūt Kruoslovys i Ludzys sadarbeibys teritorejis Civiluos aizsardzeibys komiseju puorstuovim, kai ari 3. Latgolys brigadis atbiļdeibys teritorejis bataļjonim. Vīns nu pasuokuma pamatmierku – izveiduot saikni storp CAK i NVO, kūpīnys puorstuovim, kas sabrauks iz Leidumnīkim nu 15 pogostu. Trešajā daļā byus vareiba tikt par izgleitojūšuo sarunu šova daleibnīku i pasaklauseit latgalīšu muzyku.

Projekts taps ar Latvejis Republikys Aizsardzeibys ministrejis projektu konkursa “Atbolsts Latgolys informativuos telpys styprynuošonai” finansiejumu.