Rokstu sagataveja: portals lakuga.lv

Latgolys regionaluo televizeja (LRT) turpynoj raidejumu cyklu “Skolām (ne)būt!”. Pīktuo tuo raidejumu par Daugovpiļs Tehnologeju vydsškolu – liceju kanalā TV24 i Re:TV vierszemis apraidē varēs redzēt jau 1. i 3. martā.

Raidejumu cykla “Skolām (ne)būt!” pīktajā raidejumā Latgolys regionaluo televizeja gasteis Daugovpiļs Tehnologeju vydsškolā – licejā. Školā jau ūtrū vuiceibu godu teik eistynuota puorīšona iz vīnuotu školu aba vuiceibom tik latvīšu volūdā. Īprīšk tei bejuse mozuokumtauteibys škola, tok jau septeņus godus tamā nūtykuse pakuopeniska puorīšona iz vuiceibom vaļsts volūdā. Kab veicynuotu veiksmeigu puorīšonu, školā izstruoduots eipašs reiceibys plāns četrūs dorba vierzīņūs. Raidejumā varēs īpazeit vysaidu vuiceibu prīškmatu pedagogu pīredzi, izaicynuojumus i veiksmis atslāgus puorīšonā iz vuiceibom latvyski, taipat ari varēs izzynuot tūs školānu pīredzi, kurūs dzymtuo volūda ir krīvu i kurim vidē uorpus školys vys vēļ dominej krīvu volūda. Taipat raidejums īsavērs ari zynuotniski pietnīcyskūs dorbu konferencē, kur vydsškolys audziekni prezentēs pietejumus vysaiduos aktualuos jūmuos.

Projekts “Skolām (ne)būt!” viesteis par septeņom dažaidom izgleiteibys īstuodem Latgolā i tūs liktini kai laukūs i piļsātvidē, tai Latgolys regiona vidīnē i pīrūbeža teritorejuos. Raidejuma veiduotuoji brauks iz školom, kas ir jau slāgtys īprīšk i niu tūs telpys ir tukšys voi ari turpynoj darbeibu cytā veidūlā, kai ari apmeklēs tuos vuiceibu īstuodis, kam optimizacejis planu deļ itūšaļt draud sliegšona voi izgleiteibys pakuopis samazynuošona. Piļsātu školuos raidejums analizēs tūs gataveibu uzjimt vēļ leluoku školānu skaitu klasēs, īsavērs, kai atsateista puorīšona iz vuiceibom latvīšu volūdā vītuos, kur da šam beja ari krīvvolūdeigūs plyusma.

Raidejumu cykla “Skolām (ne)būt!” vysi septeni raidejumi, suocūt ar 1. februari, da 15. marta tiks puorraideiti kotru sastdīni 16.00 stuņdēs kanalā TV24 i pyrmūdīnēs 17.30 stuņdēs kanala Re:TV vierszemis apraidē Latgolys regionalajā televizejā. Taipat kotram raidejumam sekuos atkuortuojumi kanalā TV24 svātdīnēs 14.30 stuņdēs i ūtardīnēs kanala Re:TV vierszemis apraidē Latgolys regionalajā televizejā 7.00 stuņdēs.

Piec kotra raidejuma puorraidis televizejā tūs varēs atrast LRT sātyslopā lrtv.lv, kai ari vītnēs Facebook, YouTube i platformā xtv.lv.

Raidejuma veiduotuoji gaideis ari jiusu atsauksmis i īsacejumus viestulēs pa postu, adrese: Rēzekne, Atbreivuošonys aleja 98, LV-4601 ar nūruodi Latgolys regionalajai televizejai voi LRT socialūs medeju lopuos, kai ari e-postā lrt.zinas@inbox.lv voi zvonūt/rokstūt iz tel. nr. 26339536.

Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Skolām (ne)būt!” saturu atbiļd SIA “Latgales reģionālā televīzija”. #SIF_MAF2024

Publikaceju apmoksoj Latgolys regionaluo televizeja