Rokstu sagataveja: portals lakuga.lv

16. decembrī izziņuoti Muzykys īrokstu goda bolvys “Zelta Mikrofons 2025” nominanti, informej tuos organizatori. Bolvai nomināts ari Seimaņam Putānam veļteitais albums “Caur bolsim as eju”, apvīneibys “Black Rooster Kapelye” īroksts “Vos Mir Zaynen”, kai ari vairuoki cyti ar Latgolu i latgalīšu volūdu saisteiti muzykys īroksti.

Tautys voi pasauļa muzykys nominacejā izvierzeiti pīci albumi. Trejūs nu tūs dzierdama ari latgalīšu volūda.

Storptautyskuos muzykaluos apvīneibys “Black Rooster Kapelye” pyrmais studejis albums “Vos Mir Zaynen” radeits, dinamiskūs skaņdorbūs savīnojūt pyrma vaira nakai symtu godu pīraksteitūs Emiļa Melngaiļa latvīšu i ebreju muzykys kolekceju materialus, i ir kai sveicīņs izcyluo folklorista i komponista 150. jubilejā. Projekta nūsaukumā ir atsauce iz Melngaiļa pavuordi i jidiša vuordu kapelye, kas apzeimej kapelu aba tautys muzykantu grupu. Tamā sasadorboj treis latvīšu i treis ebreju muziki, kurūs seņču saknis vejās cauri Latvejai, kūpā rodūt tyltu na tik storp latvīšu i ebreju kulturu, tok ari bejušū i tū, kas vēļ byus. Vaira par apvīneibu var puorskaiteit ITE.

Etnogrupys “Ogas” ūtrajā albumā “Ok, laime!” vydā ir vīnpadsmit dzīšmu, divejis nu jūs ir latgaliski – “Ai, Zuzanna” i “Ok, laime!”, kas ir pajimtys nu Augšdaugovys nūvoda etnografiskuo ansambļa “Vabalis” kruojumu. Albuma nūsaukums ari ir latgaliski. Kai intervejā portalam lakuga.lv nūruodeja Artūrs Uškāns, ka byutu latvyski, tod vajadzātu saceit “Ak, laime”, bet muziki izalasejuši variantu “Ok, laime!” i pošim pateik, ka tymā pošā laikā jū var izrunuot ari kai “Okay, laime!”.

Lienis Skrebinskys, Annys Patrīcijis Karelis i Katrīnys Karelis aba apvīneibys “Trio Bille” mozalbumā “Visu gadu dziesmas krāju” vydā ir pīcys dzīsmis, nu kurūs četruos īsaskaņ ari latgalīšu volūda.

Kai goda lobuokais hiphop muzykys albums nomināts ari latgalīšu dzejnīkam Seimaņam Putānam veļteitais īroksts “Caur bolsim as eju”. Tymā var dzierdēt juo dzejūļus laikmeteiguos interpretacejuos kai latgaliski, tai atdzejuojumūs latvīšu literarajā volūdā Ūgys, anša, Gustavo, Juoņa Skuteļa, Nikitys Grappa, Arnolda Zeitmaņa (DJ Straume), Bruolāna, Amandys Lapys-Slobožaninys, Laurys Svikšys, Danys Vasiļjevys, Janys Dudaris, Broka i cytu muziku izpiļdejumā. Vaira par albumu var skaiteit ITE.

Nominacejā par lobuokū koncertīrokstu video izvierzeits ari nu Rēzeknis guojušuos varganistis Ivetys Apkalnys solokoncerts Reigys Dūmā kūpā ar Vaļsts Akademiskū kori “Latvija” i dirigentu Māri Sirmuo. Koncerta īrokstu var nūsavērt ITE.

Sovpus nominacejā kai lobuokais tradicionaluo pop voi kantri muzykys albums izvierzeits Latgolys grupys “Galaktika” albums “Mums pieder tik daudz”. Tymā vys itūreiz nav dzīšmu latgaliski.

Ar pylnu nominantu sarokstu var īpasazeit ITE. Bolvys “Zelta mikrofons 2025” bolvu sajiemieji tiks nūskaidruoti padūšonys ceremonejā 2025. gods 18. janvarī Latvejis Nacionalajā teatrī, kū tīšraidē ruodeis TV3.