Rokstu sagataveja: portals lakuga.lv

14. decembrī 14.00 stuņdēs Latvejis Nacionaluos bibliotekys 8. stuova skaiteitovā byus vareiba satikt i runuot ar diveju projektu puorstuovim, kas prezentēs pilotverseju latgalīšu volūdys tezauram i pīminis i atkluošmu gruomotu “Vitolds Valeiņs: personeiba i dorbi”, kai ari sasatikt ar profesori Lideju Leikumu juos 70. dzimšonys dīnā, informej pasuokuma koordinatore Ilga Šuplinska.

Latgalīšu volūdys tezaurs (LTG T) ir īcarāts kai elektroniska skaidrojūša i sinonimu vuordineica, kam ir treis pamataizdavumi. Pa pyrmam, dokumentēt latgalīšu leksiku vysā juos boguoteibā, vīnā vītā apkūpojūt datus nu leluokūs 20. i 21. godu symta drukuotūs i elektroniskūs olūtu. Pa ūtram, saglobuot i atteisteit latgalīšu rokstu volūdu, mudynuot paplotynuot tuos lītuojuma jūmys. LTG T byus kai paleigs sevkuram, kas pietej, roksta ci skaita latgalīšu tekstus, kas vuicuos ci vuica latgalīšu volūdu i lītoj jū rakstiski darejumu sferā i socialajūs teiklūs. Pa trešam, tys ir vīns no digitalūs reiku, kas nūdrūsynoj modernu volūdys lītuojumu i atteisteibu.

Projekts īsuokts 2022. goda izskaņā i itamā šaļtī teik atkluota lītuotuojam juo pilotverseja, kab pasavārtu, cik lels ir pīprasejums, kai lītuotuojs tū viertej, kai apkūpuot informaceju piec īspiejis lītuotuojam draudzeigā veidā i napagaisynuot zynuotnyskumu. Vuordineicā tyka īkļauti vuordi, kas atlaseiti nu Myusu dīnu latgalīšu tekstu korpusa (MuLa 2022), nūsokūt bīžuok lītuotūs i nu latvīšu literaruos volūdys atškireigūs vuordus, stabilus vuordu savīnuojumus, tymā skaitā frazeologismus. Sevkurs škierkļa vuords ir puorbaudeits primarajūs olūtūs. Veidojūt škierkļus ir bejs daudz naskaidreibu. Pilotversejis attaiseišona lītuotuojam ļaus dreižuok vierzeitīs iz piļneiguoku vuordineicu, atbiļdēt iz daudzim vēļ naatbiļdātim vaicuojumim. LTG T veidoj Rēzeknis Tehnologeju akademijis pietnīki sadarbeibā ar LU Muoksleiguo intelekta laboratorejis puorstuovim.

Pīminis i atkluošmu gruomotu “Vitolds Valeiņs: personeiba i dorbi” izdavuse Latgalīšu kulturys bīdreiba. 14. decembrī 15.00 stuņdēs varēs sasatikt ar projekta dorba grupu – profesori Lideju Leikumu, V. Valeiņa mozmeitu Teiku Lapsu i Ilgu Šuplinsku, taipoš satikt cylvākus, kas paleidziejuši gruomotys saturiskajā voi finansialajā tapšonā.

Dorbs pi gruomotys ritējs vysu godu, tok golā beja gryuteibys tū nūslēgt: beja daudz materiala, vēļ vaira komentaru i biļžu, kū gribējuos īlikt gruomotā par vīnu nu izcyluokūs literaturzynuotnyskuos i kritiskuos dūmys veiduotuojim — Vitoldu Valeini. Gruomotys skaiteituoju lūku nūteikti paplotynuos tys, ka tamā ir puorstuovāti vysaidi žanri (profesora i juo laikabīdru atminis, laikabīdru viestulis i profesora i juo kuņdzis liriskuo sarakste, V. Valeiņa dzeja i anekdotu kūpa, kū vuocs pats profesors; piļneiga juo dorbu bibliografeja), kai ari fakts, ka leluokuo daļa tekstu ir pyrmpubliciejums.

Pasuokuma gaitā byus vareiba apsavērt jaunūs izdavumus, puorrunuot latgalistikys aktualitatis, pavaicuot profesorei L. Leikumai par juos lūmu i doromajim dorbim latgalistikā.