Dzejūļu autore: Ligija Purinaša

Portala lakuga.lv skaiteituojim pīduovojam Ligijis Purinašys jaunuokūs dzejūļus. Par tim jei roksta tai: “Upe kai upe – taipoš tei vysod plyust iz jiuru. Viņ vysaidys cylvāku darbeibys rezultatā mainuos upis teciejums, ekosistema i sastuovs. Tys, kas vakar deve veļdzi, šudiņ var saiņdēt. Tys ari ir piļsātys upis sindroms.“

I
tik meikstai i maigai es meklieju
tovys naceļūs aizguojušuos dūmys
tu manī īsavieri caur
munim aiztaiseitajim ocu plokstim
byuvlaukumā stuovēja armatura
pādejī miereišonys dorbi
myusu storpā beja līknis pīkaļnis
tovys apsajimšonys panuokt sovu
mārūguošona i tehniskuo projekta
saskaņuošona pādejī dorbi
asu par kūtru lai sasacaltu pret
nūtykumu atteisteibys gaitu
kai byus tai byus tai jau ir bejs
es vaira nasabeistu sorguotīs
nu reita muns augšstylbs
izgaismuoja tovu īkuori
tovi betona putekli
beja sasajaukušs ar
munu pylnaša gaismu

II
Kronvalda parka vydā
zam kūku stuov sīvīte
jei smeignej kai siļče
moti ir sasapynkuojušs
kuojis ir sasamatušs
pamesteiba napabeigteiba
juos kompulsivuos darbeibys
vārstys iz sarunys aizsuokšonu

kaids bruoļs nu Saulis īlys tyvojās juos auguma aprisem
veikalā deļ seve jei nūpierks kompetys i buteli šņaba
veikala apsorgs kai Raiņs instruēja jaunu meitini
nā nu tok tev navāg bokseri nu kū jis tev taidu īdūs
kuo nabyutu tev pošai a ka daīs puorsaceļt iz laukim
a kai jis tod tev paleidzēs kū jis tev tod paleidzēs
tī tok apleik byus meži teirumi pļovys i bišu spīti
cauri verandai izatrīks saulis stori breiveiba i tu obejis
byusit smukys kai ikonostass i caur sauli tu ceļsīs i
par sauli tu paliksi īsi kai bišu spīts bet naaizīsi
nā nu tok tev navāg bokseri nu kū jis tev taidu īdūs
es samoksuoju par sovim mandarinim
meikstim sūlim aizīdama paceli iz sauli

III
uolovys skaita dzīsmis par meilajim
aizvainuotu jaunovu karapulki asynoj škāpus
mes īsim medeibuos juos klaigoj
i tod mes gierēsim uodys juos soldonai čukst
cepsim i virsim juos nūlaiza sovys suortuos lyupys
vīntuļš zāns siermā stuņdē zeimej plakatu
ar kurū jis cer izvarēt socialū oklumu
tai kai lobais izvar nalobū
jaunova marija loboj ortografejis klaidys
juos ciniskais skots iz dzeivi palics par daudz melanholisks
jei suokuse īneist nasapruoteigus pluoteigus najiedzeigus
īkuoris līsmēs dagūšus savteigūs natyklūs aizvainuotūs
līkuleigūs divkūseigūs sova vuorda naturātuojus viļteigūs
nataisnūs nagūdeigūs napatīsūs tuoļūs pazaudātūs naatrostūs
tūs kas tikpa pusei
tūs kas juos vuordu nalīteigi volkuojušs
jei grybātu byut kai Kains
jei grybātu vuordu pret vuordu zūbu pret zūbu aci pret aci
pīri pret pīri rūku pret rūku elpu pret elpu gluostu pret gluostu
jei klusai nūpurp nūdūrdama sovys acs
jei vaira nikuo nagrib zynuot
jei vaira nikuo nagrib dzierdēt
jei vaira nikuo nagrib redzēt
izviļkt tū ierkški nu sirds
puorvērst sirdi par bikeri
dzerit munu ašni
iedit munu mīsu

jī seņ nav ūstiejušs svynu i puļveri
puika raksteja pyrma 15 godim
jei nūgluosta jam golvu
varbyut lobais uzvarēs ar lobu
bet varbyut ari nā

IV
es teve ilgojūs
kai cītumnīks gaida sasatikšonys
kai jezus gaida krystā sisšonys
kai buoba gaida sova trešuo bārna
viņ zem sovys sirds es nosoju suopis
piec kotra mīlesteibys akta
juos izastīp pasaplašynoj puorsavierš
jaunuos teritorejuos kas juonūsorgoj
tev zem buorzdys ir dalenis
maņ zam uodys ir linejis
froņtis linejis īrokumu linejis nullis linejis
naīspiejama mīlesteiba ir muna
meiluokuo stiheja es asu profesionala
muorys zemis karalīne cīsšonu eksperte
daiļuo dama bez sovys religiskuos kusteibys
es otkon tev naktī syutu zinis
es otkon tevi uordeju nu seve nūst
kai vacu kokaru deči kab piec puora dīnu
dadīgtu otkon sev kluotyn
vyrtuvē īdaguse gaismu es skaitu litaneju
vysskaistuokuo mīlesteiba ir tei
kas nav īspiejama voi ir nūmyruse
esi sveicynuota jumprova žielesteibys pylna
kungs ir ar tevi

V
Reigys kanala molā mātojās jiutys
kai seņ krostā izsvīstys zivs
tīpat ir nūkrytuši puora bolūži
kilovys nav laši siļčis nav ikri
Venerai kas izkuop nu glīmežvuoka
ir pagarynuotys proporcejis
i jai asūt žāāāāāl
īkuore ir skaista i preciza
kai lūdis rikošets
kai godim tiemāta
naatbiļdāta mīlesteiba
aizvainuotys madonnys sporda durovys
žālai gauduodamys Reigys Centralcītumā
osorys tak iz augšu na leju jei smeignej
pi dīveņa gari goldi tī sēd pate meiluo muora
vīna poša vīšņa guoja puor azaru leiguodama
asu puorstuojuse plyust
maņ vaira nav kū rauduot
maņ vaira nav osoru
asu nūstuojuse
ceļa vydā
pi loba i ļauna atzeišonys kūka
siež vīntuļa jaunova marija