Rokstu sagataveja: portals lakuga.lv

Sastdiņ, 1. martā, Latgolys viestnīceibā “Gors” Rēzeknē byus Latgalīšu kulturys goda bolvys “Boņuks 2024” svineiguo ceremoneja – vīns nu svareiguokūs kasgadejūs nūtikšonu latgalīšu kulturā. Tamā tiks nūskaidruoti 10 bolvys – muola “Boņuka” statuešu – sajiemieji par padareitū latgaliskajā kulturā 2024. godā. Nu 17. da 27. februara portali LSM.lv i lakuga.lv aicynoj atbaļsteit sovu simpateju i bolsuot par kaidu nu 30 bolvys pretendentu – izalaseit spūdruokū 2024. goda nūtikšonu, personeibu voi aktivitati latgalīšu kulturā.

Latgalīšu kulturys goda bolvys “Boņuks” pasnēgšonys ceremonejā jau septeitū reizi tiks nūskaidruots ari publikys simpateju bolsuojuma bolvys – Žyka – sajiemiejs. Ari itūgod par sev meiluokū nu vysu 30 “Boņuks 2024” nominantu aicynoj latgalīšu kulturys ziņu portals lakuga.lv i Latvejis Sabīdryskuo medeja portals LSM.lv. Bolsuojums suocās pyrmūdiņ, 17. februarī, 10 stuņdēs portalā LSM.lv i byus da 27. februara pusnakšu, bet bolvys sajiemiejs tiks paziņuots ceremonejā 1. martā Rēzeknē. Bolsuot par sovu simpateju var vīnu reizi dīnā, autorizejūtīs ar sovu socialūs medeju profilu voi e-postu.

Kai var bolsuot?

• Izalosi sovu favoritu LSM.lv bolsuošonys lopā;
• Bolsuojuma apakšā autorizejīs ar sovu e-postu, “Google” voi “Draugiem.lv” profilu;
• Sekoj instrukcejom! Ka autoriziejīs ar socialūs teiklu profilu, mīdz “Bolsuot”, bet, ka ar e-postu, apstyprynoj bolsuojumu, mīdzūt iz saitis, kū sajimsi e-postā;
• Kod bolsuojums pījimts, ekranā
• Bolsuot var vīnu reizi dīnā.

Bolsuojuma uzvarātuojs sajims keramikis Vēsmys Ušpelis taiseitū muola statueti, kurā radzams Boņuka suņs Žyks, kuru sabīdreiba plotuok izzynuoja car režisora Juoņa Streiča kinu “Cilvēka bērns”, kas baļsteita taida poša nūsaukuma rakstnīka Juoņa Klīdzieja romanā. Taišni Vēsmys i Aivara Ušpeļu darbneicā “Malny Wylky” Rēzeknis nūvodā tūpa ari bolvys “Boņuks” statuetis. Pārnejā godā par skateituoju simpateju palyka Baļtinovys amaterteatris “Palādas”, sajamūt kai bolvys statueti, tai latgaliskūs lobumu kasti.

Latgalīšu kulturys goda bolvys “Boņuks 2024” ceremoneju 1. martā varēs vērtīs ari LTV1 eterā, kai ari LSM.lv i REPLAY.lv. Bolva pyrmū reizi tyka pasnēgta 2009. godā, bet nu 2013. gods jū reikoj Latgolys viestnīceibys “Gors” komanda. Vaira par Latgalīšu kulturys goda bolvu – bonuks.lv.

Atguodynuojumam “Boņuks 2024” nominanti (alfabeta parādā):

1. Amandys Anusānis i Liānys Merņakys ceļojūšuo izstuode “Baba, kurū škārsteikla bārni vaira napīdzeivuos”
2. Anitys Mileikys dzejūļu kruojums “ziņas par gadalaikiem”
3. “Black Rooster Kapelye” debejis albums “Vos Mir Zaynen”
4. Bronislavys Martuževys fonds “Rakstītāja” i Bronislavys Martuževys symtgadis nūtikšonys – dzīšmu gruomota “Dzimst dziesmas tautā, dzimst…” i koncertizvadums “Topi stipra, sirds”
5. Daugovpiļs teatra izruode latgaliski “Kaids nūteikti atīs”
6. Dr. hist. Henrihs Soms
7. Evija Maļkeviča-Grundele
8. Festivala “LNSO Vasarnīca” Latgolai veļteituo koncertprograma “Simfo. Etno. Džezs”
9. Folklorys kūpys “Upīte” projekts – kolhoza laiku dzīšmu atjaunuošona
10. Folklorys kūpys “Dyrbyni” pyrmais muzykys albums “Ontona monts”
11. “Google Translate” latgaliski
12. Grupys “Borowa Mc” 20 godu jubilejis koncerts i dzīsme “Prūjam juoīt”
13. Grupys “Dabasu Durovys” albums “Dīnys i nadīnys”
14. Inga Vigule
15. Juoņa Gleizda symtgadei veļteitī pasuokumi – Rēzeknis nūvoda pošvaļdeibys konkurss “Juoņa Gleizda bolva fotografejā” i fotogruomota “Gleizda metode”
16. Jura Urtāna gruomota “Latgales pilskalni un to folklora”
17. Komponista Edgara Mākena minialbums “Treis putneņi”
18. Koncertizvadums “Atīšona” – Ilze Sperga, Ieva Parša i Rihards Plešanovs
19. Koncertizvaduma “Francis” radejis verseja
20. Koncertizvadums “FOLK PASIJA: Francis Trasuns”
21. Latgalīšu volūdys tezaurs (pilotverseja)
22. Literaruos jaunradis latgaliski veicynuošonys programa
23. Nikolis Nauys gruomota “Seven hundred Latgalian words”
24. Pīminis i atkluošmu gruomota “Vitolds Valeiņs: personeiba i dorbi”
25. Raidejumu cyklys “Pazudušū pādu retrospekceja – pīrūbeža”
26. Raidejumu cyklys “Latgolys revizeja”
27. Sandis Zučiks i bīdreiba “Danču krātuve”
28. Ūgys albums “Čardaukšu rūtaļa”
29. Valentina Lukaševiča vītu stuostu kruojums “Dīnvydlatgolys stuosti”
30. Vinilplate Seimaņs Putāns “Caur bolsim as eju” i koncertizruode “Putāns.Toreiz un tagad.“