Rokstu sagataveja: portals lakuga.lv

Andys Lipskys jubilejai veļteitais koncertizvadums “Dzied(in)āšana”, kurs pārņ tyka pīdzeivuots Latgolys viestnīceibā “Gors”, sajiems Kormuzykys bolvu kategorejā “Goda kormuzykys koncerts, izvadums, nūtikšona uorpus Reigys”. Koncertizvadums nūvārtāts par kvalitativu snāgumu i īguļdejumu kormuzykys atteisteibā.

Sajamūt bolvu, Latgolys viestnīceibys “Gors” Muokslinīcyskuos nūdalis vadeituoja Ilona Rupaine saceja: “Mes Latgolā, mes Rēzeknē burtyskai vynam perekli, i mes burtyskai asam pereklis kraujis molā. Mes asam stypri, mes asam drūsi, mes asam dzīdūši i mes muokam i dzīduot, i ari dzīdynuot.”

Koncertizvadums “Dzied(in)āšana” Latgolys viestnīceibā “Gors” izskanēja 2024. gods 27. aprelī. Tys beja veļtejums dirigentis Andys Lipskys jubilejai – jei jau gondreiž četrdesmit godu dirigej, reikoj i vuica. Īdviesmis i pedagogiskūs prasmu ziņā jai nav leidzeigu. Jei fenomenali muok īdvasmuot bārnus dzīduot, i itei dzīduošona, kas reizē ir ari dzīdynuošona, beja jubilejis koncertizvaduma kūdulā. Koncertā iz vīnys skotivis sasatyka Latgolys Muzykys i muokslys vydsškolys bārnu, jaunīšu kori i solisti, Rēzeknis vaļstspiļsātys sīvīšu kors “Medicus”, Rēzeknis nūvoda jauktais kors “Ezerzeme”, komponiste i perkusioniste Vija Moore, kai ari instrumentaluo grupa Eināra Lipska vadeibā. Koncertizvaduma rodūšuo komanda beja Anda Lipska (dirigente), Marika Čerņavska (režisore, scenareja autore), Ināra Apele (telpa i tārpi) i Inga Žirgule (horeografe).

Kormuzykys bolvys pretendentus vērtēja žureja, kuruos sastuovā dorbuojuos komponists i dirigents Jēkabs Jančevskis, dirigents Ainārs Rubiķis, muzikologs Orests Silabriedis, dirigente Rudīte Tālberga i dirigents Andris Veismanis.

Myuža bolvu kormuzykā sajēme dirigente Māra Skride, par goda kori tyka pīzeits jaunīšu kors “Balsis”, goda kora vadeituoju – Jurgis Cābulis, goda kulturvītu Reigā – Reigys Lutera bazneica i Reigys Lutera draudzis centrys, goda kulturvītu uorpus Reigys – Ventspiļs koncertzāle “Latvija”, goda jaunradi kormuzykā – Gundegys Šmitis diptihs “Saules dziesmas”, goda kormuzykys īrokstu – “Angele Dei” (Latvejis Radejis kors, dirigenti Kaspars Putniņš i Sigvards Kļava (“SKANI”)), goda kormuzykys koncertu Reigā – Reigys Dūma kora školys 30 godu jubilejis koncerts, goda puorsteigumu – Andra Veismaņa jaundorbs “Cilvēki laivās”. Bolvys padūšonys ceremonejis īrokstu var nūsavērt ITE.