Kulturys īsacejumi nedeļai: ļautīs prīceigom emocejom
Rokstu sagataveja: portals lakuga.lv
Kulturys īsacejumus itai nedeļai sagatavejuse literate, žurnaliste i gruomotu blogere Inga Kaļva-Minina, kura itūgod ari uzvarēja konkursā “Latgolys prozys skaitejumi”. Jei laikā pyrma svātku īsoka ļautīs prīceigom emocejom. “Boltais snīgs jau roda breineigu zīmys sajiutu, ka kluot ir eists decembris. Zīmyssvātku kinys, piparkūkys, mandarini i smuordeigu sveceišu īdegšona ir tys, kas maņ paleidz izjust gaidomūs svātku tyvumu,” tai Inga.
Duovoj gruomotys
Ka meklej lobu duovonu meilam cylvākam, tod īsoku īsaguoduot gruomotu (voi vēļ lobuok – duovonu karti gruomatneicā). Poša tagad losu Ilzis Aizsilys (kurys dzymtuo puse ir Kruoslovys nūvoda Ezernīku pogosts) jaunū romanu “Šis nav randiņš” (izdeviejs: “Zvaigzne ABC”), izdevnīceibys “Latvijas Mediji” jaunū gruomotu “24 stāsti Ziemassvētkiem”, kurā ir publicāti 24 autoru (tymā skaitā arī nu Latgolys guojušu) dorbi. I pavysam naseņ sajiemu bīdreibys “Hronologeja” jaunū izdavumu – 15. divizejis legionara, trymdys latvīša Aleksandra Kalniņa (1911–2003) dīnysgruomotu “Dienas piezīmes: 1944–1960”.
Lobs veids, kai palutynuot sevi voi kaidu meilū ar jaunu izdavumu, ir ari viereigai sekuot socialajūs teiklūs gruomotu blogerim i izdevnīceibom, deļtam ka taišni decembrī jī reikoj vysaidus konkursus, kurūs var laimēt gruomotys. 21. decembrī byus treis godi, kai poša dorbojūs kai gruomotu blogere sovā Instagram kontā @karuselis.lv. Itamā svātku nedeļā byus puorsteigumi ari munim sekuotuojim.
Atbolsti vītejūs ražuotuojus
Ka svātkūs nagribi duovuot gruomotys, tod īsoku apmeklēt tierdzeņus, kurūs sovus ražuojumus i rodūšus rūku dorbus pīduovoj vītejī Latgolys cylvāki. Latgolys Kulturviesturis muzejā da 4. janvaram nūteik Zīmyssvātku duovonu izstuode-tierdzeņš, kurā var īsaguoduot A. Paulāna TLMS i TLMS “Dzīpariņš” amatnīku darynuojumus. 18.decembrī 10.00 stuņdēs Rēzeknis nūvoda pošvaļdeibys telpuos nūtiks Zīmyssvātku tierdzeņš “Lobs lobam”, bet 21. decembrī 16.00–20.00 stuņdēs Rēzeknē, Festivala parkā, varēs na tik īsaguoduot amatnīku darynuojumus i gordumus, bet ari satikt puosoku varūņus i Zīmyssvātku veceiti juo “Zīmyssvātku veceiša nameņā”. Da 30. decembram breineigs Zīmyssvātku pop-up veikaleņš dorbojās ari “Zelma Kraft” darbneicā Rēzeknē, Atbreivuošonys alejā 130 (preteimā SIA “Kristāla kurpīte”), kur jau pīktū godu daīmami vysaidi amatnīku dorbi.
Prīcojīs par svātku gaismeņom
Itamā nedeļā aicynu apceļuot Latgolu i prīcuotīs par skaisti izrūtuotajom vītom. Myrdzūšys lampenis i dažaidi dekori izgaismoj tymsū laiku i sirdī īdadz prīcu. Itūgod eipaši lela prīca par Rēzeknis Zīmyssvātku egli, kas atceļuojuse nu meža i niu vysus prīcynoj Festivala parkā. Taipat cīši skaisti izaver Zīmyssvētku egle Daugovpilī.
