Roksta autoris: Amanda Anusāne, Laura Spundere, portals lakuga.lv

1. i 2. februarī Gertrudis īlys teatrī, Reigā, pyrmū reizi nūtyka storpdisciplinars volūdu festivals “Avots” (latgaliski – “Olūts”). Kulturvīta “Volūdu sāta” festivalu organizēja ar mierki styprynuot diskursu ap volūdu daudzveideibu i volūdys izapausšonys vareibom, kas ir cīši saisteitys ar kulturu i muokslu. Festivala nūslāgumā tyka prezentāta jauna gruomota latgaliski – jaunnorvegu volūdā rokstūšuo Nobela premejis literaturā sajiemieja Juna Fosis luga “Kaids nūteikti atīs”, kū latgaliski puortulkuojuse Jūlija Tumanovska.

Kulturvītys “Volūdu sāta” dybynuotuojs Snorre Karkonens-Svensons (interveju ar Snorri skaiti ITE) stuosta, ka ideja par itaidu festivalu dabyskai atguojuse nu vysa tuo, kū kasdīnā dora “Volūdu sāta”. “Ideja organizēt volūdu festivalu pastuov jau kaidus divejus godus. Mums beja vareiba aizbraukt pīredzis apmaiņā iz Norvegeju i Suomeju pasavērt, kai tī teik organizāti volūdu festivali, niu uorzemu kolegi gastej ari myusu festivalā. Ari niu mums ir daudz ideju vysaidom nūtikšonom iz prīšku, mes nūteikti grybātu, kab tei palyktu par kasgadeju tradiceju.” Taipoš Snorre izsaceja prīcu par tū, ka festivala apmaklātuoju vydā beja ari vairuoku mozuok lītuotūs volūdu puorstuovi. Jis pastreipuoja, ka kotrai volūdai ir sova situaceja i sovys problemys, tok var atrast ari daudz kūpeiguo.

Latgalīšu volūdys entuziasts i pasuokuma apmaklātuojs Laurs Magazeiņs pastreipoj, ka iniciativa runuot par volūdom kai taidom, ir eistyn apsveicama, jis ari aicynoj sevkuru nūīt gostūs iz kulturtelpu “Volūdu sāta” Reigā, kur ir vareiba apmeklēt vysaidys ar volūdom saisteitys nūtikšonys i atrast sev interesejūšys gruomotys.

Leluokuo daļa festivala ūtruos dīnys nūtikšonu beja veļteitys mozuok lītuotajom volūdom. Par sovu pīredzi stuosteja jaunnorvegu volūdys entuziasti Norvegejā, zvīdru volūdys – Suomejā, veravīšu – Igaunejā, kai ari latgalīšu i lībīšu – Latvejā. Piec vysu itūs puorstuovu prezentaceju sekuoja ari diskuseja “Mozuoklītuotūs volūdu vareibys 21. godu symtā”, kurū vadeja Rēzeknis Tehnologeju akademejis pietneica i lingviste Sanita Martena. Tuos laikā tyka runuots par vysaiduokim vaicuojumim, kuri skar mozuok lītuotuos volūdys, tymā skaitā volūdys lītuotuoju sasamazynuošonu, atbolstu regionalajom volūdom, ari aktualū vaicuojumu par cytu volūdu ītekmi iz mozajom volūdom.

Pasuokuma nūslāgumā tyka atkluota ari jauna gruomota – Nobela premejis laureata Juna Fosis lugys “Kaids nūteikti atīs” tulkuojums latgaliski. Lugu tulkuojuse Jūlija Tumanovska, izdavumu papyldynoj ari četri roksti: par Junu Fosi i lugu (autors: Andrea Romanci), latgalīšu volūdu teatrī (autore: Laura Melne), Fosi Latvejā (autore: Kitija Balcare), kai ari jaunnorvegu volūdu kai skotivis volūdu (autors: Snorre Karkonens-Svensons). Atkluojūt gruomotu, Snorre Karkonens-Svensons izsaceja interesantu dūmu, ka sabīdreibā volda stereotipisks redzīņs, ka mozuok lītuotajom volūdom nav vajadzeigs taids pat atbolsts, kai plotuok lītuotuom. Jis pastreipoj, ka sevkurai organizacejai byutu vaira juorunoj par tū, ka pasaulī ir lītys, kuruos navar izmiereit cylvāku skaitā, par pīmāru – volūdys lītuotuoju skaitā. Taipoš tyka pastreipuots, ka sevkurai volūdai ir cīši svareigi tūs originaldorbu tulkuojumi cytuos volūduos, kam tys paplašynoj skaiteituoju lūku i autorim dūd vareibu temu i ideju vierīņam, par kū raksteit. Tys ir svareigi ari latgalīšu volūdai – kab latgalīšu literaturā īītu pasauļa tendencis i tei izītu plotuokā pasaulī.

Lugys tulkuotuoja Jūlija Tumanovska atkluošonā saceja, ka da šam jai ir bejuse saskarsme ar dažom radnīceigom volūdom, par pīmāru dāņu voi bukmolu (vīns nu norvegu volūdys oficialūs paveidu – L.S.), tok na ar pošu jaunnorvegu volūdu. “Niu es varu pasaceit, ka jaunnorvegu volūdu nu bukmola škir leidzeiga plotuma sūļs, taipoš kai tys ir storp latvīšu i latgalīšu volūdu – ir pīteikūši tyvai, lai tys bytu puorvarams ceļš, tok ari pīteikuši tuolai, lai tū ceļu byutu vierteigi i interesanti izīt.” Luga “Kaids nūteikti atīs” režisora Olega Šapošnikova interpretacejā jau ir pīdzeivuojuse vairuokys izruodis Daugovpiļs teatrī i itamā sezonā vēļ tiks izruodeita, tyvuokuo izruode gaidoma 26. februarī.

Volūdu festivala “Avots” reikuotuoji ir kulturvīta “Volūdu sāta”, kuruos miseja ir radeit pozitivys puormainis sabīdreibā caur volūdu. Kab tū eistynuotu, “Volūdu sāta” snādz atbolstu pasnīdzieju kompetencis ceļšonā, izstruodoj vuiceibu materialus i metodikys, izdūd gruomotys i veidoj “Volūdu muzeju”. Pasuokumā tyka prezentāts vēļ vīns kulturvītys projekts – virtualuo izstuode “Linguapolis” par latgalīšu i jaunnorvegu volūdā, kas dreizumā byus daīmama ari plašuokai publikai.

Galerejā: atskots iz volūdu festivala “Avots” ūtrū dīnu. Foto: Amanda Anusāne/portals lakuga.lv