Autors: Ontons Lozda

Latgalīšu literaturā sevi pīsoka autors, kurs izalasejs pseidonimu Ontons Lozda. Portala lakuga.lv skaiteituojim jis pīduovoj dūmys, kas nūgiutys kasdīnā, sarunuos ar draugim i ceļā iz dorbu. Autors vaicoj sev, par kū pasauļs mainuos i ciļvieceiba ir pagaisynuojuse liderpozicejis. Ir daudzi ļaužu, bet moz cylvāku. Kaidā mārvīneibā kab nūsver ciļvieceibu?

***

Aizmigt dzaltonā pļovā, pasamūst aplypušam pīniņpyukom. Kulibaba!

***

Snīgā izavuorteit i nasasaļt.
Pīdzeivuot putini, tok saglobuot atvārtu sirdi.
Puorcīst vātru i vys palikt par cylvāku.

***

Nu munu baiļu izcēle snīgaveiru. Izalaide jis par reizi, kam beja baist sagaideit meikstūnis.

***

Cik pylns ladaskaps, tik pylna sirds. Pi tukšuoka soltaunīka vīgļuok ap sirdi.

Ar syltu sirdi cepli īkūrsi lobuok kai ar sausu molku.

***

Nūbraukt i pasavērt.
Tok naradzēt golvonuo.
Atīt i paēst.
Bet nasajust suota.
Palikt pyrmam
Tok nasajimt prīcys.

***

lada pučis lūgā beja
saulis spaitim puorsameja
meilė love voi panaceja
tautu doncs ci puora deja

***

Atrodušī nameklej, attaisejušī nastucinej.

***

Atguoja pavasars janvarī.
I izzīdēja rūze jai sirdī.
Tik munā piļsātā zīma naatsakuope.
Dasaguoja giut zivs iz īlys peļču lads.

***

Nūliduot paceli, tok ar dūmom palikt.
Pīveikt maratonu, bet vys nanūskrīt nu seve.

***

Izkuope kolnā.
A lejā natyka.
Īsastuoja grybys naspāks.

***

Ragavenis ar dreizumu
Puora gaismys godi minutā
Nūstuoja pi posta.
Zīmeļbrīžim ari avīzis juopalosa.

***

Lada gobols naspēja pīdūt pats sev i ļuove sevi izlaidynuot.
Taids i pavasara izlaidums.

***

Īguoju piertī i sirds sasyla.
Īlieču muorkā, i zalta zivteņa poša damuove.
I vieleišonuos pīsapiļdeja.

***

Solts buļu bīziņs nav nimoz tik švaks, ka ir interesants sarunu bīdrys.

***

Itūs laikus puordzeivuos tik gruomotu skaiteituoji, a puorejī nūreibs nu kuļdinīku smuorda i propuļs bezgaleigajā teimeklī.
A kam niule vīglai.