Kulturys īsacejumi nedeļai: treis godi atbolsta, “Boņuks” i latgalīša detektivromans angļu volūdā
Rokstu sagataveja: portals lakuga.lv
Itei nedeļa vysim latvīšim īzeimej eipašys nūtikšonys. Itūreiz literats Aldis Bukšs nedelis īsacejumūs uzskaita tūs, kurymūs taidā voi cytaidā veidā pīsadaleis ari jis pats.
Treis godi nu Krīvejis pylna mārūga ībrukuma Ukrainā
24. februarī aprit treis pylni godi nu Krīvejis pylna mārūga ībrukuma Ukrainā. Dīna, kas na tik iz myužeigim laikim īzeimuos tymsu, bet ari cereibu tam, ka ļaunumu var apturēt i uzvarēt. Ukraiņu varūneiguo ceiņa tam ir pīruodejums. Tei nabyutu īspiejama ari bez myusu atbolsta, partū paļdis sevkuram, kurs paleidz Ukrainai juos ceiņā par breiveibu i sovys tautys, volūdys pastuoviešonu! Itamā nedeļā aicynoju eipaši pīminēt tūs latgalīšus, kas ir uperiejuši sovys dzeiveibys par Ukrainys i vysys Eiropys naatkareibu i breiveibu, kas fiziski atsarūn Ukrainā i ceinejās ar īrūčim rūkā.
“Boņuks 2024”
1. martā dūšūs iz kasgadejū must have pasuokumu latgalīšu kulturā – Latgalīšu kulturys goda bolvu “Boņuks 2024”. Lai ari redzīs, ka ar godim pat “Boņukā” juos skaņ arviņ mozuok, ceru itūgod tī dzierdēt daudzi latgalīšu volūdys i satikt leidzeigi dūmojūšūs. Piec dobys savīseigūs pasuokumūs asu vysai kautreigs – partū paleidzit maņ, ejit kluot i uzrunojit!
Stompaku kaujai – 80
2. martā aprit 80 godu nu Stompaku kaujis – leluokuos kaujis Baļtejā storp nacionalajim partizanim i čekistim. Kaujis, kurā nacionalī partizani natyka sakauti, tok piec dīnu ilgys ceinis naktī organizāti atsakuope. Aicynoju vysus svātdiņ, 2. martā, apmeklēt pīminis pasuokumus Bolvūs i nacionalūs partizanu nūmetnis vītā Stompakūs. Par gūdu Nacionalūs partizanu bruņuotuos pretuošonuos atceris dīnai Bolvūs nūsarysynuos ari zynuotnyskī skaitejumi par nacionalūs partizanu viesturi ar cīši interesantim tematim.
Bruoļu izdavums angļu volūdā – “Brothers”
Paguojušajā nedeļā publikaceju angļu volūdā pīdzeivuoja muns kriminalromans “Bruoli”. Tādiņ romans ar nūsaukumu “Brothers” pīejams e-gruomotys formā popularuokajuos e-gruomotu platformuos. Tys nabyutu bejs īspiejams bez laseituoju atbolsta Latgolā i vysā Latvejā! Paļdis jums!
Ari ituos nedelis breivuos šaļts vokorūs voi agrūs reitūs pavadeišu, raugūt pastuosteit par romanu piec īspiejis vaira angliski skaitūšim cylvākim. Gūdeigi sokūt, latvīšu rakstnīkam izalauzt pi angliski skaitūšu laseituoju ir cīši, cīši, cīši gryuši, partū prīcuošūs par sevkuru jiusu atbolstu. Ka zynit kaidu angliski losūšū, īsokit jam “Brothers”! “Bruoļus” angliski sovā eipašumā var dabuot Apple Books ITE, Amazon ITE i Kobo.com ITE.
