Juoņs Matvejenko prezentēs debejis albumu “Dvēseles pastaiga”

Rokstu sagataveja: portals lakuga.lv
Pīktdiņ, 31. janvarī, ostoņuos stuņdēs vokorā Rēzeknis nūvoda Leņdžu kulturys nomā byus Juoņa (Jāņa) Matvejenko debejis albuma “Dvēseles pastaiga” attaiseišonys koncerts. Jaunajā albumā vydā ir 12 dzīšmu, bet juo prezentacejis svātki, kai stuosta pats Juoņs, īcarāti kai eistyna balleite, kurā labi izaļustēt.
Kai portalam lakuga.lv stuosta Juoņs Matvejenko, ceļš da pyrmuo albuma ir bejs vysā pagars i na par reizi ar mierki īraksteit albumu, bet vīna nūtikšona vadynuojuse tuoļuokū i niu saguojs albums ar 12 dzīsmem. Juoņs stuosta, ka bierneibā da kaidys deveituos klasis jū muzyka vyspuor nav interesējuse, iz kori guojs ar dasamīgšonu, biedzs paceli, nagribiejs īt i vysaiži guojs, bet liktineiga izaruodejuse kaida rodu saīšonu kopusvātkūs, kod mamys bruoļs spēlējs akustiskū gitaru, padzīduojs. “Jam beja taids simpatiskys bolss. Pasavieru nu molys, pasaklauseju, ruodejuos, ka kai ba nav cik sarežgeiti, bet cylvākim apleik pateik i mani tys aizgiva. Tamā pošā dīnā vaicuoju mamys bruoļam, lai paleidz saprast, kai spēlej gitaru, paruoda, kur pierstus likt i aizdūd instrumenta. Nūguoju iz sātu, pusi nakts nagulieju, mama aizasirdeja, kab beidzu gitaru tī kai kači staipeit aiz astis, ka muzykants nasaīšūt, bet speiteiba i raksturs dareja sovu – jau pyrmajā naktī dzīsmi “Liepas satumst” kai nikai, bet varieju nūspēlēt,” par muzykaluos interesis aizasuokšonu stuosta Juoņs Matvejenko. Jis pīzeist, ka piečuok bejušys vysaidys šaļts – ruodejīs, ka bez muzykys školys izgleiteibys eistyn nikas nasaīšūt, tod otkon guojuse saprasšona, ka nikur nu muzykys nanūbēgt – suokusēs paspēliešona kaiduos jubilejuos, pasuokumūs. “Vīnu, ūtru reizi tev pasoka, ka labi saīt, tai golā i pats suoc nūticēt sovim spākim. Suoču spēlēt tausteņus i vyss ar muzyku palyka nūpītnuok,” pīzeist Juoņs.
Debejis albumā “Dvēseles pastaiga” īraksteitys 11 Juoņa Matvejenko autordzīsmis i vīna – “Lietus” – grupys “Credo” dzīsme, kurū ar grupys atļuovi Juoņs īdzīduojs sovā interpretacejā. Muzykants atsazeist, ka nazkod vyspuor nadūmuojs, ka varātu pats koč vīnu dzīsmi īraksteit. Jis stuosta, ka koč kod augstškolys godūs jam kladēs asūt bejuši kaidi dzīšmu osni, bet nikuo taida nūpītna. “Bet tod sasapazynu ar sīveņu Baibu i iz vysu tūs romantiskūs jiutu pamata pīraksteju pyrmū dzīsmi “Meitene saulrietā”. Sīveņa mani atbaļsteja, sataisejom sātys video, palaidem feisbukā, kam beja interesanti, kaida byus apleicejūs reakceja. Maņ par lelu puorsteigumu sajēmem daudzi pozitivu atsaukšmu i aicynuojumu dareit vēļ nazkū. Aizadūmuoju, ka varātu pyrmū dzīsmi īraksteit profesionali. Tai īpasazynu ar Kasparu Maku – agruok grupys “Forte” dzīduotuoju, niu aranžātuoju, īrokstu režisoru i pyrmū dzīsmi kūpā īrakstejom jau studejā. Tūlaik jis vēļ pasasmēja, ka kur vīna dzīsme, tī jau ūtrei i treša,” pyrmuo īroksta ceļu atguodoj Juoņs Matvejenko. Tai i saguojs, ka atbraucs iz sātu i sacejs sīvai, ka varbyut vēļ kaida dzīsme juopasaver i suocs meklēt vacuos kladis i dzīšmu pīrokstus. Tod jau piec ūtrys i trešys dzīsmis saprosts, ka nav tuoli da divpadsmit, lai tyktu da vasala albuma.
