Rokstu sagataveja: portals lakuga.lv

Itūnedeļ piec garuoka puortraukuma iz Rēzeknis teatra “Joriks” skotivis atsagrīzs režisora Mārtiņa Eihis īstudiejums “Muols”, kas viestej par Latgolys keramiku. Tei ir ari vīna nu nūtikšonu, kū īsoka apmeklēt ituo teatra marketinga specialiste Elīna Zujāne. Vēļ jei aicynoj nūbraukt iz sadaņci Feimaņūs, kai ari izīt puorguojīnī pa Īdenis pusi.

Izruode “Muols”

28. janvarī Rēzeknis teatrī “Joriks” varēs nūsavērt izruodi “Muols”. Tei byus vierteiga kai jaunīšim, tai pīaugušajim, kam ļaun izzynuot i pasavērt iz myusu skaistajom i eipašajom Latgolys vierteibom – keramiku i omota pratiejim pūdnīkim. Breineigs akteru Juoņa Krūņa (Jāņa Kroņa) i Lienys Šmukstis duets i vēļ kūklis skanis i Lienis Skrebinskys bolss. Pa munam, juoredz kotram, kab apsazynuotu sova regiona spāku, patīsumu i vierteibu.

Deju kolektivu sadaņcs Feimaņūs

Sastdiņ, 1. februarī, 19.00 stuņdēs Feimaņu kulturys nomā nūtiks Rēzeknis nūvoda i Rēzeknis piļsātys videjuos paaudzis i senioru latvīšu skotiviskuos dejis kolektivu koncerts “Jautrais sadancis”. Itūšaļt, pasaplašynojūt jaunīšu deju kolektivam “Dziga”, ūtrū sezonu dorbojās videjuos paaudzis deju kūpa “Dzimta”. Vysi nazkodejī “Dzigys” jaunīši ir izauguši i otkon doncoj kūpā! Tī doncoju ari es, partū aicynoju vysus iz Feimanim baudeit tautys deju koncertu!

Puorguojīņs pa Īdenis pusi

Vysod ir svareigi izakustēt, byut aktivam, īt, skrīt, baudeit. Maņ redzīs, ka cīši veiksmeigs i interesants pasuokumu cyklys ir Rēzeknis nūvoda puorguojīni “Debespuses” (vaira par pasuokumu var izzynuot ITE). Itū svātdiņ guojieji tymā varēs īpazeit Īdenis pusi. Leidza sylts čajs, ārtys drēbis i īmam dobā. Ka nasaīt apmeklēt itū puorguojīni, tod aicynoju ari sovā saimis lūkā, draugu kompanejā vīnkuorši dūtīs pi dobys!