Apvīneiba “Ausmeņa Records” īpazeistynoj ar divejim jaunim vuordim muzykā

Apvīneiba “Ausmeņa Records” īpazeistynoj ar divejim jaunim vuordim muzykā

Rokstu sagataveja: portals lakuga.lv

2024. godā Latgolys hiphopa apvīneiba “Ausmeņa Records” izziņuoja atlasi, aicynojūt pīsavīnuot jaunus dalinīkus. Kai viestej apvīneibys puorstuove Ūga, piec atlasis “Ausmeņa Records” pīsavīnuojuši diveji jauni muziki Dei i Lakkey, kuri niu klauseituojim pīduovoj sovus pyrmūs singlus.

Viertejūt pretendentu atlasi darbeibai “Ausmeņa Records”, Ūga pīzeist, ka vystik atsacejuši pretendentim, kurim jau daīmama īrokstu studeja i ir vysā lobs sovs produciejums. “Dasacejumu beja daudz i jī beja vysaidi, bet mes fokusiejamēs iz pretendentim, kuri beja gotovi struoduot, sasnēgt augšuokys viersyunis i ari mums jau kai vacajai paaudzei dūt kaidys foršuokys idejis. Asam pateiceigi vysim, kas pīsasaceja!” soka Ūga.

Niu sovu pyrmū debejis singlu “Tova mozuo” pīsoka jaunuo i ambiciozuo muzike Dei. Skaņdorbs radeits house muzykys stylā i ir īdzīduots latgaliski, dzīsmis muzykys autors ir Nikita Grapps, bet tekstu rakstejuse Ūga. Kai raksturoj apvīneiba, “Tova mozuo” atkluoj golvonuos varūnis dzili personeigu pīredzi, viestej sajiutys, kuruos gryuts izsaceit vuordūs, bet juos izalauž car naktsdzeivis kaisleibom, rodūt attīceibuos jaunu sprīdzi i energeju.

“Sajamūt viesti nu Ūgys, es naticieju, ka tys eistyn nūteik. Muzyka ir munys dzeivis daļa, i itys ir bejs sapyns vysu munu rodūšū dzeivi. Itei komanda dūd vareibu na tik publicēt muzyku, kas pošai pateik, bet ari paraudzeit kuo jauna – house i pop styla muzyku ar drupeiti repa pīgaršys,” stuosta jaunuo muzike Dei. Jei taipat pīzeist, ka “Tova mozuo” ir pyrmuo nu eksperimentu. “Suokuos ruodejuos maņ narakstureiga, bet, kotru reizi klausūtīs, saprotu, ka nui – itei ir muna dzīsme. Jei ir kai mārgu himna, manifests, ka mes asam tuos, kuruos puorvolda sovu dzeivi i nivīns cyts!” soka jaunuo “Ausmeņa Records” dalineica, iz kū Ūga papyldynoj, ka dzīsme ir ari atguodynuojums nūviertēt sovys tyvuokuos attīceibys i naļaut jom izsleidēt nu rūku. “Veirīšim – sorgojit sovys beibis!” dasoka Ūga.

Ūtrys jaunais muokslinīks, kū pīsoka apvīneiba “Ausmeņa Records”, ir Lakkey. Jis asūt jauns, talanteigs i harizmatiskys muokslinīks nu Latgolys, kurs sovā pyrmajā singlā “Ponti” pīduovojūt svaigu vieršonūs iz repa žanru. Dzīsme ir par īsadreikstiešonu i protests pret klišejom i stereotipim, kas bīži raksturojūt myusu dīnu repu – līleišonuos i izanesšona aba tai saucamī “ponti”. Skaņdorba muzyku taisejs bitmeikers Kviesis, bet pi teksta i skanis apstruodis struodojs pats Lakkey, aplīcynojūt rodūšū redziejumu.

Lakkey soka: “Muns jaunais singlys “Ponti” ir satiriskys pīsacejums, kas ironizej par myusu dīnu gribiešonu izalikt par kaidu, kas eistineibā naesi. Tys ir stuosts par “krutajim”, kurūs uorīne bīži viņ naatbiļst tam, kas globojās dvēselē. Sabīdreibys tendeņcis, trendi – saucit jūs, kai gribit –, vystik jī navadynoj myus aizadūmuot par vierzīni, kurā īt sabīdreiba. Deļtuo ar drupeit osuokim vuordim i humoru gribīs aicynuot klauseituojus aizadūmuot: cik bīži mes poši aizaraunam tamā “pontu” spēlē, raugūt īsajust lūmuos, kas nav myusu?”

Atguodynuojumam – “Ausmeņa Records” ir Latgolys hiphopa apvīneiba, kas sovu darbeibu aizsuoce 2012. godā. Vyss suocēs kai jaunīšu grupeņa, kas sataiseja kuseibu, apvīnojūt vysus hiphopa elementus – vuicejuos grafiti muokslu, breika doncuošona, bitu taiseišonu, repuošonu i veicynuoja zynuošonys par hiphopu. Vīns nu apvīneibys dybynuotuoju ir Kvāps, kurs niu ir Latvejā labi zynomūs ādynuošonys vītu “Ausmeņa Kebabs” saiminīks.


Komentari