Rokstu sagataveja: portals lakuga.lv

Grupa “The Baltic Sisters” klauseituojim pīduovoj sovu debejis albumu “Värav / Vārti / Vartai” (igauņu, latvīšu i leitovīšu volūdā “vuorti”), kurū izdūd Vuocejis izdevnīceiba “CPL-Music”, viestej grupys atsyuteituo informaceja. Albumā īkļauta ari dzīsme latgaliski – “Soka saule rītiedama”. Tuo atkluošonys koncerti nūtiks vysuos trejuos Baļtejis vaļstīs, tymā skaitā Latvejā 29. martā.

“The Baltic Sisters” ir storptautyskys tradicionaluos muzykys projekts, kas dzims 2022. gods golā, kod pasauļa muzykys izstuodē “WOMEX” Lisabonā, Portugalē, sasatyka igauņu, latvīšu i leitovīšu dzīduotuojis. Grupys dalineicys, kuruos suokumā vīnuoja aizaraušona ar sutartinem – arhaiskom leitovīšu daudzbaļseigom dzīsmem, niu ir paplašynuojušys repertuaru, īkļaunūt ari igauņu i latvīšu tautysdzīsmis. “Asam kai muosys i dolomēs ar myusu muzykalū montuojumu – atrūnam i puorsteidzūšys leidzeibys, i atškireibys, kas boguotynoj myusu pīredzi,” pastreipoj grupys dalineicys. “The Baltic Sisters” sastuovā ir četrys dzīduotuojis – Liene Skrebinska i Vineta Romāne nu Latvejis, Mariona Selgalla nu Igaunejis i Laurita Peleniūte nu Leitovys.  

Albumā apkūpuotys daudzbaļseigys tautysdzīsmis grupys aranžiejumā – garais saucīņs nu Dīnavydkūrzemis, liriska dzīsme “Soka saule rītiedama” nu Latgolys, UNESCO pasauļa montuojuma sarokstā asūšuos leitovīšu sutartinis i Igaunejis setu dzīsmis, kai ari vairuoki skaņdorbi, kurūs sasavynuse vysu treju vaļstu etniskuo muzyka. Grupys dalineicys stuosta: “Myusu pyrmais albums ir kai vuorti iz Baļtejis vaļstu tradicionaluos muzykys pasauli, kaidu mes tū dzierdim, jiutam i stuostom par tū tuoļuok. Albumā apkūpuojom dzīsmis, caur kurom mes sasatykom i īpazynom cyta cytu.”

Albumā īkļautuo dzīsme latgaliski “Soka saule rītiedama” ir nu teiciejis Domicelys Līpenis (1901-1992) dzīšmu pyura. 1991. godā tū nu teiciejis īrakstejs etnomuzykologs Mārtiņš Boiko i muzikologe Gita Lancere. Jau īprīšk grupys “The Baltic Sisters” dalineica Liene Skrebinska beja tū īrakstejuse kai soliste (vaira par dzīsmi var skaiteit ITE), tok pārņ grupys izpiļdejumā “Soka saule rītiedama” tyka īkļauta ari izlasē “Native Music”, kas kotru godu dūd vareibu nūsaklauseit, ituos šaļts folk/tradicionaluos/pasauļa muzykys aktualitatis Latvejā.

Koč i grupa “The Baltic Sisters” pastuov tik drupeit vaira kai divejus godus, vystik tei jau ir pīsadalejuse nūzeimeiguokajūs tradicionaluos muzykys festivalūs Baļtejā – Leitovys etnomuzykys festivalā “Menuo Juodaragis” 2023. godā, Valmīrmuižys Etnomuzykys festivalā Latvejā 2024. godā, Vīlandis folkmuzykys festivalā Igaunejā 2024. godā, kai ari cytūs pasuokumūs, pīmāram, festivalā “Buskers les Neuchatel” Šveicē. Itūgod 3.-5. aprelī grupa pīsadaleis leluokajā Igaunejis muzykys industrejis pasuokumā “Tallinn Music Week”.

Dzīduotuojis snādz ari meistarklasis igauņu, latvīšu i leitovīšu tradicionalajā dzīduošonā, dagrīžūt klauseituoju viereibu svareiguokajom kotrys tautys dzīšmu sovpateibom. Kai pīzeist festivalu i koncertu organizātuoji, taipat ari klauseituoji, grupys unikalitate globojās spiejā paruodeit kūpeigū i atškireigū igauņu, latvīšu i leitovīšu tradicionalajā dzīduošonā. 

Albums ir īraksteits Viļņā, Leitovā (skaņu režisors Tadas Dešukas), i Reigā, Latvejā (skaņu režisors Gatis Gaujenieks), tū miksēja i māsterēja Gatis Gaujenieks studejā “GEM Plus”. Albuma dizainere ir Ieva Vaivaraite-Ošikiene. Albuma īrokstūs skaņ ari kūklis (Liene Skrebinska), shruti box, bungys, muola putyni (Laurita Peleniute), basgitara, gīga, perkusejis i vargans (Gatis Gaujenieks).