Rokstu sagataveja: portals lakuga.lv

Reigys Latvīšu bīdreibys latvīšu volūdys atteisteibys kūpa sadarbeibā ar Latvejis Rakstnīku savīneibu jau divdesmit ūtrū godu reikoj aptauju, kab nūskaidruotu īprīškejuo gods vuordu, navuordu, spuornuotū teicīni i savuorstejumu. Portals lakuga.lv latgalīšu volūdys specialistei, lingvistei Muorai Mortuzānei-Muravskai vaicuoja, kai pareizi latgaliski pīraksteit 2024. gods vuordu “apritīgs”, navuordu “grafisks”, savuorstejumu, kai ari spuornuotū teicīni.

Aptaujis žurejā struoduoja redaktors Arturs Hansons, žurnala “Domuzīme” golvonuo redaktore Rudīte Kalpiņa, literaturfilosofe i tulkuotuoja Ieva Kolmane, kulturys žurnaliste Linda Kusiņa-Šulce, tulkuotuojs i Latvīšu volūdys atteisteibys kūpys vadeituojs Ph. D. Uģis Nastevičs, Latvejis Okupacejis muzeja vodūšuo pietneica, sociolingviste Dr. philol. Vineta Skujiņa, komunikacejis praktiks Pēteris Pūrītis, volūdnīks, akademiks, Dr. habil. philol. Andrejs Veisbergs, žurnalists i publicists Egils Zirnis. Jūs viertiejumā 2024. gods vuords ir “apritīgs”, navuords – “grafisks”. Goda savuorstejuma kategorejā par uzvarātuoju tyka pīzeits Izgleiteibys i zynuotnis ministrejis atbiļdē deputatei Ramonai Petravičai mynātais – “Pirmšķietami identificēt skolas, kuras neatbilst plānotajiem kritērijiem, ir statistiski viegli izvirzāms sagaidāmais rezultāts”. Tok par goda spuornuotū teicīni pīzyna Vaļsts prezidenta Edgara Rinkēviča godu meitovu uzrunā saceitais: “Ja nu nesanāks. A ja nu sanāk?”

Latgalīšu volūdys specialiste, lingviste Muora Mortuzāne-Muravska nūruoda, ka latgaliski goda vuords byutu juoroksta kai “apriteigs”. Goda navuords latgaliski byutu “grafiskys”, savierkniejums skanātu: “Pyrmdūmojami identificēt školys, kuruos naatbylst planavuotajim kriterejim, ir statistiski vīgli izvierzoms sagaidomais rezultats”, sovpus spuornuotais teicīņs: “Kas tod, ka nasaīs? A ka saīt?”

2025. gods vuorda, navuorda i spuornuotuo teicīņa kandidatus var syuteit iz gadavards@inbox.lv. Tok volūdys jaunumim vysu godu leidza var sekuot socialuos teikluošonuos platformā X. Vaira par īprīškejūs godu aptauju rezultatim i īsyuteišonys dasacejumim var izzynuot ITE.