Rokstu sagataveja: portals lakuga.lv

Par kulturys īsacejumim itūnedeļ ryupi turējuse Rēzeknis kulturvītys “Breivvaļsts Duorgumu noms” vadeituoja Jolanta Leitāne. Itamā reizē lakuga.lv skaiteituojim īsacejumi, kas ir lītdereigi, izgleitojūši i iz puordūmom vadynūši.

Zynoms, ka advents ir gaideišonys laiks, kas saistuos ar mīru, klusumu i puordūmom. Itymā laikā cylvāki gona bīži izviertej, kas lobs goda laikā padareits, kas nav paspāts i kū vēļ grybātūs maineit i pylnveiduot. Tys ir laiks, kū varim veļteit dūmu sakuortuošonai i atpyutai ar pošym tyvuokajim, varbyut padareit ari kaidu lobu dorbu, kas, godu nūslādzūt, dūs papyldu gondarejuma sajiutu. Itamā reizē lakuga.lv skaiteituojim īsacejumi, kas, pa munam, ir lītdereigi, izgleitojūši i iz puordūmom vadynūši.

Izstuode “Uzmanību! Trausls!”

Izstuožu nomā “Breivvaļsts Duorgumu noms” (Krosta īla 35a, Rēzekne) eksponātys vaira nakai 500 porcelana vīneibys nu pīcu vierīneigu privatkolekceju. Izstuode “Uzmanību! Trausls!” ir stuosts par smolku porcelanu, kas ražuots Kuznecovu dzymtys i Jessen fabrikuos Reigā, taipoš ari Reigys Keramikys fabrikā, Reigys porcelana i fajansa fabrikā, Reigys porcelana ryupneicā, kai ari Vuocejis ryupneicuos Meissen, Rozental, Fasold & Stauch, i Dānejis ryupneicā “Royal Copenhagen” i.c.

Plotuokū izstuodis daļu veidoj Reigys porcelana ražuotnēs dažaidūs laikūs veiduotī seikplastikys dorbi aba figurys. Izstuodē apsaveramys kai serejveida figurenis, kas nazkod tiražātys lelā skaitā i atrūnamys daudzu ļaužu sātu plauktūs, par pīmāru, dzeivinīki, tautumeitys i dāli, garšvīlu trauceni, dekorativi prīkšmati i cyti, tai ari latvīšu muokslinīku autordorbi, kas izpiļdeiti viņ dažūs eksemplarūs, leidz ar tū cīši reši i vierteigi. Asat gaideiti īpazeit porcelana smolkumus i apsavērt ari pamatekspoziceju.

Tauku bumbu meistarklase Rēzeknis Muokslys nomā

Ūtardiņ, 17. decembrī, vītejuo kūpīna “Nezināmā Rēzekne” i Latvejis Ornitologejis Bīdreibys Rēzeknis grupa kūpeigi organizej tauku bumbu meistarklasi. Darbneicys laikā varēs dazynuot par pareizu Latvejā zīmojūšu putynu baruošonu i ar pošim izgatavuot augstvierteigys tauku bumbys, kurys ļaus zeileitem, dziļneišim, dzenim i cytim baruotovu putynim puorlaist itū zīmu. Daļu nu izejvīlu nūdrūsynuos organizatori, tok ļauds teik aicynuoti pajimt leidza ari sovys izejvīlys – vysaiduoku siekleņu miksli, laidynuotus cyuku taukus, prīžu čīkurus i tt. Eipaši aicynuotys saimis ar bārnim. Nadamierstit vys dasasaceit iz meistarklasi ITE.

“Mēs augam” – daiļslyduotuoju svātku koncerts Olimpiskuo centra Lada hallē

Rēzeknis Bārnu-jaunuotnis sporta školys daiļslyduošonys nūdaļa ir spūdra talanta, īguļdeituo dorba i aizrauteibys pīmārs, kas itūšaļt aktivi puorstuov piļsātu storptautyska mārūga saceņseibuos. Itymā svātku laikā meitinis grib pasadaleit ar sovom īmaņom i graceju na tik ar žurejis puorstuovim, tok ari ar Rēzeknis dzeivuotuojim i piļsātys gostim, deļtam sevkurs interesents aicynuots iz koncertu “Mēs augam”, kas nūtiks 29. decembrī 15 stuņdēs i nuokušuo gods 5. janvarī 12 stuņdēs. Itamuos nūtikšonuos vāruotuojim byus vareiba sekuot leidza daiļslyduotuoju aizraunūšajam ceļam iz izaugsmi, nūviertēt jūs naatlaideigū dorbu i baudeit muokslu iz lada – breineigus prīšknasumus, kas apvīnoj graceju, eleganci i emocejis. Koncertā nūteikti byus vareiba sajust svātku nūskaņu, pasuokums ir bez moksys. Beletu sādvītai var izjimt, suocūt ar 16. decembri pi zālis administratora trenažeru zālis dorba laikā.

Vieleju mums vysim skaistu itū gaideišonys laiku i kab adventa vaiņuka sveču līsmeitis īnas jiusu sātuos syltumu i sirdsmīru.