Rokstu sagataveja: portals lakuga.lv

Gatavejūtīs vīnai nu svareiguokūs nūtikšonu Latvejis literaturā – Latvejis Literaturys goda bolvai (LaLiGaBa) –, bolvys ekspertu komiseja izziņuojuse bolvai pyrmajā kuortā nominātūs autorus i dorbus aba “garū sarokstu”. Kategorejā “Lobuokais dzejis dorbs latvīšu volūdā” nomināts ari Anitys Mileikys dzejis kruojums “ziņas par gadalaikiem”, kas ir vīneigais izdavums vysu nominantu vydā, kurā var skaiteit dorbus ari latgaliski.

Reizē ar Latvejis Literaturys goda bolvys pyrmuos kuortys nominantim izziņuots ari myuža bolvys sajiemiejs – itūgod tei ir tulkuotuoja Mudīte Treimane. Bolvys “eisuo saroksta” nominanti i specialbolvu sajiemieji tiks paziņuoti aprelī, bet poša apbolvuošonys ceremoneja paradzāta apreļa golā.

Kategorejā “Lobuokais dzejis autordorbs latvīšu volūdā” bolvys pyrmajā kuortā nu 17 dasaceitūs pretendentu nomināti deveni dorbi: Andrys Manfeldis “Dilstošais medus mēness” (“Aminori”), Edvīna Raupa “Laiks ir jau ievilcies” (“Jāņa Rozes apgāds”), Elvīrys Bluomys “Viņam patīk šie dzejoļi” (Žurnala “Punctum” atbolsta bīdreiba), Inesis Zanderis “Stikla burtnīca” (“Neputns”), Ingys Gailis “Un varbūt ka mēs visi izdzīvosim” (“Dienas Grāmata”), Ivara Šteinberga “Ābece” (Valters Dakša), Kristys Annys Belševicys “manifestācijas” (“Zvaigzne ABC”), Liepys Rūcis “Zemākās virsotnes” (“Latvijas Mediji”) i Anitys Mileikys “ziņas par gadalaikiem” (Latgalīšu kulturys kusteiba “Volūda” (bīdreiba “LgSC”)). Vaira par bolvys nominantim ITE.

Anitys Mileikys dzejis kruojums “ziņas par gadalaikiem”, kurā ir 42 dzejūli latvīšu literarajā i latgalīšu rokstu volūdā, izguoja 2024. gods augustā. “ziņas par gadalaikiem” ir ūtrais Kruoslovys nūvoda Osyunā dzymušuos literatis Anitys Mileikys dzejis kruojums. 2015. godā “Volūda” (tūlaik vēļ kai “Latgolys Studentu centrs”) izdeve Anitys debeja dzejis kruojumu “mūžīgā nepārtikusī stirna”, kas tyka nomināts Latvejis Literaturys goda balvai (LALIGABA) kai vīns nu lobuokūs debejis dorbu literaturā, taipat kruojums sajēme Latgalīšu kulturys goda bolvu “Boņuks 2015” par lobuokū snāgumu literaturā. Jaunajā, niu jau ūtrajā, dzejis kruojumā publicāti Anitys Mileikys dzejūli latvīšu literarajā i latgalīšu rokstu volūdā. Kruojuma redaktors ir Oskars Orlovs (Raibīs), bet korektore Māra Mortuzāne-Muravska. Dzejis kruojuma vuoka ilustraceja ir tūpūšuos muokslineicys, Latvejis Muokslys akademejis studentis Lijis Stivrinis speciali radeits dorbs, bet dzejis gruomotys maketu taisejuse dizainere Liāna Merņaka-Nikitina. Kruojuma izdūšonu atbaļstejuši Vaļsts kulturkapitala fonds i Ventspiļs Storptautyskuo Rakstnīku i tulkuotuoju sāta. Vaira ap kruojumu ITE.

Itūreiz Latvejis Literaturys goda bolvai 26 izdevnīceibys beja īsnāgušys 138 dorbus, kas izdūti 2024. godā, bet nu vysu īsnāgtūs dorbu tik vīnā – latgalīšu kulturys kusteibys “Volūda” izdūtajā Anitys Mileikys dzejis kruojumā “ziņas par gadalaikiem” – var skaiteit dorbus ari latgaliski. Anita poša par itū soka: “Asu latvīte ar ukraiņus saknem. Tāvs vysu laiku runuoja latgaliski, bet mama runoj Aizkarpatu dialektā, bet redzit kai saguojs, ka latvīšu i ukraiņu volūdys zynu labi, bet latgalīšu i Aizkarpatu dialektu puorzynoju, dīvamžaļ, viņ vidudeji. Bet vuicūs i doru! Kam izlūksnis i dialekti boguotynoj volūdu. I volūda i kultura ir pamats vysam. Vysam!”

Latvejis Literaturys goda bolvys žurejā itūgod struodoj literaturzynuotneica, filologejis doktore, Latvejis Universitatis profesore Ausma Cimdiņa, literaturys kritike i pietneica Anda Baklāne, rakstnīks i literaturkritiks Guntis Berelis, dramaturge i rakstneica Rasa Bugavičute-Pēce, tulkuotuoja i publiciste Rūta Karma, rakstnīks, tulkuotuojs, redaktors Vilis Kasims i dzejneica i publiciste Katrīna Rudzīte.