Rokstu sagataveja: portals lakuga.lv

Jau itūnedeļ, 23. februarī, suoksīs jaunais TV3 šovs “Koru kari”, kurā vīns nu dalinīku byus i Daugovpiļs tymsi zylais kors, kas apvīnuos dzīduotuojus nu vysys Latgolys (vaira par kori var puorskaiteit rokstā ITE). Vīna nu kora dalineicu ir Līga Znutiņa – dirigente, muzykys školuotuoja, kurei dzymuse i školā guojuse Daugovpilī, bet niu studej magistranturā Reigā, Jāzepa Vītuola Latvejis Muzykys akademejā. Līga par sevi soka, ka mīļoj muzyku i vysu, kas ar jū saisteits i, koč iz vairuoku godu saguojs byut tuoļuok nu sev meiluos Latgolys, ar eipašu prīcu gaidūt kotrys breivdīnys, kab brauktu iz sātu. Taišni Līga ir ituos nedelis kulturys īsacejumu autore.

Kaids sirdsdorbs i muzyka Ukrainys atbolstam

Muni treis kulturys īsacejumi saīs taidi zeimeigi i paruodeis ari munys vierteibys, deļtuo kai pyrmū grybu īsaceit vasalu nūtikšonu kūpu Daugovpilī, kas suoksīs jau 20. februarī. Ituos nūtikšonys vysys radeitys Ukrainys atbolstam. Koč i paguojs jau pagars laiks nu šaļts, kod eistyn suocem aizadūmuot ap tū, kū nūzeimoj mīrs pasaulī, nivīnu šaļteņu navarim pagurt i nūstuot atbaļsteit Ukrainu. 20. februarī Vīneibys noma lūgūs varēs īraudzeit Ukrainys piļsātys fotografejuos, bet turpynuojumā, 21. februarī, Stanislava Broka Daugovpiļs Muzykys vydsškolā byus koncerts “Ukrainas atbalstam”, kurā pīsadaleis školys audziekņu i pedagogu kolektivi, bet pats leluokais breids nūtikšonuos byus 24. februarī 18.30 stuņdēs Vīneibys noma koncertzalē, kur iz atbolsta koncertu “Veltījums Ukrainai” sasapuļcēs kai orkestris “Daugavpils Sinfonietta”, deju ansamblis “Laismeņa”, folklorys kūpa “Svātra”, veiru kors “Forte” i c. kolektivi i tautā meili solisti. Aizīmit izbaudeit kvalitativu muzyku i reizē izdorit vierteigu sirdsdorbu – pazīdojit Ukrainys atbolstam!

Šova “Koru kari” atsagrīsšona

Itys īsacejums byus tim, kurim nedeļgolā gribīs palikt sātā i baudeit breivdīnys divanā, bet reizē vystik pīdzeivuot kulturu i atbaļsteit sovejūs. Svātdiņ, 23. februarī, pi skateituoju piec vairuoku gadu puortraukuma atsagrīzs televizejis šovs “Koru kori”. Latgolu itamā dzīšmu ceiņā puorstuovēs Daugovpiļs tymsi zylais kors ar kora vadeituoju Arni Slobožaninu. Asu vīna nu kora dalineicu i, aizvodūt pyrmuos sasatikšonys, varu saceit, ko korī sasatykuši breineigi cylvāki, eistyni Latgolys patrioti, i mes kūpā kotru svātdīnis vokoru īprīcynuosim jius, skateituoji, ar dyžan skaneigom dzīsmem i cīši nūvērtēsim atbolstu, lai varātu šovā nūsaturēt garuok i sataiseit daudzi jaunu prīšknasumu. Cīši nūviertejam ari itū vareibu šovā puorstuovēt vysu Latgolu. Vaira par šovu var izzynuot ITE.

“Spreideits” latgaliski teatrī

Ka kuram vystik muzyka na cīši pi sirds, pīduovuošu apsavērt nazkū, kū pīduovoj Daugovpiļs teatris, kura repertuars ir cīši boguoteigs, jū eistyn ir vārds apmeklēt i atsapyust nu kasdīnys skrīšonys. Itamā nedeļā trešdiņ, 19. februarī, īsoku nūīt apsavērt izruodi latgalīšu volūdā “Spreidetis”. Izruode paradzāta vysim – tim, kurim latgalīšu volūda ir dzymtuo, kai i tim, kurī ar jū grib īpasazeit. Spreideiša laimis mekliešona vysim jau labi zynoma, bet itys īstudiejums tū apgierb latgalīšim rakstureigā sirds syltumā i dzeivisprīcā. 2022. godā itei izruode dabuoja “Boņuku”, deļtuo viņ ir vārts redzēt! Ar itū izruodi kai pādejū īsacejumu grybu pabeigt, kam i sevi saistu ar Spreideiti, kurs sātā atrūn laimi, tai i es, braucūt nu Reigys, Latgolā vysod atrūnu sev meilūs ļauds, kulturys nūtikšonys, pīdzeivuojumus i sātys sajiutu. Vaira par izruodi ITE.