Roksta autore: Agnese Skangale

21. februarī teik svieteita Storptautyskuo dzymtuos volūdys dīna. Sovā ziņā kotram nu myusu tī ir gūda svātki, kam varim gūdynuot sovu volūdu. Jau nu pošys bierneibys es runoju latgaliski, par tū asmu pateiceiga sovim vacuokim.

Muni vacuoki ir dzymuši, sovu bierneibu i jauneibys godu suokumu pavadejuši Padūmu Savīneibā, bet es asmu dzymuse i izauguse Eiropys Savīneibys laikā. Nu viesturis vys jau, ka zynim, ka ituos divejis savīneibys čīsi atsaškir i ar sovu kulturu, i politiskū nūstuoju, i ari dzymtuos volūdys īrūbežuošonu. Vystik, nasaverūt cik gryuši tī laiki beja, kotrys sovu dzymtū volūdu naaizmierst. 

Munys mamys saknis mekliejamys Medņovys pogostā, Zīmeļlatgolā. Ituos pusis cylvāki nu puorejuos Latgolys atsaškir na tik ar sovu Zīmeļlatgolys izlūksni latgalīšu volūdā, bet ari mentalitati, kas atsaspīgeļoj i munā mamā, i juos vacuokūs, i kaida daleņa ari manī. 

Sovpus muna tāva saknis mekliejamys Saļņovys pogostā, tīpat, kur asmu izauguse i dzeivoju es. Agruok nabeju pamanejuse, bet ari itamā pusē cylvākim ir sova saļņovīšu izlūksne latgalīšu volūdā. 

Ar munim vacuokim sātā runova latgaliski, partū, ka i jūs vacuoki, i vacvacuoki beja izauguši i kasdīnā lītova latgalīšu volūdu. Školā sovā vydā ar draugim ari runova latgalīšu volūdā, bet školuotuoji vystik aicynova runuot pareizajā latvīšu volūdā. Krīvu volūdu vajadzēja lītuot, kod gribieji stuotīs pionerūs voi komjaunatnē voi guoji kuortuot svareigys lītys augstuos īstuodēs. Īspiejams, tai kai muni vacuoki dzeivova laukūs, latgalīšu volūda dzeivova breivu vaļu vacajuos dzeraunēs. Gols golā, kurs tev var puormest par runuošonu latgaliski, ka dzeivuoji dzeraunē ar sābrim vairuoku kilometru attuolumā, i taipat sābru saimē runoj latgaliski.

Vystik vacuoku dzeivē latgalīšu volūdys lītuošona kasdīnā puorsameja, kod jī aizguoja vuiceitīs iz videjuos izgleiteibys īstuodem. 

Mama vuicejuos Ūgris 43. profesionalajā vydsškolā. Dīvamžāļ tī latgaliski navarēja tik breivi runuot i beja nūsaceiti rūbeži volūdā – latvyski voi krīvyski. Latgalīšu volūda pat beja īsaukta par “buļbu volūdu” i tamā raudzeja narunuot nu ībraukšonys Guļbinē voi Pļaveņuos. Tok, nasaverūt iz tū, tamā pusē vuicejuos, dzeivova voi struodova krītnys puļceņš latgalīšu, partū ik pa šaļtim latgalīšu volūdu varēja dzierdēt. Mama stuosteja, ka daudzim jaunīšim, kuri nabeja nu Latgolys, cīši patyka latgalīšu volūda. Jī prasejuši, lai parunoj vaira latgaliski. 

Mama pīmiņ, ka vīnu reizi Ūgrē nūguojuse iz veikalu, bet tī jai babeņa latgaliski prosa: “Cik itys moksoj?” Mama jai latgaliski ari atsacejuse, bet babeņa kai pateiceibys žestu uzsmaideja. Mamai ari ir draudzine nu Ūgris, kurai sābrūs dzeivova latgalīši. Bet vīnā pavasarā dīnā juos draudzine atbraukuse gostūs iz Latgolu buļbys laseitu, piečuok jau vokorā īsavuicejuse latgaliski runuot vīnā laidā. 

Tāvs vuicejuos Malnovys sovhoztehnikumā, kas beja natuoli nu juo sātys. Koč i jis vuicejuos tyvuok sovai sāta i tepat Latgolā, atškireibā nu munys mamys, vystik ari dzymtajā pusē navarēja kasdīnā runuot latgaliski. Vystik storpbreižūs ar draugim runova latgaliski, nareši ari krīvu volūdā, kam tī vuicejuos školāni nu cytu padūmu republiku. Bet, kod beja braukšona iz Reigys pusi, sovā vydā smiejuos, ka aiz Jākubpiļs latgaliski jau narunuosi, lai napīsasmej. Koč i nareši gadejuos taidi cylvāki, kurim patyka latgalīšu volūda, jim nabeja nikaidys saisteibys ar latgalīšu volūdu, bet ruodejuos, ka skaņ jau šmukai. 

Muns tāvs sovā jauneibā vēļ paspēja dīnēt armejā. Jis dīnēja Azerbaidžanys piļsātā Baku, bet nabeja vīneigais latgalīts tī. Leidz ar tū tāvs ari armejā ar sovim bīdrim runova latgaliski. Jam tī latgaliski patyka runuot, kam, izjamūt latgalīšus, nīvīns tevi nasaprota. Tāvs pats nūvāruojs, ka armejā latgalīši runova latgaliski, leitovīši – leitovyski, krīvi – krīvyski aba sovā vydā runuoja dzymtajā volūdā. 

Piec Latvejis naatkareibys atjaunuošonys muns tāvs suoce struoduot policejā, i tī sovā storpā runuojuši latgaliski, šaļtim pat ar prīšknīceibu. 

Koč i ir paguojs vaira nakai 20 godu, kai muna mama dzeivoj uorpus Zīmeļlatgolys, juos izlūksne runā ir sasaglobuojuse. Kaidu mozu daleņu nu mamys izlūksnis asmu puormontuojuse ari es.

Muni vacuoki sacynoj, ka niu jī jiutuos drūsuoki par sovu latgalīšu volūdu, izbraucūt uorpus Latgolys. Poša ari pīmiņu, ka tod, kod aizbraucam iz Reigu, runojam latgaliski. Vacuoki ari cīši prīceigi i lapni, ka, saleidzynojūt ar jūs bierneibys i školys laikim, niu latgalīšu volūda teik nūvārtāta augši i vaira navajag izavaireit i kauneitīs nu sovys dzymtuos volūdys.