Pi skaiteituoju tykuse jau trešuo Kuorsovys viesturis stuostu gruomota – itūreiz par dzeļžaceļu (+FOTO)

Pi skaiteituoju tykuse jau trešuo Kuorsovys viesturis stuostu gruomota – itūreiz par dzeļžaceļu (+FOTO)

Rokstu sagataveja: Laura Spundere, portals lakuga.lv

25. janvarī Ludzys nūvoda Kuorsovys Kulturviesturis centrā “Līču mājas” tyka atkluota jauna gruomota-rokstu kruojums “Kārsavas stāsti III”. Kai var nūprast, itys ir trešais izdavums, kas seceigi papyldynoj pyrmajūs kruojumūs jau izcaltū industrialuo montuojuma temu i pīduovoj Latvejis teritorejā pyrmuo dzeļžaceļa īcierkņa daudzpuseigu viesturyskū i aktualū dokumentaceju. Gruomotys “Kārsavas stāsti III” autori ir Ineta Zelča Sīmansone, Raivis Sīmansons, Andris Uškāns, Agnese Neija, Tuoms (Toms) Altbergs, sovpus interveju veiduošonā pīsadaleja ari Inetys mama Valentīna Zelča.

Kai gruomotys īvodā roksta Ineta Zelča Sīmansone, suocūt dorbu pi Kuorsovys stuostu pietnīceibys, autori nav variejuši paredzēt, ka tys turpynuosīs desmit godu garumā i izīs treis rokstu kruojumi par Kuorsovu – mozu, tok strategiski nūzeimeigu Latvejis piļsātu.

Kruojuma atkluošonā Ineta Zelča Sīmansone pasadaleja, ka tys, kai teik veiduoti Kuorsovys stuostu kruojumi, atsaškir nu tradicionaluos izpratnis par akademiskim pietejumim. “Mes gruomotys veidojam tai, kab tuos byutu interesantys vysim – kai tim, kas grib pasavērt biļdis, tai ari tim, kas grib puorskaiteit atminis voi akademiskus pietejumus.” Trešajā kruojumā ir ari diveji jaunumi, kas da šam nav bejuši īprīškejuos gruomotuos – vīns nu tūs ir muokslineicys Gitys Palmys aba “viļcīņu meitinis” radeituos gleznys, kuruos radzamys Kuorsovys, Rēzeknis i Maltys stacejis, sovpus ūtrys jaunums ir fotografa Anda Stefanoviča alternativais jaunīša redzīņs iz staceju apbyuvi fotografejuos.

Kruojums “Kārsavas stāsti III” izīt nu Kuorsovys apleicīnis rūbežu i runoj par dzeļžaceļa pyrmsuokumim vysā Latgolys regionā. Kūpumā kruojumā ir treis lelī pietejumi – Andra Uškāna pietejums par satiksmis celim nu posta ceļu da dzeļžaceļa, Agnesis Neijis pietejums par Pīterpiļs–Varšavys dzeļžaceļa distaņcis staceju atspīgeļuojumu presis materialūs i Tuoma Altberga pietejums par Kuorsovys–Maltys dzeļžaceļa īcierkņa viesturyskajom byuvem. Taipoš kruojumā ir apkūpuotys intervejis-stuosti ar Kuorsovys–Maltys dzeļžaceļa darbinīkim i dzeivuotuojim, muokslineicys Gitys Palmys gleznys ar jau mynātajom treis stacejom, Didža Gruodza (Grodza) Kuorsovys–Maltys viesturyskuos apbyuvis foto fiksaceja, Anda Stefanoviča foto redziejums par dzeļžaceļa apbyuvi i Stanislava Grahoļska dokumentātuo 1970.–1972. gods školānu ekskurseja iz dzeļžaceļu Kuorsovā.

Vīns nu gruomotys autoru i pietnīks Tuoms Altbergs atkluoj, ka pošā suokumā, kod topa Latvejis dzeļžaceļa viesturis muzejs Reigā, Latgolys regions asūt drupeit atstuots nūvuortā, tok jis pats saprats sovu klaidu i dasagivs pi pieteišonys. “Dzelžaceļa gadīnī Latgolā ir vysuleluokuos pērlis kai nu viesturis redzīņa – pyrmais dzeļžaceļs Latvejā –, tai ari nu cytu aspektu, pīmāram, arhitekturys.” Tuoms ari izsoka nūceju, ka koč kod byutu juoatjaunoj dzeļžaceļa satiksme iz Kuorsovu, kam teiri tehniski tys byutu īspiejams ari niu.

Foto galereja: Stuostu kruojuma “Kārsavas stāsti III” atkluošona, foto autore Amanda Anusāne, portals lakuga.lv


Komentari

    1. Portals lakuga.lv

      Gruomotu var nūpierkt Kuorsovys kulturviesturis centrā “Līču mājas”, rokstūt creativemuseum.lv i Kuorsovā pi Valentīnys Zelčys.

Kalenders

Feb
4
Ūtr
18:30 Izruode “Melnais piens/2024” @ Jaunais Reigys teatris
Izruode “Melnais piens/2024” @ Jaunais Reigys teatris
Feb 4 @ 18:30 – 20:15
Paguojuši 15 godi, kai JRT roduos izruode “Melnais piens”. Itei izruode paruoda, ka teatram nav obligati vysod juobyut baļsteitam iz destrukceju i konfliktim. Tys var byut ari par harmoneju i skaistumu, koč i skumeigu. Vizuali[...]
19:00 Izruode “Mazpiļsāta” @ Ventspiļs teatra noms "Jūras vārti"
Izruode “Mazpiļsāta” @ Ventspiļs teatra noms "Jūras vārti"
Feb 4 @ 19:00 – 21:00
“Pannas Teātris” skateituojim pīduovoj izruodi – slovonuokuos myusu dīnu Latgolys lugu autoris Danskovītis jaunuokū komedeju. Izruodis režisors Juris Rijnieks liks akterim Zanei Daudziņai, Aldim Siliņam, Elīnai Vānei, Jānim Skanim voi Jurim Lisneram runuot ari latgaliski[...]
Feb
5
Tre
16:00 Juoņa Gleizda symtgadei veļteitu... @ Latgolys Centraluo biblioteka
Juoņa Gleizda symtgadei veļteitu... @ Latgolys Centraluo biblioteka
Feb 5 @ 16:00 – 17:00
Nu 4. februara da 28. marta Latgolys Centralajā bibliotekā (Reigys īlā 22a) apsaverama fotomuokslinīka Juoņa Gleizda symtgadei veļteita izstuode “GAISMĀ.punkts”. Izstuode sastuov nu Gleizda aktu fotografeju reprodukceju i konkursa malnboltajā fotografejā “Juoņa Gleizda bolva fotografejā[...]
18:30 Izruode “Melnais piens/2024” @ Jaunais Reigys teatris
Izruode “Melnais piens/2024” @ Jaunais Reigys teatris
Feb 5 @ 18:30 – 20:15
Paguojuši 15 godi, kai JRT roduos izruode “Melnais piens”. Itei izruode paruoda, ka teatram nav obligati vysod juobyut baļsteitam iz destrukceju i konfliktim. Tys var byut ari par harmoneju i skaistumu, koč i skumeigu. Vizuali[...]