Latgalīšu kulturys ziņu portalam lakuga.lv saprūtams interesej, kai ir ar dzīsmem latgaliski, iz kū Juoņs Matvejenko atsoka, ka albumā ir tik vīna dzīsme latgaliski – “Latgolai” ar Elizabetis vuordim (vaira ap dzīsmis tapšonu var izzynuot portala lakuga.lv stuostā ITE). “Kod pabeidžu albumu, pats aizadūmuoju, deļkuo vysys dzīsmis es rokstu tik latvīšu literarajā volūdā? Tai tyku da sacynuojuma, ka kas cyts, ka na mes poši kūpsim sovu volūdu, deļtuo iz prīšku nu mane varēs sagaideit vaira dzīšmu ari latgaliski. Vēļ nikur tai nav cīši stuosteits, bet mums ar Elizabeti ir ideja, ka varātu tapt albums ari ar bārnu dzīsmem latgaliski i jū grybātūs papyldynuot ar video, kam myusu dīnuos taišni video bārnus aizraun iz vysa vaira,” Juoņs atkluoj tuoļuokūs rodūšūs plānus muzykā.
Albuma “Dvēseles pastaiga” vysys dzīsmis var nūsaklauseit Juoņa Matvejenko YouTube kanalā, bet albums izdūts ari diska formatā, kū varēs dabuot albuma attaiseišonys koncertā voi piečuok, sasazynojūt ar muzykantu. Juoņs nūruoda, ka albums vaira ir taids kai atskaitis punkts pošam deļ seve i iz albuma svātkim aicynoj vysys, kam pateikūt tys, kū i kai jis dora. “Pats asu izaudzs ar baļļu muzyku, taida ir ari muna muzyka, deļtuo leidzeigā atmosferā byus albuma attaiseišonys pasuokums,” soka Juoņs. Leņdžu kulturys nomā paradzātajā nūtikšonā gostūs byus dzīduotuoja Gita Dukaļska, grupa “Solversija”, “Rūžeņa”, muzykants Zintis Krakops, gitarists Andrejs Gabranovs i pianists Andrejs Kaupers. Juoņs Matvejenko nūruoda, ka koncertā skanēs kai juo poša, tai i cytys dzīsmis, bet uzastuošonu vydā byušūt Juoņa latgaliskī jūki. “Maņ pateik stuosteit jūkus, kam dzeivē vysa kuo ir bejs gona. Bet piec koncerta byus balleite ar gaļdenim, kur kūpā ar Zinti Krakopu plānojam nūraut taidu ļusteigu vokoru, lai vysi var tai eistyn izalēkt,” aicynojūt iz albuma atkluošonys koncertu soka Juoņs Matvejenko.

Juoņs Matvejenko īprīšk beja Leņdžu kulturys noma vadeituojs, i vaicuots, ar kū niu nūsadorboj, jis atkluoj, ka ar vīnu kuoju taipat asūt dorbūs Leņdžu kulturys nomā, kam kultura jam ir tyva i suopeiga tema, niu paleidzūt jaunajai kulturys noma vadeituojai dorbūs, bet pats asūt saprats, ka vaira grib dareit tū, kas jam pateik. “Grybu braukuot ar koncertim, spēlēt balleitēs, kuozuos, privatus pasuokumūs, taipat maņ reizi nu reizis palyudz nūvadeit kaidu pasuokumu – taišni taidā vierzīnī grybu atsateisteit. Kai vīnam cylvākam napaseņ saceju – mani kai kulturā vydā īvylka, tai taidā voi cytaidā veidā palīku viņ tepat,” nūsoka Juoņs.

Komentari