Rokstu sagataveja: portals lakuga.lv

Latgolys regionaluo televizeja (LRT) turpynoj raidejumu cyklu “Skolām (ne)būt!”. Catūrtū tuo raidejumu par Rēzeknis Vaļsts 1. gimnazeju kanalā TV24 i Re:TV vierszemis apraidē varēs redzēt jau 22. i 24. februarī.

Raidejumu cykla “Skolām (ne)būt!” catūrtajā raidejumā Latgolys regionaluo televizeja gasteis Rēzeknis Vaļsts 1. gimnazejā. Izgleiteibys īstuodi jaunuo izgleiteibys reforma tīšā veidā naskar, tok tei var pīdzeivuot jaunus izaicynuojumus, ka apleicīnē tiks reorganizātys vydsškolys. Rēzeknis Vaļsts 1. gimnazeja ir nacionalys nūzeimis izgleiteibys centrys, kas školānim pīduovoj kvalitativu izgleiteibu ar augstom praseibom i standartim. Jau niu taišni Rēzeknis Vaļsts 1. gimnazeju izalosa jaunīši nu tyvuoku i tuoļuoku apleicīņu, kai, pīmāram, Rogovka, Špogi, Saļnova i cytu vītu. Raidejumā skaidruos, voi škola byutu gotova uzjimt vēļ leluoku školānu skaitu i kai apleicīnis školu reorganizaceja varātu ītekmēt izgleiteibys sistemu Rēzeknis piļsātā. Raidejums gasteis ari vīnā nu goda leluokūs nūtikšonu Rēzeknis Vaļsts 1. gimnazejā – absolventu saliduojumā, kur nazkodejī izgleitojamī nu vītu sūpluok, kurī sovā laikā beja izalasejuši vuiceibys turpynuot taišni Rēzeknis Vaļsts 1. gimnazejā, īpazeistynuos ar sovu tuoļuokū dzeivis ceļu piec školys absolviešonys.

Projekts “Skolām (ne)būt!” viesteis par septeņom dažaidom izgleiteibys īstuodem Latgolā i tūs liktini kai laukūs i piļsātvidē, tai Latgolys regiona vidīnē i pīrūbeža teritorejuos. Raidejuma veiduotuoji brauks iz školom, kas ir jau slāgtys īprīšk i niu tūs telpys ir tukšys voi ari turpynoj darbeibu cytā veidūlā, kai ari apmeklēs tuos vuiceibu īstuodis, kam optimizacejis planu deļ itūšaļt draud sliegšona voi izgleiteibys pakuopis samazynuošona. Piļsātu školuos raidejums analizēs tūs gataveibu uzjimt vēļ leluoku školānu skaitu klasēs, īsavērs, kai atsateista puorīšona iz vuiceibom latvīšu volūdā vītuos, kur da šam beja ari krīvvolūdeigūs plyusma.

Raidejumu cykla “Skolām (ne)būt!” vysi septeni raidejumi, suocūt ar 1. februari, da 15. marta tiks puorraideiti kotru sastdīni 16.00 stuņdēs kanalā TV24 i pyrmūdīnēs 17.30 stuņdēs kanala Re:TV vierszemis apraidē Latgolys regionalajā televizejā. Taipat kotram raidejumam sekuos atkuortuojumi kanalā TV24 svātdīnēs 14.30 stuņdēs i ūtardīnēs kanala Re:TV vierszemis apraidē Latgolys regionalajā televizejā 7.00 stuņdēs.

Piec kotra raidejuma puorraidis televizejā tūs varēs atrast LRT sātyslopā lrtv.lv, kai ari vītnēs Facebook, YouTube i platformā xtv.lv.

Raidejuma veiduotuoji gaideis ari jiusu atsauksmis i īsacejumus viestulēs pa postu, adrese: Rēzekne, Atbreivuošonys aleja 98, LV-4601 ar nūruodi Latgolys regionalajai televizejai voi LRT socialūs medeju lopuos, kai ari e-postā lrt.zinas@inbox.lv voi zvonūt/rokstūt iz tel. nr. 26339536.

Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Skolām (ne)būt!” saturu atbiļd SIA “Latgales reģionālā televīzija”. #SIF_MAF2024

Publikaceju apmoksoj Latgolys regionaluo televizeja