Rokstu sagataveja: portals lakuga.lv

Latgalīšu kulturys kusteiba “Volūda” izdavuse Evijis Piebalgys debejis dorbu – literarūs miniaturu i fotomuokslys sajiutu kartenis ap Latgolu “Brīnumdārzs/Breinumu duorzs”. Izdavums ir kai atseviškuos puslopuos apsaverama fotogruomota i latvīšu literarajā i latgalīšu rokstu volūduos pīraksteitys miniaturys ap sajiutom, pīredzem, lītom i vītom Latgolā, vietej kusteibys sagataveituo informaceja.

Dorbu pi izdavuma “Brīnumdārzs/Breinumu duorzs”, kurā ir 36 kartenis, Evija Piebalga aizsuokuse aptyvai pyrma desmit godu, vuicūtīs analoguos fotografejis tehniku, fotografejis viesturi, fotografeju izalaseišonys principus i cytys prasmis fotografa Andreja Granta lekceju i praktiskūs darbneicu kursā “Foto meistardarbneicā”. Tai radeits karteņu komplekts, kurā apsavīnoj fotografejis vysaiduos tehnikuos – analoguo i digitaluo, atjaunuotys fotografejis nu saimis albumu i ar myusu dīnu teleponu sagiutys šaļts nu kasdīnys dzeivis. Tū vysu papyldynoj autoris teksts atbiļstūši kotrys fotografejis nūskaņai kartenis ūtrā pusē, rodūt vizuali i tekstuali daudzeju slaņu pīpiļdeitu viestejumu atbiļstūši myusu dīnuos rakstureigajom “eisuos skaiteišonys” tendeņcem. Autore obejis latvīšu volūdys formys apzynuotai saplyudynuojuse vīnā, kab simboliski izsvārtu i atguodynuotu, ka, koč i latvyskais ir vysaids, mes vystik asam vīns vasals. Ospruoteigi, bet ar dziļu cīnu i latgaliskuo izjiutu – tai var raksturuot autoris tekstus.

Izdavuma autore Evija Piebalga soka: “Ir taids teicīņs, ka kotrā zeilē ir ūzuls i kotrā cylvākā ir stuosts. Breinumu duorzs ir tys, kai es radzu Latgolu, kai es asu tū īraudzejuse car cytu cylvāku, nagaideiti satyktu voi cīšu tyvu, stuostim. Kai es tū asu īraudzejuse sovys saimis albumūs voi caur sovys kamerys objektivu. Kai es grybu par tū izstuosteit cytim i kai es grybu, kab cyti jū saradz. Kai latgaliskū jiutam sevī mes, kas asam ituos pusis ļauds. Par kū mes viļņojamīs, par kū sirdejamīs i par kū pasasmejam.” Evijis Piebalgys, kurei īt nu Preiļu nūvoda, bet niu dzeivoj Rēzeknē, kasdīnys dorbs saisteits ar nūtikšonu reikuošonu Latvejis Investiceju i atteisteibys agenturā, kai ari īsasaistūt vītejūs regiona aktivitašu spūdrynuošonā – apvīneibys “Latgalactica” rodūšuos komandys organizātajā pasuokumu serejā “Ziepes”, vysaiduos ar uzjiemiejdarbeibu saisteituos nūtikšonuos i cytuos rodūšajuos aktivitatēs, kas rūsynoj dūmuot plotuok, sasadorbuot, nūvērtēt i izmontuot vītejūs kūpīnu potencialu.

“Brīnumdārzs/Breinumu duorzs” dizainere ir Liāna Merņaka, tekstu redaktore Inka, bet projekta vadeituoja Edeite Laime. Jaunū izdavumu sagatavejuse latgalīšu kulturys kusteiba “Volūda”, turpynojūt aizsuoktū dorbu pi jaunu Latgolys autoru atbaļsteišonys, padorūt plotuoku latgaliski daīmamūs izdavumu pīduovuojumu. Karteņu izdūšonu finansiali atbaļstejuse Rēzeknis nūvoda pošvaļdeiba kasgadejā rodūšūs dorbu konkursā, kai ari Vaļsts kulturkapitala fonds, atbolstūt kusteibys “Volūda” (bīdreibys “LgSC”) darbeibu.

Jaunuo izdavuma prezentaceja paradzāta pīktdiņ, 21. februarī, dizaina veikalā “Kabata” Rēzeknē (Krosta īlā 31), reizē svietejūt Storptautyskū dzymtuos volūdys dīnu. “Brīnumdārzs/Breinumu duorzs” var nūpierkt kulturys kusteibys “Volūda” škārsteikla veikalā voluda.lv, kai ari jis byus daīmams cytuos tierdznīceibys vītuos.